Մեկը ստացել է դանակի 13 հարված վզին եւ թոքերին, մյուսը՝ սրտին. Գավառում տուժած եղբայրների փաստաբանը մանրամասնում է

Օրեր առաջ Գավառում տեղի ունեցած արյունալի միջադեպերի հետեւանքով վիրավորում ստացածներից երկուսը, որոնք գործով ունեն վկայի կարգավիճակ, հորեղբոր որդիներ են՝ Գավառի բնակիչներ Արմեն եւ Դավիթ Հայթյանները:

«Հայկական ժամանակ»-ի հետ զրույցում նրանց փաստաբան Արմեն Մուխսիկարոյանը տեղեկացրեց, որ Արմեն Հայթյանը նախ Ազատության փողոցում է ստացել հրազենային վիրավորում ոտքի եւ որովայնի հատվածում, ապա հարձակման ենթարկվելով նաեւ հիվանդանոցում՝ ստացել է դանակի 13 հարված վզին եւ թոքերին: Մյուս եղբայրը՝ Դավիթ Հայթյանը, ըստ փաստաբանի, Ազատության փողոցի միջադեպին մասնակից չի եղել եւ որեւէ մեկի հետ կոնֆլիկտ չի ունեցել.  նա հիվանդանոց է գնացել եղբորը խնամելու, եւ հարձակման պահին գտնվելով նրա կողքին՝ ստացել է դանակի հարվածներ սրտի հատվածում:

Հիշեցնենք՝ ապրիլի 28-ին Գավառի Ազատության պողոտայում հնչել էին կրակոցներ, ինչի հետեւանքով սպանվել էր 2, վիրավորվել՝ 4 հոգի: Վիրավորներից 2-ը տեղափոխվել էին Գավառի, 2-ը՝ Երեւանի հիվանդանոցներ: Դրանից հետո, սակայն, իրավիճակը չէր հանդարտվել, եւ մարզի բնակիչները, մարզպետի խոսքով՝ մոտ 500 հոգի, շտապել էին հիվանդանոց՝ վիրավորների հետ սպանվածների համար հաշվեհարդար տեսնելու: Հիվանդանոցում գրանցվել էր 2-րդ միջադեպը. կոտրելով դռներն ու պատուհանները՝ նրանք ներխուժել էին հիվանդասենյակներ եւ վնասվածքներ հասցրել վիրավորներից մի քանիսին: Ընդհանուր առմամբ, վիրավորվել էր 5 հոգի: Առաջին բուժօգնություն ցուցաբերելուց հետո նրանք տեղափոխվել էին Երեւան: Դեպքի առթիվ Քննչական կոմիտեում հարուցվել է քրգործ սպանության, սպանության փորձի, ապօրինի զենք-զինամթերքի, գույքը դիտավորությամբ վնասելու կամ ոչնչացնելու եւ զանգվածային անկարգությունների փաստերի առթիվ: ՀՀ ոստիկանապետ Արման Սարգսյանի հանձնարարությամբ էլ Ոստիկանության ներքին անվտանգության վարչությունում շարունակվում է ծառայողական քննությունը:

Մեր զրույցում Հայթյանների փաստաբան Արմեն Մուխսիկարոյանը որոշ մանրամասներ ներկայացրեց դեպքի հանգամանքներից՝ նշելով, որ կատարվածը կապ չունի նախկինում գրանցված սպանությունների հետ եւ չունի նաեւ քաղաքական պատճառաբանություններ. «Սա մարզում հանցավոր խմբավորման գոյություն ունենալու արդյունքն է, Վլադիմիր Գասպարյանը (ՀՀ նախկին ոստիկանապետն է,- խմբ.) եւ Վարդան Նադարյանն են (Գավառի նախկին ոստիկանապետ, Գեղարքունիքի մարզային վարչության նախկին պետ,- խմբ.) սերտ կապեր ունեցել եւ թողել, որ այս հանցավոր խումբը 1993-ից մինչ օրս գոյություն ունենա Նորատուսում»: Մուխսիկարոյանը նշեց, որ անուններ չի տալու, բայց տեւական ժամանակ եղել են սպառնալիքներ, որ «կամ պիտի մեզ հետ լինեք, կամ ոչնչանաք». «Չասեմ՝ նորատուսցիներ, ինչ-որ խմբավորում է, որ ուզել է՝ մերոնք զինվորագրվեն իրենց կլանին, հավատարիմ ծառայեն իրենց, հարկ եղած դեպքում կատարեն հանցագործության հրամաններ, բայց Արմենը հրաժարվել է, ասել է՝ ես կապ չունեմ»:

Մուխսիկարոյանի խոսքով՝ դեպքից մոտ 30-40 օր առաջ միջադեպ է եղել, որը հանգեցրել է արյունալի հետեւանքների: Թե կոնկրետ ինչ միջադեպ եւ ում միջեւ, նա չմանրամասնեց՝ նախաքննության շահերից ելնելով, միայն նշեց, որ այդ դեպքի առթիվ եւս հարուցված է քրեական գործ Քրեական օրենսգրքի 112-րդ հոդվածի հատկանիշներով ՝ մի խումբ անձանց կողմից դիտավորությամբ առողջությանը ծանր վնաս պատճառելու համար: Մուխսիկարոյանի տվյալներով՝ այդ գործով կարգավիճակ ունեցող անձ դեռեւս չկա. «Ես ուզում եմ, որ այդ գործը եվս քննվի Քննչական կոմիտեի հատկապես կարեւոր գործերով քննության վարչությունում, բայց դա չի արվում, կարծում եմ՝ դիտավորյալ չեն միացնում, որպեսզի կարողանան պարտակել իրենց այն գործողությունները, որոնք հանգեցրին այսպիսի բարդության»: Փաստաբանի խոսքով՝ ապրիլի 28-ին հանդիպման նախնական պայմանավորվածություն կողմերի միջեւ չի եղել. «Արմեն Հայթյանը աշխատանքի ճանապարհին է եղել,  դիմացը կտրել են 5-6 մեքենայով, եւ այդ հարձակումը եղել է, եկել են, որ նրան պատժեն, վախի մեջ պահեն, նրանք եղել են շատ, մոտ 20-25, իսկ գավառցիները՝ 2-3 հոգի, թող չասեն, թե երկկողմանի, մեծ բախում է եղել»:

Ըստ փաստաբանի՝ նրա վրա կրակել են այն սեւ մեքենայից, որը, ինչպես երեւում է տեսանյութում, գալիս է դեպքի վայր, ընթացքը դանդաղեցնում, կրակոցներ արձակում եւ հեռանում.  «Պատի վրա կա չորս գնդակ, կրակել ու անցել են, հենց պատասխան կրակոցներ են ստացել, դիմել են փախուստի, Արմենի մի ոտքը այդ ժամանակ, կարելի է ասել, չկար, լրիվ փշրված էր, դրա համար նա ի վիճակի չէր մյուս տուժածներին հիվանդանոց տանելու»: Փաստաբանի խոսքով՝ փոխհրաձգության հետեւանքով մահացածները վիրավորվելուց հետո առժամանակ ողջ են մնացել, ըստ նրա՝ եթե Շտապ օգնությունը կես ժամ հետո չգար, այլ ավելի վաղ, գուցե կարողանային նաեւ նրանց կյանքը փրկել:

Արմեն Հայթյանը եւս իր մոտ ատրճանակ է ունեցել, որը, ըստ փաստաբանի, նրան չի պատկանում. «Դա իր սեփականությունը չէ, դա նա վերցրել է ուրիշից՝ սպասելով նման իրադարձությունների, նա գիտեր, որ իր վրա հարձակվելու են, եւ եթե նախապատրաստված չլիներ, ապա նրան էլ տեղում սպանելու էին, նա դիմել է ինքնապաշտպանության. եթե Սյունիքի մարզպետի վրա կրակոցների գործով գտել են, որ կա անհրաժեշտ պաշտպանության, ապա Արմեն Հայթյանը, որի վրա զինված գալիս էին, չպիտի քրեական պատասխանատվության ենթակա անձ լինի»: Հայթյանի արձակած կրակոցից վիրավորում ստացած կա թե ոչ՝ փաստաբանը չգիտեր, ասաց՝ դա դատաձգաբանական փորձաքննությունը կպարզի. «Ամեն դեպքում, այդտեղ ոչ մի օրինական զենք չի եղել, օրինականը հաշվառված է, եւ եթե հաշվառված զենք եղել է, ապա դրա տերը եւս պիտի պատասխան տա նրա համար, որ իր օրինական զենքը հայտնվել է ուրիշի մոտ»:

Ինչ վերաբերում է հիվանդանոցի վրա հարձակման դեպքին, Արմեն Մուխսիկարոյանի խոսքով՝ չափազանցնում են, երբ ասում են, թե հավաքվածները մոտ 500-ն եղել. «Ականատես ունենք հիվանդանոցում, որ ասում է՝ եղել են 50-80 հոգի, որոնցից ներս են մտել 10-20 հոգին, մենք հիմնավոր կասկածներ ունենք, որ 1-2 ոստիկանի կողմից աջակցություն է եղել, զանգել են, կանչել հաշվեհարդար տեսնողներին, ասել՝ չուշանաք, եկեք ձեր գործն արեք, 1-2 ոստիկան, որոնք չպիտի լինեն այդ համակարգում»: Հարցին՝ դա հավաստող ապացույցներ իրենք ունե՞ն, Մուխսիկարոյանը պատասխանեց. «Չունեմ, բայց դրանք մարդկանց կողմից ասված բաներ են, նրանք  պատահական մարդիկ չեն»: Փաստաբանը իրավասու մարմիններին խնդրում է՝ Ոստիկանության Գավառի վարչությունում եւ տվյալ բաժնում աշխատող բոլոր ոստիկանների՝ այդ օրվա 17:03-22:00 ժամանակահատվածի հեռախոսազանգերի քաղվածքները ուսումնասիրել, ստուգել, թե նրանցից ովքեր են կապվել այս գործով անցնող անձանց հետ, եթե զանգել են, ապա ինչ են խոսել եւ ինչքան. «Այդ դեպքում ամեն ինչ կպարզվի, եւ մենք կիմանանք այն մարդկանց անունները, որոնք աշխատել են այդ վրեժի միջոցառումների համար, իսկ ոստիկանապետի աշխատանքը գնահատում եմ շատ բարձր, շատ համարձակ եւ պրոֆեսիոնալ է գործել, պարզապես 1-2 ոստիկան կա, որ աշխատավարձ է ստանում հայրենիքից, բայց աշխատում է Նորատուսի որոշ անձանց համար, անուններ չտամ»:

Դավիթ Հայթյանը, ըստ փաստաբանի, հարվածի տակ է ընկել միայն նրա համար, որ Արմեն Հայթյանի հորեղբոր որդին է եւ նրան խնամելիս է եղել. «Նա պատահական է ընկել այդ հարվածի տակ. դաժան ծեծ, դանակահարություններ, դանակը թողել են սրտի մեջ, իր վիճակը ավելի ծանր է, դեռ վերակենդանացման բաժանմունքում է, արդեն սկսել են հույս տալ, Աստված է օգնել, նրա մատը խառն է եղել, ես զարմանում եմ, որ այսքանից հետո նրանք կենդանի են մնացել, որովհետեւ դանակի 13 հարվածը կատակ բան չէ»: Փաստաբանը հատուկ շնորհակալություն հայտնեց Գավառի բժիշկներից մեկին, որը փրկել է եղբայրների կյանքը:  Այժմ նրանք Երեւանի հիվանդանոցներից մեկում են, փաստաբանի խոսքով՝ հիվանդանոցը ոստիկանների կողմից այնպես է հսկվում, որ անգամ ինքն է դժվարությամբ տեսակցել նրանց. «20 տարի է՝ երկու եղբայր սարերում խոտ են քաղում, նրանք դառը քրտինքով ապրող եւ հանցավոր գործերին չխառնվող մարդիկ են, սակայն ոստիկաններին, քննիչին չեն վստահում, հատկապես հիվանդանոցի վրա այդ հարձակումից հետո, եւ այդ պատճառով է, որ Արմեն Հայթյանը, օգտվելով իր իրավունքներից, հրաժարվել է ցուցմունք տալ»:

Մուխսիկարոյանը նաեւ ազգակցական կապ ունի Հայթյանների հետ, այդ պատճառով է, որ վտանգ է տեսնում նաեւ իր անձի հանդեպ. «Ես դիմել եմ Փաստաբանների պալատի նախագահին, հայտնել այդ մասին, նա զանգել է Ոստիկանապետին, շնորհակալություն երկուսին էլ, այժմ նրանց շնորհիվ ապահովվում է իմ անձնական անվտանգությունը. կա ոստիկանության համապատասխան անձ, որին ես 24 ժամ կարող եմ զանգել այդ հարցով»:

«Պատահական անցնելիս է եղել»

Ազատության փողոցի միջադեպին ներկա եղածներից մեկն էլ Նորատուսի բնակիչ Սասուն Մելոյանն է, որը, փաստաբան Հովսեփ Սարգսյանի խոսքով, ունի վկայի կարգավիճակ. «Նա կատարվածի հետ որեւէ առնչություն չունի, պատահական անցնելիս է եղել իր ընկերոջ հետ, դե, Նորատուսն ու Գավառը իրար մոտ են, մարդ գուցե օրական 7-8 անգամ գնա-գա, եթե գործեր ունի, անցնելիս է եղել, փողոցում իր համագյուղացիներին է տեսել, իջել է, ու կրակել են ոտքի վրա ու քշում գնում. այդպես վիրավորվել է, փախել, դաշտով իջել հիվանդանոց»:

Հովսեփ Սարգսյանի խոսքով՝ Մելոյանը երեկ հարցաքննվել է եւ այդ հանգամանքները հայտնել քննիչին. «Նա ուրիշ բան չուներ էլ հայտնելու, միջադեպի հանգամանքները նրան հայտնի չեն, ոչ կռվող է, ոչ կրակող, հետեւաբար, նրա հետեւից ոչ էլ հիվանդանոց պիտի գային»:

Մելոյանը եվս այժմ Երեւանի հիվանդանոցներից մեկում է, ոստիկանների հսկողության ներքո. «Հասկանում ենք, որ անվտանգություն պիտի ապահովեն, գործի հանգամանքները լրիվ եւ օբյեկտիվ բացահայտեն, բայց տարրական իրավունքներից չպիտի զրկեն. քանի օր է՝ նա զրկված է հեռախոսից, հեռուստացույցից, տեղեկություններ ստանալուց, անգամ հարազատները չեն կարողանում տեսակցել»: Հարցին՝ տեսակցությունների վրա արգե՞լք է դրվել, Սարգսյանը պատասխանեց, որ պաշտոնապես դրված չէ, բայց ոստիկանները թույլ չեն տալիս տեսակցել. «Ես էլ գնացել եմ, ասում եմ՝ փաստաբանն եմ, ոստիկանն ասում է՝ քննիչը պիտի թողնի, քննիչին զանգում եմ, արգելում է՝ ոչ մի պատճառաբանություն չներկայացնելով, սկսում եմ կասկածել նրանց պրոֆեսիոնալության վրա»: Հովսեփ Սարգսյանը տեղեկացրեց, որ այդ խնդրով դիմել է Մարդու իրավունքների պաշտպանի գրասենյակ եւ ի վերջո կարողացել է տեսակցել իր վստահորդին:

«Կյանքին վտանգ չի սպառնում»

Մեր զրույցում Երեւանի հիվանդանոցներից մեկի վիրաբուժական գծով տնօրենն ասաց, որ իրենց մոտ գտնվող 2 քաղաքացիների վիճակը գնահատվում է միջին ծանրության. «Ստաբիլ վիճակում են, այլեւս ռեանիմացիոն բաժանմունքում չեն, տեղափոխվել են տրավմատոլոգիայի եւ օրթոպեդիայի բաժանմունք, երկուսն էլ գտնվում են հսկողության տակ, ստանում՝ պլանային բուժում»: Նրա խոսքով՝ նրանց կյանքին այլեւս վտանգ չի սպառնում, բայց դեռ երկար ժամանակ նրանք մնալու են հիվանդանոցում, գուցե նոր վիրահատության անհրաժեշտություն լինի:

Մյուս հիվանդանոցից մամուլի խոսնակը մեր հարցին ի պատասխան տեղեկացրեց, որ իրենց մոտ գտնվող երկու վիրավորների վիճակը բավարար է, մեկինը՝ միջին ծանրության: Նրանք կյանքին այդ պահի տվյալներով վտանգ չէր սպառնում:

Նշենք նաեւ, որ Քննչական կոմիտեի վերջին տվյալներով՝ հարուցված քրեական գործով մեղադրանք է առաջադրվել 16 անձի, որոնցից 13-ը կալանավորվել են,  եվս 2 անձի ձերբակալման որոշում է կայացվել: Մեր հարցին, թե ինչ խափանման միջոց է ընտրվել մյուս մեղադրյալների նկատմամբ, եւ կան արդյոք հետախուզվող կամ որոնվող անձինք, Քննչական կոմիտեի տեղեկատվության եւ հասարակայնության հետ կապերի բաժնից չցանկացան տեղեկություն հաղորդել՝ հայտնելով, որ նախաքննությունը շարունակվում է:

«Հայկական ժամանակ»-ը պատրաստ է հրապարակել նաեւ մյուս կողմերի տեսակետները:

 

Տպել
5712 դիտում

Նիկոլ Փաշինյանի գլխավորությամբ տեղի է ունեցել ՔՊ նախաձեռնող խմբի նիստ․ հայտնի է՝ ինչ է քննարկվել

ՀՀ-ն որևիցե բան չի պատրաստվում զիջել, ստոր շահարկումներ են․ Ալեն Սիմոնյանը՝ Տավուշի շուրջ պտտվող լուրերի մասին

Սուրեն Պապիկյանը մասնակցել է ռազմական տեխնիկայի ցուցադրությանը և հետևել մարտական հրաձգությանը (լուսանկարներ)

Ինչպես կասեր դասականը՝ «յա՜, իրո՞ք». Արշակ Կարապետյանը «գողացել» է ՀՀԿ-ի ծրագիրը

ՌԴ դեսպանը սիրում էր Ջերմուկում հանգստանալ, լուսանկար էր հրապարակել, բա թող գա ասի, որ դա ՀԱՊԿ-ի տարածք է․ Սիմոնյան

Երբ կկայանա Ալեն Սիմոնյանի և Սահիբա Գաֆարովայի հաջորդ հանդիպումը․ ԱԺ նախագահը մանրամասնել է՝ ինչ է քննարկվել մարտի 22-ին

Վիճաբանություն և ծեծկռտուք «Ռիո Մոլլ»-ի հարևանությամբ. կռվի մասնակիցների մեծ մասը անչափահասներ են, կա վիրավոր

Ռուսաստանը նպատակ է դրել հեղաշրջում իրականացնել Հայաստանում, առաջիկայում քայլերը կսրվեն. Առաքելյան

Դասարաններում կկրճատվի աշակերտների թիվը․ իրականացվել են գնահատման համակարգի փոփոխություններ

Բախվել են «Նիսսան»-ն ու «Ֆորդ տրանզիտ»-ը․ վերջինս նաև երկաթե արգելապատնեշներին է հարվածել, տուժածները հիվանդանոցում են

ԱՄՆ-ը Ռուսաստանի Դաշնությանը մանրամասն տեղեկատվություն է տրամադրել ահաբեկչության սպառնալիքի մասին․ Սպիտակ տուն

Երևանի գլխավոր հատակագիծը կլինի թվայնացված փաստաթուղթ․ Տիգրան Ավինյանը տեսակապով հարցեր է քննարկել Քրիս Չոայի հետ

Շահրամանյանը շարժվում է Բակո Սահակյանի ու Սերժ Սարգսյանի պահվածքով, պետք է ուշադրության կենտրոնում լինի. Իոաննիսյան

96 խնամատար ընտանիքում դաստիարակություն է ստանում 152 երեխա․ այս ինստիտուտի զարգացման աշխատանքները շարունակվում են

Հայ-ռուսական հարաբերություններում առկա վիճակը լավատեսություն չի ներշնչում․ ինչում է մեղադրել Լավրովը ՀՀ ղեկավարությանը

Մինչև ապրիլի 5-ը կատարված իրավախախտման տուգանքի 50 տոկոսը վճարելու դեպքում պարտավորությունը կհամարվի կատարված

Չստացված չեկիստ, հանգիստ վեր ընկիր տեղդ ու ջանդ յուղիր. Մեհրաբյանը՝ Շահրամանյանին

200 հոգու հրկիզման սահմռկեցուցիչ դրվագն ունենալով իր անցյալում՝ խորհուրդ է տալիս Հայաստանի անվտանգության մասին. Սաֆարյան

Հավերժ ճակատներին Եվլախ դաջածներն էլի ակտիվացան. Հարություն Մկրտչյանը՝ Սամվել Շահրամանյանի մասին

Բախվել են շտապօգնության ավտոմեքենան և «Մերսեդես»-ը

Աֆղանստանում 5․7 մագնիտուդ ուժգնությամբ երկրաշարժ է տեղի ունեցել

Խմբի կազմում ապօրինի կերպով զենք-զինամթերք են ձեռք բերել և իրացրել․ խուզարկություններ Երևանում և Գողթանիկում (լուսանկար)

Մեկնարկել է բարձրագույն կրթություն չունեցող մասնագետների արտահերթ կամավոր ատեստավորումը

Եվրոպական խորհրդի քաղաքական և անվտանգության հարցերով կոմիտեի անդամները կայցելեն Հայաստան

Նոր Հաճնի կամրջի վրա փոսային նորոգման աշխատանքներ են իրականացվում․ երբ կավարտվեն

Հայտնի են Արթուր Աբրահամի հոր՝ Գրիգոր Աբրահամյանի հոգեհանգստի և հուղարկավորության վայրն ու օրերը

Վարդենյաց լեռնանցքը դժվարանցանելի է կցորդիչով բեռնատարների համար

Վարչապետի գլխավորությամբ քննարկվել է «Հայփոստ»-ի զարգացման ռազմավարության նախագիծը․ ինչ է հանձնարարվել

29.94 տոննա մարդասիրական օգնություն՝ 1․5 մլն անձի․ ինչ է ուղարկել Հայաստանի կառավարությունը Գազա

Իրականացվել է ոչ պատշաճ հետազոտություն․ պարզվել է 20-ամյա հղի կնոջ մահվան պատճառը, մեղադրանք է ներկայացվել ԲԿ-ի 3 բժշկի

Ճամբարակի սննդի օբյեկտի գործունեության կասեցումը վերացվել է

Երևանի ավագանու ընտրություններից հետո ԿԸՀ վարկանիշն աճել է․ ներկայացվել են ՄՀԻ-ի հետազոտության արդյունքները

Հայաստանի և Վրաստանի խորհրդարանների գիտության ու կրթության հարցերով հանձնաժողովները համատեղ հայտարարություն են ստորագրել

Արարատի կոնյակի գործարանում վերահսկողություն կիրականացվի․ ՍԱՏՄ-ն ստացել է Բելառուսի առողջապահության նախարարության նամակը

Հայ-վրացական հարաբերությունները ռազմավարական մակարդակի են․ Ռուբինյանն ընդունել է Վրաստանի խորհրդարանի պատվիրակությանը

Ինչ փոփոխություններ է արձանագրել տարադրամի շուկան մարտի 28-ին

Սերգեյ Նարիշկինը այց է կատարել Հյուսիսային Կորեա

Անցած մեկ օրում ՀՀ ավտոճանապարհներին վթարների հետևանքով 3 մարդ զոհվել է, 29-ը՝ վիրավորում ստացել

«Միր» քարտերն արգելելը հավասարակշռված որոշում է, չպետք է շրջանցենք սանկցիաները. Թունյան

Հայկ Մարությանը նոր կուսակցություն է հիմնում