Մենք ուզում ենք, որ մեր տնտեսության արյունատար համակարգը սկսի աշխատել․ վարչապետ

Կորոնավիրուսի տնտեսական հետեւանքների չեզոքացման առաջին փաթեթը 4 միջոցառում է նախատեսում: Այս մասին այսօր ՀՀ կառավարության նիստում հայտարարեց Էկոնոմիկայի նախարար Տիգրան Խաչատրյանը, որը ներկայացրեց փաթեթը:

Նրա խոսքով՝ առաջին միջոցառումն ամենալայնն է, որը վերաբերում է բոլոր ֆիզիկական ու իրավաբանական անձանց, որեւէ ոլորտային սահմանափակում չկա:

Բացառություն են կազմում միայն բանկերը, վարկային կազմակերպությունները, գրավատներն ու ապահովագրական կազմակերպությունները. «Կա միայն մեկ պայման. նրանք պետք է ունենան լավ վարկային պատմություն: Նրանք կարող են կառավարության աջակցությունից օգտվելու համար դիմել բանկերին ու վարկային կազմակերպություններին: Առավելագույն ֆինանսավորման չափը կարող է լինել մինչեւ 500 մլն դրամ: Սա ենթադրում է նպատակային ֆինանսավորում: Այսինքն՝ այս եղանակով տրված ֆինանսական աջակցությունը կարող է օգտագործվել, եթե կազմակերպությունը այդ միջոցները վերցնում է, որպեսզի վճարի աշխատակիցներին աշխատավարձ երեք ամիսների համար, բայց ոչ ավելի, քան յուրաքանչյուր աշխատակցին 500 հազար դրամ»:

Նախարարն ասաց, որ երկրորդ տարբերակն այն է, որ այս միջոցներն օգտագործվում է հարկային պարտավորությունները կատարելու համար:

«Երրորդ, եթե այս միջոցներն օգտագործելու է այնպիսի հումք ձեռք բերելու համար, որը պետք է օգտագործվի ՀՀ-ում իր արտադրությունը սպասարկելու նպատակով:

Չորրորդ, եթե այնպիսի սարքավորումներ է օգտագործում, որոնք պետք է ներկրվեն իր արտադրական նպատակներով, եթե վճարում է կոմունալ ծառայությունների համար: Ըստ էության՝ մենք առեւտրային գործունեության համար մեկ ոլորտ ենք թույլ տվել, որ նույնպես օգտվի այս աջակցությունից: Դա այն դեպքն է, եթե սննդամթերք է ներկրվում»,- ասաց նախարարը:

Խաչատրյանը նշեց, որ 3 եղանակ կա, որ կառավարությունն աջակցում է ֆինանսապես. «Դրանցից մեկը դրամական աջակցությունն է ֆինանսավորմանը: Այսինքն՝ եթե բանկը համարում է, որ այդ ծրագիրն արժանի է ֆինանսավորման, կառավարությունը հատկացնում է իր բաժինը: Եթե վարկը վերցվել է աշխատավարձ վճարելու համար կամ հարկեր տուրքեր վճարելու համար, ապա կառավարության համաֆինանսավորումը կարող է կազմել վարկի 50 տոկոսը: Եթե հումքի ձեռքբերման նպատակով է, ապա կառավարության համաֆինանսավորումը կարող է կազմել առավելագույնը վարկի 40 տոկոսը, եթե սարքավորումներ ձեռքբերելու համար է, մինչեւ 25 տոկոսը, կոմունալ վճարումների համար՝ 45 տոկոսը, եւ եթե սննդի ներկրման նպատակով է վարկը, ապա՝ 30 տոկոս»:

Նախարարի խոսքով՝ որոշ դեպքերում կառավարությունը կարող է սուբսիդավորել վարկի տոկոսները: Իսկ եթե խոսքը աշխատավարձեր, հարկեր վճարելու մասին է, ապա կառավարությունը զրոյացնում է բոլոր տոկոսները, այսինքն՝ ամբողջությամբ սուբսիդավորում է դրանք:

Վարչապետ Նիկոլ Փաշինյանը նախագծի վերաբերյալ ասաց, որ այդքան էլ համաձայն չէ, թե բանկային եւ ֆինանսական համակարգին չեն աջակցում, քանի որ ծրագրի արտապատվիրակումը դեպի այդ համակարգ արդեն աջակցություն է. «Այսօր բանկային համակարգը զրոյական վիճակում է, եւ իրենք էլ խնդիր ունեն ֆինանսներ տեղաբաշխելու: Այս որոշման ամենամեծ տրամաբանությունը հետեւյալն է․ մենք ուզում ենք, որ մեր տնտեսության արյունատար համակարգը սկսի աշխատել եւ որքան հնարավոր է, մեծ ծավալով աշխատի: Սոցիալական բաղադրիչները շատ կարեւոր են, մենք ասում ենք, որ աշխատողների աշխատավարձերը վճարելու համար ենք նաեւ այս վարկերը տալիս, հարկերի ու տուրքերի վճարման համար ենք այս փաթեթը բացում, եւ կարծում եմ, որ ճիշտ ճանապարհով ենք գնում: Մենք ոչ թե զուգահեռ օրգանիզմներ պետք է ստեղծենք՝ գոյություն ունեցող օրգանիզմը դատապարտելով մահվան, այլ պետք է գործող օրգանիզմի կենսունակությունն ապահովելու ճանապահով գնանք»։

Վարչապետն ընդգծեց՝ 2 գործիք են կիրառել. տոկոսները սուբսիդավորում են եւ ամենաթիրախավորված հատվածում զրոյացնում վարկի տոկոսները, մնացած դեպքերում էականորեն իջեցնում են. «Երկրորդ գործիքը հետեւյալն է․ քանի որ շուկան շատ վատ վիճակում է, բանկերը կարող են հակված չլինել այդպիսի վարկավորում տալու, եւ որպեսզի բանկերին խթանենք, որ շահագրգռված լինեն, կառավարությունն ասում է, որ, ըստ ծրագրերի, աշխատավարձերի, հարկերի, տուրքերի դեպքում փողի 50 տոկոսն ենք տալիս, կոմունալ վճարի դեպքում փողի 45 տոկոսն ենք տալիս, հումքի դեպքում՝ 40 տոկոսը, սննդամթերքի ներկրման դեպքում՝ 30 տոկոսը»: