Քաղաքապետարանի մոտ ինքնահրկիզման փորձ կատարած Սայաթը 4 երեխա ունի. նա այդ քայլին դիմել է կուտակված վարձերի պատճառով

Երեւանի քաղաքապետարանի դիմաց երեք երեխաների ներկայությամբ ինքնահրկիզման փորձ արած 28-ամյա Սայաթ Հայրապետյանը այդ քայլին է դիմել բնակարանի վարձն ու կոմունալ ծախսերը վճարել չկարողանալու պատճառով: Սայաթն ապրում է Երրորդ մասում գտնվող սեփական տներից մեկում, ամուսնացած է, ունի 4 անչափահաս երեխա:

«Հայկական ժամանակին» հաջողվեց գտնել նրա վարձակալած բնակարանն ու զրուցել ընտանիքի անդամների հետ: Մեզ դիմավորեց Սայաթի կինը՝ 28-ամյա Արմինեն, որը զարմացած ու հուզված էր ամուսնու կատարած այդ քայլից: Ասաց՝ չի իմացել, որ նա նման մտադրություններ ունի, առավոտյան երեք երեխաներին վերցրել եւ արագ դուրս է եկել: Մեծը 8 տարեկան է, միջնեկը՝ 6, փոքրը՝ 4: Կրտսեր աղջիկը 8 ամսական է: Երեխաների մայրը պատմեց, որ արդեն երկրորդ ամիսն է՝ չեն կարողացել վճարել տան վարձը, ինչի պատճառով տան տերը մեկ օր ժամանակ է տվել այն ազատելու համար: Վարձավճարի հետ մեկտեղ պահանջում է կոմունալ վճարների բոլոր կտրոնները, որոնք ոչ բոլորն են այս պահին վճարված:

Ընտանիքի ընդհանուր պարտքը մոտ 200 հազար դրամ է: Մեր այցելության պահին անջատված էր Հայրապետյանների գազը, տունը ցուրտ էր, մանկահասակ աղջիկն արթուն էր օրորոցի մեջ, իսկ երեք արու զավակները վազվզում էին առանձնատան փոքրիկ այգում: Արմինե պատմեց, որ լույսի վարձը մի կերպ վճարել են, որ չանջատեն, գազի համար գումարը չի բավականացրել: «Գազ չկա, մի քանի կարտոշկա մաքրեցի այս փոքր պլիտային դրեցի, բայց առավոտից չի եռացել», -կես-կատակ, կես-տխուր ասաց Արմինեն:

Նշեց, որ ամուսինը միշտ էլ նորմալ աշխատել է: Պարզապես ծանր ֆիզիկական գործեր չի կարողանում անել: Սայաթը տաքսու վարորդ է: Բարեկամներ ունեն, բայց, ինչպես երիտասարդ տանտիկինը նկատեց, ամեն մեկն իր հոգսերն ու խնդիրները ունի, չեն կարող ամեն անգամ ինչ-որ մեկից օգնություն խնդրել: Սայաթը մայր ունի, որը իրենց հետ է ապրում, սակայն այդ պահին տանը չէր: Արմինեի խոսքով՝ նա հիվանդ է, չի կարողանում աշխատել:

«Ծախսերը շատ-շատ են, երկու երեխաներս դպրոցական են, փոքրս մանկապարտեզ է գնում: Ի՞նչ ենք արել, խնդրել ենք թաղապետարանից, որ մի փոքր ներողամիտ գտնվեն ու մեզ աջակցեն: Հույս ունեինք տանտերը կսպասի մի փոքր, թաղապետարանից էլ խոստացել էին, բայց որ առավոտյան զանգեցին ասեցին ոչնչով չեն կարող օգնել, ամուսինս կատաղած երեխեքին վերցրեց ու գնաց: Հետո զանգեց ասեց թաղապետարանում ոչինչ էլ չի լուծվում, գնում է քաղաքապետարան»,- պատմեց նա:

Արմինեն կատարվածի մասին ոստիկաններից է իմացել, որոնք պատասխանել են ամուսնու հեռախոսահամարին: Ասաց, որ երեխաները վախեցել են: «Մեծս ու միջնեկս շատ էին վախեցել, լալիս էին»,-պատմեց նա: Այդ պահին ներս մտավ միջադեպին ներկա երեխաներից փոքրն ու վրա բերեց՝ ես էլ էի վախեցել:

Երեք փոքր սենյակներ ունեցող այս տան մեջ պայմանները վատն էին, բայց երեխաները խնամված էին, մաքուր ու բավականին լավ հագնված: Մայրը թույլ չտվեց նկարել նրանց:

Պատրաստվում էինք դուրս գալ, երբ դռների մոտ հայտնվեց Սայաթ Հայրապետյանը: Նրա ձեռքին քաղցրավենիքներով տոպրակ կար, դրեց սեղանին ու մեզ հրավիրեց կողքի սենյակ զրուցելու: Սայաթը պատմեց, որ կատարվածից հետո իրեն տարել են նախ ոստիկանություն, ապա Նուբարաշենի հոգեբուժարան, հետո նորից ոստիկանություն եւ ապա քաղաքապետարան: Այդ ամենից հետո դուրս էր եկել մի քանի բան գնել երեխաների համար ու վերադարձել տուն:

Սայաթ, իսկապե՞ս մտադիր էիք ինքնահրկիզվել, թե սա ուշադրություն գրավելու հեշտ մեթոդ էր:

- Անկեղծ արդեն 4-րդ նմանատիպ հարցն է, որն ինձ այսօր տալիս են: Ես պատրաստվում էի ինքնահրկիզվել, բայց ոչ ինքնասպանության նպատակով, այլ այն բանի համար, որ ձայնս լսելի դարձնեմ: Ինչպես ուզում են, թող հասկանան, ինչ որակումներ ուզում են, տան իմ այս քայլին: Իրականությունը մեկն է. եթե միայն փետրվար ամսին 6 միլիարդ դրամ պարգեւատրում ստացած տվյալ հիմնարկը (քաղաքապետարանը) սովորական քաղաքացուն 2-3 րոպե լսելու եզրերը քոռացնում է, ապա ես կարող եմ այդ քայլին դիմել: Իսկ թե ես դրանից կմահանայի կամ հաշմանդամ կդառնայի, այդ պահին ինձ չէր հետաքրքրում:

Իսկ նախքան այդ քայլին դիմելը քանի՞ անգամ եք գնացել քաղաքապետարան եւ կոնկրետ ինչ խնդիր եք ներկայացրել, որ չի լուծվել:

- Բազմիցս: Խնդիրս մեկն է եղել՝ ես 9 տարի է՝ ամուսնացած եմ, Երեւանի բնակիչ եմ, միշտ ձմռանը խնդիրներ եմ ունեցել, բայց լուծելի է եղել, իսկ այս տարի չի ստացվում լուծել այդ խնդիրը: Ուրիշ ոչ մեկը չունեմ, միակ հույսս այն էր, որ իմ քաղաքի քաղաքապետը կաջակցի, այս ձմեռը կհաղթահարեմ կշարունակեմ իմ կյանքը: Խնդրանքս շատ փոքրիկ էր:

Ի՞նչ էր:

- Խնդրում էի, որ ինձ օգնեն այս երկու ամսվա տանս վարձն ու կոմունալները վճարեմ: Ամեն տարի խնդիր ունեցել եմ, բայց լուծելի է եղել: Այս տարի լուծել չկարողացա: Թող բարձր պաշտոն զբաղեցնող մեկն ինձ ասեր՝ չէ, չենք օգնում, թո՛ղ գնա, ես կգնայի: Բազմիցս սուտ խոստումներ են եղել, որոնք այդպես էլ չեն լուծվել:

Իսկ երեխաներին ինչու՞ տարաք ձեզ հետ: Արժե՞ր:

- Չէ, չարժեր: Մի 40 րոպե մտածում էի, երեխաներին ճանապարհեմ, ինչ անեմ, ոնց անեմ: Նեղվում էի արդեն վիճակից, մի քիչ երեխաներիցս հեռացա, նրանց մեջքի հետեւից էի ուզում... որ հեռու լինեմ...

Ինչն էր պատճառը, որ այս տարի չստացվեց հաղթահարել խնդիրները, ի՞նչն է փոխվել:

- Այս տարի Նոր տարվա շեմին ունեցա վթար եւ քանի որ մեքենայիս ապահովագրությունը տաքսու չէր, ապահովագրող ընկերությունը չփոխհատուցեց, ստիպված ինքս հանձն առա այդ գումարը փակել, այդպես էլ սկսվեց:

Ինչքա՞ն գումար էր:

- Մոտ 1 միլիոն դրամի կարգի: Արդեն 700 հազարը փակել եմ: Ձմեռվա միայն հունվար-փետրվար ամիսներն են, որ կաղում եմ, բայց երբեք այս ձեւով չէի ընկել: Գործն էլ թույլ էր, եթե այդ պարտքը չփակեի, նման խնդրի առաջ չէի կանգնի: Ով տաքսի է քշում, գիտի՝ ձմռան եղանակին գիշերները ժամը 9-ից 10-ից հետո կարելի է ձեռքերը լվանալ տուն գնալ:

- Օրական ինչքա՞ն եք վաստակում, եթե կարելի է իմանալ:

- Օր կա՝ 8 հազար դրամ, օր կա՝ 7, նայած:

- Իսկ այլ աշխատանքով երբեւէ զբաղվել եք:

-Չէ, ժամանակին փոքրիկ ինչ-որ գովազդային ընկերությունում գործակալ եմ եղել, բայց շատ շուտ դուրս եկա:

Միջնակարգ կրթութուն ունե՞ք:

- Այո, 10-ամյա: Կինս էլ հաշվապահական քոլեջ է ավարտել, բայց աշխատանքային փորձ չունի:

Որպես բազմազավակ ընտանիք պետությունից ինչքա՞ն գումար եք ստանում: Արդյո՞ք դա մի փոքր չի թեթեւացնում ֆինանասական բեռը:

- 45 հազար դրամ «Փարոս» ենք ստանում, 50 հազար փոքրիկիս համար ենք ստանում: Ուղղակի, որ գործ չկար, երեխայիս գումարից էի տալիս պարտքատերերին:

Լավ, հիմա ձեր այս քայլն օգնե՞ց: Քաղաքապետարանից մեզ ասել են, որ Խարբերդում ձեզ հողատարածք են առաջարկել:

- Ես հիմա քաղաքապետարանից եմ գալիս: Ինչ վերաբերում է Խարբերդին, ասեմ՝ իրենք շատ գեղեցիկ եռագույն են սարքում: Առավոտյան գնացի թաղապետարան, որ իմանամ ինչ կլինի: Փոխթաղապետն ինձ լսելուց հետո ասեց՝ մտքովս հենց նոր բան անցավ, ես քեզ համար Խարբերդում էժան տուն կգտնեմ: Տեղում զանգահարեց:

Էժան տուն վարձո՞վ: Այլ ոչ թե հողատարածք կամ այլ...

- Ոչ, ինչ հողատարածք: Վարձով տուն: Ինձ ասացին, որ ֆինանսական օգնություն չի լինի երբեւէ: Փոխքաղաքապետն ասաց՝ 5 րոպե սպասի աշխատասենյակում, ես չսպասեցի, դուրս եկա երեխաներիս հետ ու գնացի քաղաքապետարան: Հիմա եթե հնարավորություն լինի, կտեղափոխվեմ, որ դուրսը չմնամ: Բայց այստեղ ինձ շատ ավելի հարամար էր, եւ հետո երեխաների դպրոցի ու մանկապարտեզի հարցն էլ լուրջ թեմա է, որով պիտի զբաղվեմ: Ինձ խոստացել են լուծել ինչ-որ կերպ աջակցել: Հաստատ թուքումուրներ շատ կուտեմ:

- Ինչո՞ւ, որ երեխաներին տարել էիք ու նման քայլի էիք դիմել:

- Դե, նախ, տան տերը կասի, այն մյուս պարտքատերերը... Փոխթաղապետը խոստացել է տան տիրոջ հետ խոսել, որ մի քանի օր սպասի: Եթե Խարբերդում հարմար տարբերակ լինի՝ կտեղափոխվեմ, ամեն ինչի էլ պատրաստ եմ:

ՀԳ. Նախքան Սայաթ Հայրապետյանի տուն մեր այցը Երեւանի քաղաքապետարանի լրատվական ծառայությունից «Հայկական ժամանակին» հայտնել էին, որ այսօր նա որեւէ պահանջով քաղաքապետարան չի դիմել, պարզապես եղել է այդ տարածքում: Բայց նախապես մի քանի անգամ դիմել է կացարանի ու աջակցության խնդրով: Քաղաքապետարանից նաեւ հայտնել էին, որ Սայաթին Խարբերդում հողակտոր է առաջարկվել, սակայն վերջինս հրաժարվել է: «Նա ասում է, որ իր տան կոմունալ ծախսերն ու վարձավճարն էլ փակեք, նոր կորոշի՝ մնալ, թե չէ: Դրամական աջակցություն մեր կանոնադրությամբ նախատեսված չէ»,-հայտնել էին քաղաքապետարանից:

Տպել
3687 դիտում

«Գյումրի» ԲԿ-ի 29 աշխատակիցներ մեկուսացված են, կորոնավիրուսով հիվանդ որսորդի հետ շփված մարալիկցիները՝ ևս

Արցախում կառավարությունն ամրագրել է հյուրանոցային ավելի քան 80 համարներ, առանձնացվել են մեկուսացման տարածքներ

Վարակի տարածման ինտենսիվության գործակիցը գնահատված մոտ 2 արժեքից հաջողվել է նվազեցնել մինչև 1.4-ի

Չունեմ կորոնավիրուսային հիվանդություն, հիվանդանոցում կամ հյուրանոցում չեմ բնակվում. փոխնախարարի պարզաբանումը

Նոր Նորքի բազմաբնակարանները երեկվանից ախտահանվում են նոր, ավելի արդյունավետ սարքերով

Կոչ եմ անում չմասնակցել ընտրությունների երկրորդ փուլի քվեարկությանը․ Մասիս Մայիլյան

Ստեփանակերտի համեմատաբար խոշոր առևտրային սրահների տարածքներն ու մարդաշատ վայրերը ախտահանվել են

Տնտեսական բլոկի եւ կենտրոնական բանկի մասնագետների հետ քննարկում՝ վարչապետի գլխավորությամբ

Արցախ ներկրված նոր տեխնիկան ժամանակավորապես փոխանցվել է ՊԲ-ին՝ լրացուցիչ ախտահանման համար

Փլուզվել է ջրամբարի արտաքին պատը

Կորոնավիրուսի տարածման 7-օրյա կրկնապատկման տեմպը պահպանվում է. Արսեն Թորոսյան

Միասին ընթերցում ենք «Փոքրիկ իշխանը», Օր 2.ԿԳՄՍ նախարարն ուղիղ եթերում է

Քաղաքական խաղերի ժամանակը չէ

Թուրքիայի ԶՈՒ-ն 4 քուրդ զինյալի է սպանել Սիրիայի հյուսիս-արևելքում

Առողջապահության նախարարն այցելել է կորոնավիրուսի բուժմամբ զբաղվող բժշկական կազմակերպություններ

Վեհափառ Հայրապետն աղոթել է մխիթարության եւ բժշկության համար. դուրս է բերվել Աստվածամուխ Սուրբ Գեղարդը

Վրաերթ Արարատի մարզում․ 30 գառ տեղում սատկել է

Առաջիկա օրերին սպասվում է ձյան եւ անձրեւի տեսքով տեղումներ. կցրտի մինչեւ 10-12 աստիճանով

AC19 հավելվածն այլևս չի գործելու․ տվյալների բազաները տեղափոխվել են Covid-19 Armenia հավելված․ ՀՀ պարետ

Ուկրաինայի հայերը ֆինանսավորել են վիրուսաբանության լաբորատորիայի վերակառուցումը