Չափազանց Էական է ձեւավորել փաթեթային շրջանակ. ՀՀ ԱԳ նախարարը՝ Լավրովի հայտարարության և ԼՂ հարցով բանակցությունների մասին

«Չի կարող որեւէ մեկը սպասել, որ Հայաստանը Արցախի հարցով բանակցություններում կատարի որեւէ քայլ, որը համադրելի չէ, որը ենթադրում է զիջում եւ վնասում է մեր ազգային անվտանգությանը». այսօր Ազգային ժողովի արտաքին հարաբերությունների հանձնաժողովում հրավիրված նիստում պատգամավորների՝ իրեն ուղղված հարցերին ի պատասխան՝ պարզաբանեց ՀՀ արտգործնախարար Զոհրաբ Մնացականյանը:

Պատգամավորների խնդրանքով անդրադառնալով ՌԴ արտգործնախարար Սերգեյ Լավրովի այն հայտարարությանը, թե ղարաբաղյան հարցով բանակցություններում ներկայումս ակտիվորեն քննարկվում է մեկ տարի առաջ առաջարկված փուլային տարբերակը՝ նախարարն ասաց, որ շատ էական է՝ մնալ սառնասիրտ եւ հանգիստ:

Ըստ նրա՝ շատ հրապուրիչ է մանավանդ ներքին դաշտի համար գունավոր ձեւերով ներկայացնել ինչ-որ բաներ, բայց այն, ինչ ասում են, ավելի քան հստակ է: Նախարարն ասաց, որ Լավրովի հայտարարությունից հետո արձագանքներ եղել են, այժմ կարիք չկա ավելի փորփրել այդ ամենը, պետք է շարունակել աշխատել:

«Ես որեւէ կերպ չեմ ներգրավվելու այն մրցակցության մեջ, թե ով է ավելի շատ հայրենասեր, ով՝ քիչ: Երբ որ մենք ներգրավված ենք բանակցություններում, առավել քան լուրջ ենք այն հարցերի շուրջ, որոնք Հայաստանի գերակայությունն են: Ղարաբաղի ժողովրդի անվտանգությունը մենք բերել ենք առաջ՝ որպես կարեւորագույն խնդիր: Այն, ինչ գոյություն ունի այսօր, դա անվտանգային համակարգ է»,- ընդգծեց Մնացականյանը:

Նախարարը բացառեց, որ հնարավոր է բանակցությունների ընթացքում մի բան խոսել, որը չի համապատասխանում հրապարակային ասվածին:

«Այդ ամենը ո՛չ արտգործնախարարներն են պայմանավորվելու, ո՛չ էլ ղեկավարները, այլ հասարակությունները եւ ժողովուրդները: Ես ինձ շատ ամուր եմ զգում, որ իմ մանդատը, որպես բանակցողի, բխում է մեր կառավարության մանդատից, եւ կառավարության մանդատը բխում է ժողովրդի մանդատից: Սա առավել քան ամրացնում է մեր դիրքերը բանակցային գործընթացում: Եթե որեւէ մեկը կա, որ հնարավոր է համարում դա, ուրեմն դա նույնիսկ մեկնաբանության ենթակա չէ, որովհետեւ դա բացարձակ հիմարություն է»,- շեշտեց ՀՀ արտգործնախարարը:

Դիմելով պատգամավորներին՝ նա ասաց, որ եթե հարցնում են, թե Հայաստանի դիրքորոշումները ընդունե՞լ են բանակցության մասնակիցները, ապա այդ դեպքում հարցը շուտվանից լուծված կլիներ: Նույնը, ըստ նրա, վերաբերում է Ադրբեջանի դիրքորոշումներին:

Նախարարը ընդգծեց՝ մեկ բան հստակ է. Հայաստանը բացառում է սպառնալիքի գործոնը բանակցային  գործընթացում:

Անդրադառնալով հարցին՝ ի վերջո Հայաստանի համար ընդունելի է խնդրի կարգավորման փուլայի՞ն, թե՞ փաթեթային տարբերակը՝ նախարարն ասաց, որ էական է ձեւավորել փաթեթային շրջանակ, որտեղ պարտավորությունները հստակ են:

«Կար մի գործընկեր, որն ասում էր՝ մենք համաձայն ենք փուլային տարբերակի. առաջին փուլում ստատուսն է որոշվում, հետո՝ մնացածը: Մեզ համար էական է ձեւավորել փաթեթային շրջանակ, որտեղ պարտավորությունները արտահայտված են, շոշափելի են, վեարհսկվում են: Եթե ենթադրվում է փուլային տարբերակ, որտեղ մի կողմը սկսում է իրականացնել իր պարտավորությունները ավելի մեծ չափով եւ չի ստանում համադրելի պատասխան քայլ պարտավորություն մյուս կողմից, ինքը խարխլում է իր անվատանգային դիրքերը բանակցությունների մեջ, եւ նման իրականացումը անհնար է»,- ասաց ԱԳ նախարարը:

ԲՀԿ պատգամավոր Արման Աբովյանը Մնացականյանի պատասխանից հետեւյալ եզրակացությանը եկավ. «Մենք ֆիքսում ենք շատ կարեւոր մի պահ, որ հայկական կողմի համար էական չէ փաթեթային, թե փուլային տարբերակը, էական է համադրելիության եւ բալանսի պահպանումը»: ԱԳ նախարարը համաձայնեց պատգամավորի այդ ձեւակերպմանը: 

Նախարարին հարց ուղղվեց նաեւ գազի գնի շուրջ Ռուսաստանի հետ տարվող բանակցությունների մասին եւ շանտաժի տարրեր պարունակող այն դիրքորոշման մասին, որոնցում ակնարկվում էր Հայաստանում ռուսական Հարավկովկասյան երկաթուղիներ ընկերության շուրջ եղած դատական գործընթացը:

Մնացականյանն ասաց, որ Հայաստանը Ռուսաստանի հետ ունի դաշնակցային հարաբերություններ, որի օրակարգը չափազանց ընդարձակ է: Ըստ նրա՝ գազի հարցը Հայաստանի համար չափազանց էական նշանակություն ունի, ուստի ՌԴ հետ շարունակելու են քննարկել այդ հարցը: