Առաջին ալիքի թիմը պատրաստ է մասնագիտական պատասխանատվություն կրել միայն իր գործառույթների համար. հայտարարություն

Հանրային հեռուստաընկերությունը աշխատել և աշխատում է ապահովել անխափան եթեր ու այն հասանելի դարձնել բոլորին: Առաջին ալիքի թիմը պատրաստ է մասնագիտական պատասխանատվություն կրել միայն իր գործառույթների համար:

Այս մասին քիչ առաջ հայտարարություն է տարածել Հանրային հեռուստաընկերությունը: հայտարարության մեջ նշվում է.

«Հանրային հեռուստաընկերության աշխատակազմը խորապես ցավում է համացանցում ՀՀ վարչապետ Նիկոլ Փաշինյանի՝ ուղիղ եթերի նախապատրաստման կադրերի օգտագործմամբ հոլովակի տարածման կապակցությամբ:

Հանրային հեռուստաընկերության աշխատակազմը խորապես ցավում է համացանցում ՀՀ վարչապետ Նիկոլ Փաշինյանի՝ ուղիղ եթերի նախապատրաստման կադրերի օգտագործմամբ հոլովակի տարածման կապակցությամբ:

Արտակարգ դրություն հայտարարելուց անմիջապես հետո Հանրային հեռուստաընկերությունը, ՀՀ կառավարության հորդորով, նույն բաց կապուղով, նույն պայմաններով, չափանիշներով և ընթացակարգերով ապահովել է 50-ից ավելի անխափան ուղիղ միացումներ: Այս հանգամանքն արդեն իսկ փաստում է հեռուստաընկերության արհեստավարժ և համակարգված աշխատանքի մասին:

Սույն թվականի ապրիլի 17-ին, ժամը 20:00-ին ՀՀ վարչապետ Նիկոլ Փաշինյանի ելույթը հեռարձակվել է բաց կապուղով, որին հասանելիություն են ստացել ևս 8 հեռուստաընկերություն և ՀՀ կառավարության պաշտոնական կայքէջը:

Ինչ վերաբերում է ուղիղ եթերում ՀՀ վարչապետի ելույթներին՝ ընդգծենք, որ վարչապետի հետ ուղիղ աշխատանքը վերապահված է ոչ թե Հանրային հեռուստաընկերության աշխատակիցներին, այլ վարչապետի աշխատակազմին:

Ինչպես նախկինում, այս դեպքում էլ ուղիղ եթերից առաջ տրամադրվել է բաց կապուղի ՀՀ կառավարության հորդորով, որից րոպեներ առաջ կատարվել է կապուղու փորձարկում, որպեսզի հեռարձակող հեռուստաընկերությունները կարողանան ստուգել հնարավոր խնդիրները և լուծել դրանք»:

Հայտարարության մեջ նաեւ ասվում է, որ եթերից առաջ հեռուստաընկերության աշխատակիցը ներկաներին բարձրաձայն տեղեկացրել է, որ սեղմված է Rec-ի կոճակը, ինչը նշանակում է՝ ձայնագրման փուլում են: Սա պարտադիր ընթացակարգ է:

«Նկարահանման ամբողջ ընթացքին ներկա են եղել ինչպես վարչապետի խոսնակը, այնպես էլ տեղեկատվական վարչության աշխատակիցները: Հեռուստաընկերության որևէ աշխատակից առանց հատուկ ցուցման կամ թույլտվության չի կարող թողնել իրեն վստահված տեղը:

Այս պարագայում շահարկվող «արտահոսք» բառը մասնագիտորեն տեղին չէ, քանի որ բաց կապուղով տրամադրվող նյութը, ինչպես նշված է, հասանելի է եղել նախապես հայտարարված 8 հեռուստաընկերություններին և ՀՀ կառավարության պաշտոնական կայքէջին:

Հանրային հեռուստաընկերությունը աշխատել և աշխատում է ապահովել անխափան եթեր ու այն հասանելի դարձնել բոլորին: Առաջին ալիքի թիմը պատրաստ է մասնագիտական պատասխանատվություն կրել միայն իր գործառույթների համար»:

Հիշեցնենք, որ սա Հանրայինի եկրորդ հայտարարությունն է:

Նշենք, որ համացանցում են հայտնվել ՀՀ վարչապետի՝ հեռուստաալիքներով հղած ուղերձից առաջ տարված նախապատրաստական աշխատանքների կադրերը, որոնցում վարչապետը հազում է, ջուր խմում:

Վարչապետը ուղիղ եթերով ուղերձով ՀՀ քաղաքացիներին էր դիմել ապրիլի 17-ին՝ ժամը 20:00-ին, խոսել էր Հայաստանում կորոնավիրուսով պայմանավորված իրավիճակի մասին, հեռարձակումն ապահովել էր Հանրային հեռուստաընկերությունը:

Այդ տեսանյութը երեկ երեկոյան համացանցայաին բուռն քննարկումների առիթ էր դարձել, եւ քաղաքացիները հենց Հանրայինին էին մեղադրում կադրերի արտահոսքի համար:

Այս կապացությամբ Առաջին ալիքի էջում ավելի ուշ պարզաբանում տարածվեց, որտեղ նշվում էր, որ ՀՀ վարչապետի ելույթի տեխնիկական փորձից կադրերը, որոնք արվել և արվում են բոլոր ուղիղ եթերներից առաջ, նախատեսված չեն եղել հեռարձակման համար: ՀՀ Կառավարության հորդորով՝ Հանրային հեռուստաընկերությունն ապահովել է բաց կապուղի, որից օգտվել են նշված հեռուստաընկերությունները.

1. Արմենիա ԹիՎի
   2. Շանթ
   3. Միր
   4. Հ2
   5. ԱՐ
   6. Կենտրոն
   7. Երկիր Մեդիա
   8. 5-րդ ալիք

Այսինքն ՀՀ Վարչապետի եթերը վերահեռարձակող բոլոր հեռուստաընկերություններն էլ ստացել են այդ տեխնիկական տեսաազդանշանը: Հանրային հեռուստաընկերությունից որևէ տեսանյութի արտահոսք չի եղել:

Այս ամենի կապակցությամբ առավոտյան ֆեյսբուքյան իր էջում գրառում էր կատարել վարչապետի մամուլի քարտուղար Մանե Գեւորգյանը՝ նշելով, Հանրային հեռուստաընկերության կողմից վարչապետի աշխատակազմի հորդորով վարչապետի ուղերձը բաց կապուղիով մյուս հեռուստաընկերություններին տրամադրելն ամենևին էլ չի նշանակում, որ հեռուստաընկերությունը պետք է բաց կապուղի ապահովեր` սկսած նախապատրաստական աշխատանքներից: Ըստ Գեւորգյանի գրառման, մյուս հեռուստաընկերություններին բաց կապուղի պետք է հաղորդվեր եթերից բացառապես վայրկյաններ, այլ ոչ 5,10,15 կամ 20 րոպե առաջ։