Հրապարակվել է «Էրեբունի պլազա»-ի կրակոցների գործով մեղադրյալի ցուցմունքը. գործը մակագրվել է Դավիթ Բալայանին

«Էրեբունի պլազա» բիզնես կենտրոն ներխուժելու եւ կրակոցներ արձակելու դեպքի առթիվ հարուցված քրեական գործը մակագրվել է Երեւանի ընդհանուր իրավասության դատարանի Շենգավիթի նստավայրի դատավոր Դավիթ Բալայանին:

Նիստի օր դեռեւս նշանակված չէ:

Այս մասին «Հայկական ժամանակ»-ը տեղեկացավ դատական տեղեկատվական համակարգից:

Գլխավոր դատախազությունը, հիշեցնենք, երեկ հայտնել էր, որ քրեական գործով նախաքննությունն ավարտվել է, եւ այն բժշկական բնույթի հարկադրանքի միջոց կիրառելու եզրակացությամբ ուղարկվել է դատարան: Նշենք, որ գործով մեղադրյալ Արթուր Թորոսյանի նկատմամբ հարուցվել է բժշկական բնույթի հարկադրական միջոցներ կիրառելու վարույթ, քանի որ նախաքննության ընթացքում նշանակված համալիր փորձաքննությամբ նա ճանաչվել է անմեղսունակ. նրա մոտ ախտորոշվել է «Շիզոֆրենիա, պարա­նոիդ ձև» հո­գե­կան հի­վան­դութ­յունը:

Ըստ մեղադրական եզրակացության համառոտ նկարագրի՝ Արթուր Թորոսյանին մեղադրանք է առաջադրվել այն բանի համար, որ նա 2020 թվականի հունվարի 23-ին՝ ժամը 14:30-ի սահմաններում, մուտք է գործել Երևան քաղաքի Վազգեն Սարգսյան փողոցի 26/1 հասցեում գտնվող «Էրեբունի պլազա» բազմաֆունկցիոնալ բիզնես կենտրոն, որտեղ իր մոտ պահվող «Սայգա» տեսակի զենքի գործադրմամբ անձանց կյանքի և առողջության համար վտանգավոր բռնությամբ պատանդ է վերցրել այդտեղ գտնվող մի շարք անձանց՝ հանդիպում պահանջելով ՀՀ երկրորդ նախագահ Ռոբերտ Քոչարյանի գրասենյակի ղեկավարի հետ: Ըստ մեղադրանքի՝ այդ ընթացքում Թորոսյանը երկու կրակոց է արձակել՝ նախասրահի առաստաղի, ապա բազմոցի և սյան ուղղությամբ՝ պատճառելով շուրջ 400.000 ՀՀ դրամի գույքային վնաս:

Դատական տեղեկատվական համակարգում հրապարակվել է նաեւ, թե ինչ ցուցունք է տվել Թորոսյանը բերման ենթարկվելուց եւ ձերբակալվելուց հետո, երբ ունեցել է կասկածյալի կարգավիճակ: Ըստ նրա ցուցմունքի՝ դեպքի օրը նա իր բնակության վայրից տաքսի ավտոմեքենայով ուղևորվել է Երևան քաղաք, 15:00-ի սահմաններում մեքենան կանգնեցրել «Էրեբունի-Պլազա» բիզնես կենտրոնի դիմաց, որից հետո իջել է ավտոմեքենայից, հետևի նստատեղից վերցրել իր զենքը, և այն, պարկի մեջ պահած, աստիճաններով բարձրացել ու մտել է բիզնես կենտրոն: Կենտրոնի մուտքի պտտվող ապակիներով դուռն անցնելուց հետո մտել է առաջին հարկի սրահը, զենքը հանել է պարկից, պարկը մի կողմ գցել, զենքը մարտական դիրքի բերել ու մեկ անգամ կրակել կենտրոնի առաջին հարկի առաստաղին, ապա զենքը, ուղղելով դեպի ընդունարանի աշխատակցուհու վրա, պահանջել է, որ այդ աղջիկն իրեն ուղեկցի ՀՀ երկրորդ նախագահ Ռոբերտ Քոչարյանի գրասենյակ: Այդ ժամանակ նկատել է, որ աղջիկը նստած տեղը շատ վախեցած է, կցկտուր ձայնով իրեն ասել է, որ չի կարող ուղեկցել, ինչից հետո նրան թողնելով նույն տեղում՝ քայլել է դեպի երկրորդ հարկի աստիճանների կողմը և աստիճաններով բարձրացել 2-րդ հարկ՝ զենքը ձեռքին բռնած վիճակում:

Երկրորդ հարկում արդեն, ինչպես նկարագրված է datalex.am-ում, Թորոսյանը նայել է շուրջբոլորը, որևէ մեկին չի տեսել, որ հարցներ գրասենյակի տեղը, նայել է նաև սենյակների դռների մոտ փակցված ցուցանակները, որպեսզի գտնի գրասենյակը, և նույն պահին մի տղամարդու ձայն է լսել առաջին հարկից և կրկին իջել այնտեղ: Այդ տղան ներկայացել է որպես բիզնես կենտրոնում գործող մարզասրահի աշխատակից, եւ Թորոսյանը նրանից պահանջել է ուղեկցել Ռոբերտ Քոչարյանի գրասենյակ: Երբ այդ տղան իրեն ասել է, որ Քոչարյանի գրասենյակի մուտքը մյուս կողմից է, զենքը, ուղղելով դեպի նրա կրծքավանդակի ուղղությամբ, պահանջել է, որ նստի ընդունարանի աղջկա տեղը: Ըստ մեղադրանքի՝ այդ տղան պահի լրջությունը չի հասկացել, առանց պատասխանելու քայլել է, եւ հենց այդ պահին Թորոսյանը մեկ անգամ էլ է իր զենքով կրակել առաջին հարկի բազմոցի և սյան ուղղությամբ, որից հետո այդ տղան նստել է ընդունարանի աշխատակցուհու տեղում:

Դրանից հետո Թորոսյանը նրան ասել է. «Դու պատանդի կարգավիճակում էս, իմացի պահի լրջությունը» և նստած վիճակում զենքը, պահելով նրա ուղղությամբ, պահանջել է նրանից, որ իր մոտ կանչի Ռոբերտ Քոչարյանի գրասենյակի ղեկավարին: Այդ ընթացքում նույն տղամարդն ինչ-որ հեռախոսազանգեր է կատարել, հետո իրեն ասել, որ չեն կարողանում գտնել, կամ գրասենյակը փակ է, բայց ինքը կրկին պահանջել է, որ կանչի իր մոտ Ռոբերտ Քոչարյանի գրասենյակի ղեկավարին՝ Վիկտոր Սողոմոնյանին, միաժամանակ՝ նաեւ ոստիկաններին, որպեսզի բանակցի նրանց հետ:

Ցուցմունք տալով՝ Թորոսյանը պատմել է, որ մինչ ոստիկանների գալն այդ տղամարդն իրեն հորդորել է, որ պետք չէ այդ արարքը կատարել, ինքն էլ նրանից պահանջել է հետևել իր հրահանգներին: Որոշ ժամանակ անց նկուղային հարկից բարձրացող աստիճանների կողմից լսել է ձայներ: Այդ անձինք ներկայացել են ոստիկանության աշխատակիցներ, նրանք հարցրել են իր անունը, եւ թե որտեղից է, ինքն էլ կրկին նշել է իր պահանջը Վիկտոր Սողոմանյանին կանչելու վերաբերյալ՝ ասելով, որ պատանդ ունի, որին կազատի միայն Սողոմոնյանին կանչելուց հետո: Թորոսյանը միաժամանակ պահանջել է ոստիկաններից, որ մեկը բարձրանա իր մոտ՝ դեմքը տեսնի բանակցի:

Իր հետ բանակցող ոստիկանը հարցրել է, թե ինչու է պահանջում Վիկտոր Սողոմոնյանին, եւ ինքն էլ պատասխանել է, որ դա խիստ անձնական է, ու դրանից հետո իրեն ասել են. «Լավ, մի րոպե սպասիր, ճշտում ենք»: Մի քանի րոպե անց ասել են, որ հնարավոր չէ կանչել Սողոմոնյանին, բայց հայտնել են, որ ոստիկանապետն է եկել, և զենքը վայր դնելու դեպքում կապահովեն իր անվտանգությունը, և ինքը կկարողանա հանգիստ զրուցել ոստիկանապետի հետ՝ իր պահանջը ներկայացնելով: Համաձայնելով ոստիկանների առաջարկին՝ Թորոսյանը պատմել է, որ զենքը հենել է պատին, եւ այդ նույն պահին ոստիկանապետը բարձրացել է իր մոտ, որից հետո նրա հետ խոսելով՝ երկուսով քայլել են դեպի սրահում գտնվող բազմոցի մոտ և նստել, զրուցել, իսկ թե ուր է գնացել իր պատանդ վերցրած անձը, չի տեսել: Թորոսյանն ասել է, որ հրաժարվել է նրան պատանդ պահելու իր պահանջից ոստիկանապետի ժամանելուց հետո, իսկ ոստիկանապետի հետ զրուցելուց հետո նրան ասել է, թե ինչու է պահանջում, որ իր մոտ կանչեն Վիկտոր Սողոմոնյանին:

Ըստ Թորոսյանի՝ ինքը ցանկանում էր Վիկտոր Սողոմոնյանին պատանդ վերցնելուց հետո պահանջել, որ նա կանչի Ռոբերտ Քոչարյանի որդուն՝ Սեդրակ Քոչարյանին, որպեսզի նա իրեն բացատրի, թե ինչու են իրեն չիպավորել՝ ծրագրավորել: Թորոսյանը ասել է, որ դա անբացատրելի երևույթ է, ինքը չի կարող բացատրել, թե ինչպես են նրանք իրեն աստիճանաբար ծրագրավորել: Նշել է նաև, որ հնարավոր էր՝ ինքը կյանքից զրկեր Սեդրակ Քոչարյանին՝ կախված նրանից, թե ինչ բացատրություն էր տալու Սեդրակն իրեն չիպավորելու հետ կապված: Ոստիկանապետի հետ խոսելուց հետո նրա ուղեկցությամբ գնացել են ոստիկանություն:

Թորոսյանը նշել է նաեւ, որ ի սկզբանե նպատակ չի ունեցել որսորդմիության անդամ դառնալու, ուղղակի զենքը ձեռք է բերել՝ իր ծրագիրն իրագործելու համար: Նշենք, որ, ըստ datalex.am-ի, նա ձեռք է բերել «Սայգա» տեսակի 12 տրամաչափի երկարափող հրազեն և 1 տուփ 12 տրամաչափի փամփուշտներ 2020 թվականի հունվարի 8-ին:

Նախաքննությամբ պարզվել է նաեւ բիզնես կենտրոնի հիշյալ աշխատակիցների ինքնությունը, որոնք ճանաչվել են տուժողներ եւ տվել նույնաբովանդակ ցուցմունքներ դեպքի վերաբերյալ:

Տպել
805 դիտում

Վանաձորում մեքենան բախվել է շինության պատին. վարորդը տեղում մահացել է (լուսանկարներ)

ՍԱՏՄ-ն գյուղատնտեսական մի քանի շուկաներում խախտումներ է արձանագրել. տվյալները կներկայացվեն պարետատուն

Տեսչական մարմնի աշխատակիցները կրկնակի այց և մշտադիտարկում են իրականացրել Երևան երկաթուղային կայարանում

Ոստիկանությունն արգելափակել է Ղալթաղչիի Սուրբ Հովհաննես մատուռ տանող ճանապարհները

Վրաստանը մեզ համար եղբայրական երկիր է, և շատ ջերմացնում է մեզ նման պատրաստակամությունը. վարչապետ

Ռեվանշիստները հիմա էլ ուրի՞շ «պլացդարմ» են փնտրում

Նախատեսված է 100.000 հայկական թեստի արտադրություն. ՄԿԻ-ն ավարտել է լաբորատոր փորձարկումները

358 պացիենտ գտնվում է ծանր, 58-ը՝ ծայրահեղ ծանր վիճակում. Նիկոլ Փաշինյան (տեսանյութ)

Առաջին դասարանցիների առցանց գրանցումը կսկսվի հունիսի 1-ից

Ունենք քաղաքական կամք՝ ֆիզիկական անձանց եկամուտների համատարած հայտարարագրում ներդնելու համար. վարչապետ

Ոստիկանները պարզել են Իջևանում կրակոցներ արձակած անձի ինքնությունը. ոստիկանություն է ներկայացել 42-ամյա տղամարդ

Արմավիրի նախկին քաղաքապետն ապօրինաբար 75 տարով տարածք է հատկացրել ՀՀ ֆուտբոլի ֆեդերացիայի նախկին նախագահին (տեսանյութ)

Պարետի որոշմամբ 24 ժամով արգելվել է 24, և 48 ժամով՝ 2 տնտեսվարողի պատկանող մասնաճյուղերի գործունեությունը

Արցախի նախագահը 2020 թվականի ամառային զորակոչ անցկացնելու եւ զորացրում կատարելու մասին հրամանագիր է ստորագրել

ՊԲ-ում այսօր սանիտարական օր է. ախտահանվել են զորանոցները, բուժկետերը, կենցաղային նշանակության շինությունները(տեսանյութ)

Դելի-Երևան հատուկ չվերթով Հայաստան է ժամանել ՀՀ 23 քաղաքացի, Հնդկաստան է վերադարձել 130 հնդիկ ուսանող

Համավարակը սահման և ազգություն չի ճանաչում. այն ազդեցություն է թողել յուրաքանչյուրիս վրա. Մհեր Գրիգորյանն ուղերձ է հղել

Հասարակության «լրջության կորագիծը»

Մոսկվա-Երևան չարտերային հերթական թռիչքը կկայան վաղը՝ մայիսի 31-ին՝ «Դոմոդեդովո» օդանավակայանից

Սեպտեմբերին մենք կարող ենք դասերը լիարժեք սկսել, սակայն պետք է խստագույնս հետևենք ցուցումներին. ԿԳՄՍ նախարար (տեսանյութ)