Սպորտը պետք է լինի ապաքաղաքական. Արայիկ Հարությունյան

Հայկական սպորտն ապաքաղաքականացման կարիք ունի: Այս մասին այսօր՝ դեկտեմբերի 25-ին, ասաց ՀՀ Կրթության, գիտության, մշակույթի եւ սպորտի նախարար Արայիկ Հարությունյանը: Հայաստանի 2019թ. 10 լավագույն մարզիկների ընտրության քվեարկության ավարտից հետո նա պատասխանեց լրագրողների հարցերին՝ անդրադառնալով նաեւ այս թեմային:

- ՀՖՖ նորընտիր նախագահ Արմեն Մելիքբեկյանի հետ հանդիպման ժամանակ վարչապետ Նիկոլ Փաշինյանն ասել է, որ սպորտը ապաքաղաքականացվի եւ չօգտագործվի որեւէ անձի ինքնագովազդի կամ քաղաքական ուժի շահերի համար: Նման բան մեր սպորտում նկատո՞ւմ եք եւ ի՞նչ պետք է ձեռնարկ ի նախարարությունը:

- Ես էլ եմ առիթներ ունեցել դա հայտարարելու... Ես շատ ցավում եմ, որ որոշ խմբեր փորձում են սպորտն այս կամ այն ներքաղաքական զարգացումներում ներգրավել եւ շահարկել իրենց կապը տվյալ ֆեդերացիաների հետ: Ես առիթ եմ ունեցել Ենգիբարյանի դպրոցի հոբելյանական միջոցառման ժամանակ ասելու, որ մեր գլխավոր հանձնառությունն այս ոլորտն էլ ապաքաղաքականացնելն է, ինչպես մենք վճռականորեն արեցինք կրթության ոլորտում: Եվ որեւէ մեկը չի կարող ասել, որ այսօր կրթության ոլորտը ներգրաված է որեւէ քաղաքական զարգացման մեջ: Իհարկե որոշ խմբեր փորձում են հատկապես բուհերը վերադարձնել քաղաքական գործընթացների մեջ, բայց մենք դա նրանց թույլ չենք տա եւ այդ հաճույքը չենք պատճառի: Նույնն անելու ենք սպորտում: Այո՛, սպորտը պետք է լինի ապաքաղաքական, լինի ազատ, որպեսզի մենք ունենանք լավ արդյունքներ:

- Իսկ ինչպե՞ս է դա հնարավոր:

- Մեր կամքի: Մեր կամքը բավարար է դրա համար: Օրենքը, երբ աշխատի, փոխհարաբերությունը ֆեդերացիաների, մարզիկների հետ լինեն օրենքի, իրավունքի եւ արդարության սահմաններում, այդ իրավիճակը կհաստատվի:

- Լրագրողները եւ ֆեդերացիաների ներկայացուցիչները դժգոհում են այս ձեւաչափից՝ ավելի կոնկրետ SMS քվեարկություններից:

- Այդ բողոքները ես էլ եմ լսել: Մի մասն ասում են, որ այնուամենայնիվ մեր հայրենակիցներին պետք է նման հնարավորություն տա, ընդ որում նրանց ձայները որոշիչ չեն լինում, այսինքն՝ 1/3-րդ է ձայների, եւ ըստ էության 2/3-ը լրագրողներն են եւ մասնագետներն են ֆեդերացիաներից եւ ունեն որոշիչ փաթեթը: Բայց մենք հաշվի առնելով այդ բողոքները ամբողջ կարգը կվերանայենք եւ նաեւ մասնագետներ ու լրագրողների հետ քննարկելով կընտրենք լավագույն տարբերակը:

- Սպորտի գծով փոխնախարարի պաշտոնը թափո՞ւր է մնալու:

- Այս պահին թափուր է:

- Թեկնածու չկա՞:

- Այս պահին թափուր է:

- Նշեցիք կվերլուծեք խնդիրները եւ կփորձեք լավագույն տարբերակը գտնել, բայց դեռեւս նախորդ եւ դրանից առաջ էլ այս խնդիրը կար եւ լրջորեն քննարկվում էր: Ինչո՞ւ մինչեւ այդ այս խնդիրը չհարթվեց:

- Նախարարությունը դեռ մի քանի ամիս է, ինչ միավորվել է, եւ հաջորդ տարի մենք անպայման հաշվի կառնենք: Այլ մրցույթների հետ կապված էլ, որ անցկացրել է սպորտի նախարարությունը, ունենք վերապահումներ: Բոլորը կվերանայվեն:

- Լուրեր են շրջանառվում, որ ՀՀ հավաքականի կիսապաշտպան Հենրիխ Մխիթարյանը կարող է այլեւս հանդես չգալ հավաքականում: Նրա մայրը՝ Մարինա Թաշչյանը, լրատվամիջոցներից մեկին ասել է, որ նշել է, որ իր մորը վիրավորել են, եւ այսքանից հետո թող ինքը որոշի հանդես կգա, թե ոչ:

- Ես կարծում եմ՝ այն ցավալի իրավիճակը, որը ստեղծվել էր ֆեդերացիայի շուրջ, այլեւս անցյալում է: Այն գործընթացները, որոնք տեղի են ունեցել ֆեդերացիայի շուրջ, որոնք երբեմն նաեւ արհեստական էին եւ սրվում էին տարբեր կողմերից, անհրաժեշտ է թողնել անցյալում, եւ ինձ համար շատ ցավալի կլինի, եթե նման զարգացում ունենանք: Ես վստահ եմ, որ Հենրիխ Մխիթարյանը շարունակելու է խաղալ հավաքականում:

- Ընդհանրապես ինչպե՞ս եք պատկերացնում նախարարության համագործակցությունը ՀՖՖ-ի հետ: Տարիներ ի վեր կապը կտրված է եղել:

- Այո՛, գիտեք ոչ միայն տվյալ ֆեդերացիայի, այլ շատ ֆեդերացիաների հետ, եւ մենք պետք է մեխանիզմներ ստեղծենք վերականգնելու այդ բոլոր կապերը, որովհետեւ մեր նախարարությունը սպորտի գլխավոր պատասխանատուն է, եւ բնականաբար ֆեդերացիաների հետ համագործակցությունը պետք է սերտ լինի, որպեսզի մենք համատեղ կարողանանք բոլոր ուղղություններով հաջողություններ ունենալ:

- Պատրաստվո՞ւմ եք հանդիպել նորընտիր նախագահի հետ:

- Ես պատրաստ եմ: Մի անգամ նախանշել էի բոլոր ֆեդերացիաներ ղեկավարների հետ հանդիպում: Ցավոք, հարգելի պատճառով այդ հանդիպումը հետաձգվել է, բայց մենք կունենանք հանդիպում ֆեդերացիաների ղեկավարների՝ այդ թվում ֆուտբոլի ֆեդերացիայի նախագահի հետ:

- Շախմատի ֆեդերացիայի ղեկավարի հետ կհանդիպե՞ք (խմբ. շախմատի ֆեդերացիայի նախագահը Սերժ Սարգսյանն է):

- Շախմատի... այս պահին նման օրակարգ չկա:

- ՀԱՕԿ-ի հետ արդեն պայմանավորվե՞լ եք՝ ինչպես պարգեւատրելու 10 լավագույն մարզիկներին:

- Չենք պայմանավորվել: Ես առիթ ունեցել եմ մի քանի ամիս առաջ հանդիպելու օլիմպիական կոմիտեի ղեկավարության հետ, այս հարցը չենք քննարկել: