ՊԵԿ-ը հրապարակել է 1000 խոշոր հարկատուների ցանկը. առաջատարը «Գրանդ Տոբակո» ընկերությունն է

1.000 խոշոր հարկատուների՝ պետբյուջե վճարած հարկերի ծավալը 2019 թ. ամբողջ տարվա ընթացքում 2018-ի համեմատ աճել է 13%-ով՝ կազմելով 1 տրլն 61 մլրդ 188 մլն դրամ: 2018-ին այդ գումարը կազմել է 939.18 մլրդ դրամ: Այս մասին տեղեկանում ենք ՀՀ ՊԵԿ տրամադրած տվյալներից:

2017 թ.՝ հեղափոխությունից առաջ, 1.000 խոշոր հարկ վճարողները միասին վճարել էին 807 մլրդ 403 մլն դրամ: Այսինքն՝ 2 տարի անց նրանց վճարած հարկն աճել է 253 մլրդ 785 մլն դրամով կամ 31.4 տոկոսով:

2019-ի հունվար-դեկտեմբեր ամիսներին 10 խոշոր հարկատուները միասին պետական բյուջե են վճարել 257.3 մլրդ դրամ հարկ, ինչը նախորդ տարվա համեմատ ավելի է շուրջ 23 մլրդ դրամով կամ 10%-ով։

Նշենք, որ 2019 թ. ՊԵԿ-ն ընդհանուր առմամբ հավաքել է 1 տրլն 507.1 մլրդ դրամի չափով եկամուտ, որից 42.8 մլրդ-ը վերադարձվել է հարկ վճարողներին՝ ԱԱՀ-ի գծով նախկինում կուտակված պարտքի համար: Այսինքն՝ փաստացի հարկային եկամուտները կազմել են 1 տրլն 464.3 մլրդ դրամ: Հարկային եկամուտների աճը պայմանավորված է թե՛ ստվերի նվազմամբ, թե՛ բիզնեսների համար ստեղծվող ավելի բարենպաստ պայմաններով:

2019 թ. խոշոր հարկատուների ցանկում առաջատարի փոփոխություն է տեղի ունեցել. ամենաշատ հարկը վճարել է Վարդանյանների ընտանիքին պատկանող «Գրանդ Տոբակո» ընկերությունը, որի վճարած հարկերը 2019-ին կազմել են 57 մլրդ 49 մլն դրամ՝ նախորդ տարվա համեմատ աճելով 35.1 տոկոսով: 2018-ի նույն ժամանակահատվածում ընկերությունը պետական բյուջե էր վճարել 42 մլրդ 230 մլն դրամ:

Երկրորդ հորիզոնականում «Զանգեզուրի պղնձամոլիբդենային կոմբինատ»-ն է (2018-ին զբաղեցնում էր առաջին տեղը): ՓԲԸ-ն հունվար-դեկտեմբեր ամիսներին վճարել է 51 մլրդ 360 մլն դրամ հարկ, ինչը գերազանցում է ընկերության՝ 2018-ի նույն ժամանակահատվածի ցուցանիշը 0.5 տոկոսով: Նախորդ տարվա նույն ժամանակահատվածում ընկերությունը պետական բյուջե էր վճարել 51 մլրդ 93 մլն դրամ:

Ցուցակում երրորդը «Գազպրոմ Արմենիա» ընկերությունն է՝ 43 մլրդ 644 մլն դրամ վճարած հարկերով: 2018-ին ընկերությունը վճարել էր 40 մլրդ 75 մլն դրամ. նրանց վճարած հարկերն ավելացել են 8.9 տոկոսով:

Չորրորդը «Ինտերնեյշնլ Մասիս Տաբակ» ընկերությունն է՝ վճարած 19 մլրդ 223 մլն դրամ հարկերով: Նախորդ տարի ընկերությունը զբաղեցրել էր 9-րդ հորիզոնականը. վճարել էր 13 մլրդ 78 մլն դրամ: Վճարած հարկերն աճել են շուրջ 47 տոկոսով:

Հինգերորդը «Ջեյ Թի Այ Արմենիա» ընկերությունն է՝ 16 մլրդ 441 մլն դրամ հարկերով: Ընկերության վճարած հարկերը նախորդ տարվա համեմատ աճել են 17.6 տոկոսով:

Խոշոր հարկատուների վեցերորդ տեղում Բարսեղ Բեգլարյանին պատկանող «Ֆլեշ» ընկերությունն է՝ 15 մլրդ 990 մլն դրամ հարկերով: 2018-ին ընկերությունը վճարել էր 12 մլրդ 248 մլն դրամ հարկ: Այսինքն՝ աճը կազմում է 38.8 տոկոս:

Յոթերորդը «ՍիՓիԷս Օիլ» ընկերությունն է՝ 14 մլրդ 53 մլն դրամ: Այս դեպքում ունենք  հարկերի նվազում, ինչն ունի իր պատճառը: Ընկերությունը 2018-ին վճարել էր 18 մլրդ 403 մլն դրամ: Այս տարի ընկերությունը 2 մասի է բաժանվել՝ «Սիփիես Օիլ» եւ «Սիփիես Օիլ Քորփորեյշն»: Այս տարի այդ 2 ընկերությունների վճարած հարկերի հանրագումարը գերազանցում է 2018-ին վճարած հարկերին՝ ընդհանուր 19 մլրդ 37 մլն դրամ:

Սրան հաջորդում է «Ֆիլիպ Մորրիս Արմենիա» ընկերությունը՝ վճարած 13 մլրդ 700 մլն դրամ հարկերով: 2018-ին ընկերությունը վճարել է 13 մլրդ 546 մլն դրամ: Այսինքն՝ վճարած հարկերն աճել են 1.1 տոկոսով:

Ցանկի 9-րդ հորիզոնականում «Գեոպրոմայնինգ Գոլդ» ընկերությունն է՝ 13 մլրդ 665 մլն դրամ հարկերով: Ընկերության վճարած հարկերը 2018-ին ավելի շատ են եղել՝ 16 մլրդ 118 մլն դրամ: Այսինքն՝ վճարած հարկերը նվազել են 15.2 տոկոսով:

10-րդ խոշոր հարկատուն «Վեոն Արմենիա» ընկերությունն է՝ 12 մլրդ 238 մլն դրամ: 2018-ին ընկերությունը վճարել էր 3 մլրդ 789 մլն դրամ: Աճը կազմում է 222.9 տոկոս: 

Ստորեւ ներկայացնում ենք խոշոր հարկատուների 50-յակը.

11) «Հայաստանի էլեկտրական ցանցեր» - 12 մլրդ 211 մլն դրամ

12) «Ավտոներկրող -10» - 11 մլրդ 834 մլն դրամ

13) «Ակվիլոն թրեյդ» - 10 մլրդ 880 մլն դրամ

14) «Մտս-Հայաստան» - 9 մլրդ 888 մլն դրամ

15) «Ադամիում» - 9 մլրդ 745 մլն դրամ

16) «Արմենիա» միջազգային օդանավակայաններ 9 մլրդ 342 մլն դրամ

17) «Մաքս պետրոլ» - 9 մլրդ 81 մլն դրամ

18) «Յուքոմ» - 8 մլրդ 941 մլն դրամ

19) «Ամերիաբանկ» - 8 մլրդ 551 մլն դրամ

20) «Սիթի» - 7 մլրդ 832 մլն դրամ

21) «Ավերս» - 7 մլրդ 585 մլն դրամ

22) «Ալեքս էնդ հոլդինգ» - 6 մլրդ 910 մլն դրամ

23) «Ագբա Կրեդիտ Ագրիկոլ բանկ» - 6 մլրդ 718 մլն դրամ

24) «Գրանդ Մաստեր» ընկերություն - 6 մլրդ 385 մլն դրամ

25) «ՀԱԷԿ» - 6 մլրդ 327 մլն դրամ

26) «Գրանդ Քենդի» - 6 մլրդ 303 մլն դրամ

27) «Իմէքս գրուպ» - 5 մլրդ 915 մլն դրամ

28) «Գազպրոմ Արմենիա» ՓԲԸ «Տրանսգազ» - 5 մլրդ 772 մլն դրամ

29) «Մոբայլ Սենթր Արթ» - 5 մլրդ 707 մլն դրամ

30) «Կոկա-Կոլա Հելլենիկ Բոթլինգ Քամփնի Արմենիա» - 5 մլրդ 610 մլն դրամ

31) «Նատալի ֆարմ» - 5 մլրդ 438 մլն դրամ

32) «Բաղրամյան» - 5 մլրդ 262 մլն դրամ

33) «Վեոլիա ջուր» - 5 մլրդ 218 մլն դրամ

34) «Օնիրա քլաբ» - 5 մլրդ 206 մլն դրամ

35) «Սպայկա» - 5 մլրդ 167 մլն դրամ

36) «Սիփիես Օիլ Քորփորեյշն» - 4 մլրդ 983 մլն դրամ

37) «Հայբիզնեսբանկ» ՓԲԸ - 4 մլրդ 972 մլն դրամ

38) «Ինեկոբանկ» - 4 մլրդ 880 մլն դրամ

39) «Բարսիս» - 4 մլրդ 735 մլն դրամ

40) «Արդշինբանկ» - 4 մլրդ 631 մլն դրամ

41) «Արմենիան մայնինգ քոնթրաքթոր» - 4 մլրդ 385 մլն դրամ

42) «Վեգա ուորլդ» - 4 մլրդ 345 մլն դրամ

43) «Հարավկովկասյան երկաթուղի» - 4 մլրդ 342 մլն դրամ

44) «Վիէլվի Սենթր» - 4 մլրդ 46 մլն դրամ

45) «Դիսթրիմէքս» - 4 մլրդ 15 մլն դրամ

46) «Սաս-գրուպ» - 3 մլրդ 976 մլն դրամ

47) «Դեկորա-Գրուպ» - 3 մլրդ 964 մլն դրամ

48) «Թել-Սել» - 3 մլրդ 956 մլն դրամ

49) «Երեւանի կոնյակի գործարան» - 3 մլրդ 682 մլն դրամ

50) «Կոնվերս» բանկ - 3 մլրդ 604 մլն դրամ:

Հիշեցնենք, որ 2018-ին խոշոր հարկատուների 50-յակում էին գտնվում հանքարդյունաբերությամբ զբաղվող «Լիդիան Արմենիա» եւ «Թեղուտ» ընկերությունները, սակայն 2019-ին նրանք էականորեն ավելի քիչ հարկեր են վճարել: «Լիդիան»-ը 2018-ին վճարել էր 4 մլրդ 715 մլն դրամ հարկ, դրանից հետո նախատեսված էր հանքի շահագործում, սակայն այն տեղի չունեցավ, ու նրանց վճարած հարկը 2019-ին կազմել է ընդամենը 407 մլն դրամ: Իսկ «Թեղուտ»-ի վճարած հարկերը գրեթե 2 անգամ նվազել են: 2018-ին վճարել էին 3 մլրդ 973 մլն դրամ, իսկ 2019-ին՝ 2 մլրդ: