Գյումրիում կլինի հստակ երիտասարդական քաղաքականություն. փաստաթուղթը կներկայացվի ավագանու նիստի քննարկմանը

Գյումրու քաղաքապետարանի եւ Գյումրու «Երիտասարդական նախաձեռնությունների կենտրոն» (ԵՆԿ) ՀԿ-ի համագործակցությամբ կայացել է «Գյումրու երիտասարդական քաղաքականության 2020-2029 թթ․ հայեցակարգի», ինչպես նաեւ «2020-2021 թթ․ ռազմավարության և գործողությունների ծրագրի» նախագծերի երկրորդ քննարկումը:

Հիշեցնենք, որ 2019թ. նոյեմբերի 26-ին նախագծերի առաջին քննարկումն անցել էր խիստ լարված մթնոլորտում, հնչել էին փոխադարձ մեղադրանքներ: Քննարկմանը ներկա երիտասարդները, երիտասարդական կազմակերպություններ ներկայացնող պատասխանատուները Գյումրու քաղաքապետարանի Մշակույթի եւ երիտասարդության հարցերի բաժնին մեղադրել էին քննարկումը դասերի ժամին կազմակերպելու, իրենց քիչ ուշադրություն դարձնելու մեջ: Նաեւ ձեռք էր բերվել պայմանավորվածություն բոլոր առաջարկությունները, կապված քննարկվող փաստաթղթերում փոփոխություններ եւ լրացումներ անելու հետ, ձեւակերպել, գրավոր տարբերակով ներկայացնել:

Հաշվի առնելով ստացված դիտողությունները՝ երկրորդ քննարկումն ավելի ուշ ժամի էր կազմակերպվել, սակայն այն ներկաների թվով զիջում էր առաջինին: Առավել տարօրինակը, սակայն այն էր, որ 2 ամիս անց որեւէ գրավոր առաջարկ ոչ մի կազմակերպության ու կառույցի կողմից չէր ներկայացվել: «Ընդամենը տեխնիկական շտկումներ են արվել»,- ՀԺ-ի հետ զրույցում ասաց նախագծի համահեղինակ, եւ այն կրկին քննարկման դաշտ բերած ԵՆԿ ՀԿ նախագահ Արթուր Նաջարյանը:

Ինչու՞ չեն ներկայացվել առաջարկներ: Նաջարյանը հարցի հստակ պատասխանը չունի: «Ինչպես փորձը ցույց է տալիս, մարդիկ սիրում են արտահայտվել բանավոր, խոսում են, կարիքները, խնդիրները ներկայացնում են, բայց երբ որ պետք  է հստակ առաջարկություն անեն, արդեն գրավոր տարբերակով ներկայանան, այդ քայլը չեն անում: Ես ինքս սրա վերաբերյալ իմ սուբյեկտիվ կարծիքն ունեմ: Շատերի համար դա ուղղակի խոսելու հիանալի հնարավորություն է ընդամենը, այլապես, եթե դու ունես ասելիք, հարց ես բարձրացնում , ապա պետք է նաեւ գրավոր առաջարկություն ներկայացնես, թե ինչպես ես տեսնում տվյալ իրավիճակի կարգավորումը, կամ ասենք խնդրի լուծումը: Մարդիկ չեն արել, կամ կարեւոր չեն համարել, կամ հանդիպումից հետո մտածել են, որ առաջարկությունն արդեն բանավոր ներկայացրել են, հերիք է»,- ասաց Նաջարյանը:

Անկախ առկա վիճակից, ավագանին առաջիկա նիստում կքննարկի ներկայացվող ռազմավարության փաստաթուղթը: Ընդունելու դեպքում, ըստ Արթուր Նաջարյանի, այն կարեւոր գործիք կդառնա Գյումրու քաղաքապետարանի համար: Այդ ռազմավարությամբ  Մշակույթի եւ երիտասարդության հարցերի բաժինը կունենա համակարգված գործողությունների ծրագիր, հստակ կիմանա, թե որ ամսին, որ օրը եւ որտեղ ինչ միջոցառումներ են պլանավորել իրականացնել Գյումրու երիտասարդական քաղաքականություն իրականացնող կազմակերպությունները:

«Այս  փաստաթուղթը քաղաքապետարանը կկարողանա օգտագործել նաեւ սուբսիդիաներ ստանալու համար: Այսինքն կունենա գործողությունների հստակ պլան, նախապես արդեն կհասկանա, որ որոշակի միջոցառումներ են պլանավորված, սակայն բյուջեում նախատեսված գումարը չի հերիքելու, հիմնավորված ձեւով կդիմի եւ կառավարությունից լրացուցիչ  գումար կստանա:  Մենք այս պահին օդի մեջ ենք խոսում, եւ քանի որ չունենք հստակ գործողությունների պլան, դա քաղաքապետարանին թույլ է դարձնում այդ հարցում: Ռազմավարությունը դրական գործիք է, որը քաղաքապետարանը կարողանալու է օգտագործել ի շահ երիտասարդների, ի շահ քաղաքի,- նշեց մեր զրուցակիցը:

Քննարկմանը ներկա  Գյումրու քաղաքապետի խորհրդական Հասմիկ Կիրակոսյանը նկատեց, թե ներկայացվող գործողությունների պլանը բավական ամբիցիոզ է, 50-ից ավելի քայլեր է նախատեսում: Արդյո՞ք հնարավոր է դրա իրականացումը: Ռազմավարական փաստաթուղթը մշակած կազմակերպության պատասխանատուի կարծիքով, սակայն, այն ոչ ամբիցիոզ չէ, իրականացման առումով էլ անհնար չէ, քանի որ ներկայացված քայլերի 70 տոկոսից ավելին Գյումրու քաղաքապետարանը մշտապես իրականացրել է: Ուղղակի դա արել է առանց համակարգման եւ տարերայնորեն: «Հիմա, երբ մենք այդ բոլորը հավաքել ենք մի տեղում, գրել մեկ փաստաթղթում, դրա համար էլ  քայլերի թիվը մեծ է թվացել, ինչն էլ  շատերի մոտ որոշակի մտավախություն ու ցայտնոտ է առաջացրել: Իրականում խնդիրներ չեն առաջանալու: Այս փաստաթուղթը լինելու է Գյումրու երիտասարդական քաղաքականության մեխը»,- ասաց Արթուր Նաջարյանը: