Ոտքն անդամահատված կինը փախել է հիվանդանոցից. ասում է՝ գումար էին ուզում, որն ինքը չուներ. տնօրենի պարզաբանումը

1-ին խմբի հաշմանդամություն ունեցող Հասմիկ Սմոյանը դժգոհում է, որ իրեն «Սուրբ Գրիգոր Լուսավորիչ» բժշկական կենտրոնում մերժել են օգնություն ցուցաբերել, որովհետեւ գումար չի ունեցել, եւ դա այն դեպքում, երբ նախկինում իրենից վճար չի պահանջվել:

Կինը հաշնադամություն է ձեռք բերել Սպիտակի ավերիչ երկրաշարժի հետեւանքով: Մի ոտքը անդամահատված է, ձեռքը չի կարողանում շարժել, ողնաշարի ճողվածք ունի: Վերջերս էլ սրտի շրջանում ծակոցներ է զգացել եւ որոշել դիմել բուժհաստատություն:

«Անցած չորեքշաբթի օրը զգացի, որ վատ եմ, մտածում էի՝ երեւի սրտի հետ կապված խնդիր ունեմ, որովհետեւ այդ կողմում ծակոցներ ու ցավեր ունեի, զանգեցի շտապօգնություն, բժիշկը ստուգեց, նշեց, որ ավելի լավ է ինձ հիվանդանոց տեղափոխեն»,- պատմեց Հասմիկ Սմոյանը՝ ավելացնելով, որ այդ օրը հաստատություն չի տեղափոխվել, մտածել է կանցնի, սակայն, քանի որ շտապօգնության բժիշկը վստահեցրել է, որ իր համար անվճար կլինի, հաջորդ օրը, նույն ծակոցները զգալով, հիվանդանոց է դիմել:

Բժիշկները էլեկտրասրտագրություն (EKG) եւ էխոսրտագրություն (EchoKG) են կատարել, այնուհետեւ ցանկացել են արյան անալիզ վերցնել եւ կնոջը տեղեկացրել են, որ բոլոր ստուգումների համար պետք է վճարի: Վերջինս նշել է, որ հնարավորություն չունի, կթողնի, կգնա: «Թող ինձ շուտ ասեին, ես չէի անցնի այդ բոլոր ստուգումները, ես, որ ներս մտա, իմ վիճակը տեսան, ես հենակով էի՝ ոտքս չկա, ձեռքս էլ ընդհանրապես չի աշխատում»,- նշեց կինը՝ավելացնելով, որ այդ լսելով՝ դուրս է գնացել, աստիճաններով դժվարությամբ իջել, ահագին ճանապարհ քայլել, նորից ետ են կանչել, ստիպել, որ վճարի:

«Բժիշկը շատ բորբոքված ասաց, որ գնամ այդտեղից, հետո ավելացրեց, որ մեր հասցեն գիտեն, իմ հետեւից կգան, կգտնեն»,- վճարել մերժած Հասմիկ Սմոյանը:

Հաշմանդամություն ունեցող կինը պատմեց, որ նախկինում գնացել է ստուգումների, ամեն տեղ անվճար է եղել, 1-ին խմբի հաշմանդամության փաստաթղթերն էլ հաստատությունում չեն պահանջել, նշել են, որ պետք չի, այստեղ ամեն ինչ վճարովի է, սակայն եթե հիվանդը որոշի հիվանդանոցում պառկել, անվճար կլինի:

Հասմիկ Սմոյանը նշեց, որ պառկել չէր կարող, հնարավորություն չունի, իր մոտ ոչ ոք չի կարող գալ, խնամել: Առաջարկել է, որ նշանակումներ անեն, տանը բուժվի, սակայն, ի պատասխան, նշել են, որ վճարներն անելուց հետո կմտածեն:

«Սուրբ Գրիգոր Լուսավորիչ» բժշկական կենտրոնի տնօրեն Արման Հովակիմյանը, պատասխանելով մեր հարցմանը, տեղեկացրեց, որ Հասմիկ Սմոյանը, նշված օրը դիմելով հիվանդանոց, գանգատվել է զարկերակային ճնշման բարձրացումից։ Զննվել է ընդհանուր բաժանմունքի հերթապահ բժշկի եւ հերթապահ սրտաբանի կողմից։ Վերջինիս մոտ  ախտորոշվել է «զարկերակային գերճնշում /148/78մմսս/», վիճակը գնահատվել է կայուն, հիվանդանոցային բուժման ցուցում չի եղել։ Դեպքը չի եղել անհետաձգելի եւ վարվել է ամբուլատոր կարգով։ Կինը հաճախակի ունեցել է զարկերակային ճնշում, սակայն չի դիմել տեղամասային սրտաբանին՝ հսկողության նպատակով, որը տրամադրվում է պետության կողմից երաշխավորված անվճար եւ արտոնյալ պայմաններում։

Արման Հովակիմյանի խոսքով՝ նրան առաջարկվել է դիմել տեղամասային բժշկին՝ իրազեկելով, որ հակառակ դեպքում՝ ցուցված հետազոտություններն իրականացվելու են վճարովի կարգով։ Կատարվել է ընդհանուր բժշկի եւ սրտաբանի խորհրդակցություն, ԷՍԳ, որի արդյունքում չի դրվել հոսպիտալացման ցուցում։ Ըստ տնօրենի՝ առաջարկվել է իրականացնել մատուցված ծառայությունների վճարումները, քանի որ դրանք դժվարամատչելի չեն, սակայն Հասմիկ Սմոյանը հրաժարվել է եւ ինքնակամ լքել հիվանդանոցը։ Արման Հովակիմյանը նշեց, որ կինը սպասարկվել է պատշաճ կերպով, չեն խախտվել վերջինիս իրավունքները։

Հասմիկ Սմոյանը 1988 թվականին 28 տարեկան հասակում Սպիտակի երկրաշարժի ժամանակ 4 օր փլատակների տակ է մնացել, աջ ոտքը անդամահատել են՝ նրան դուրս հանելու համար, աջ ձեռքը չի կարողանում շարժել: Հայաստանում վիրահատել են, այնուհետեւ տարել են  Ռուսաստան, այդտեղից էլ՝ Իսրայել: Ողնաշարի ճողվածք էլ ունի, սակայն բուժում ստանալու, վիրահատվելու հնարավորություն չունի:

«25.000 դրամ թոշակ եմ ստանում՝առաջին կարգի հաշմանդամության համար, 18.000 դրամի չափով էլ  նպաստ էի ստանում, սակայն այս սեպտեմբերից դա էլ չտվեցին»,- նշեց Հասմիկ Սմոյանը՝ ավելացնելով, որ աղջկա ընտանիքը որոշ ժամանակով տեղափոխվել է իր մոտ, սոցիալական ապահովության պետական ծառայությունից եկել, տեսել են, որ իրենց տանն է, այլեւս գումար չեն վճարում:

Տպել
3790 դիտում

Առաքվել է թոշակների 96 տոկոսը, նպաստների՝ 77 տոկոսը. դժվարություններ կան արտերկրի առաքումների հետ կապված

Արցախում հաստատված կորոնավիրուսով քաղաքացին մասնակցել է համապետական ընտրություններին

Գողություն, սպանության փորձ, ծեծ. ոստիկանությունը 1 օրում հանցագործության 42 դեպք է բացահայտել

Օն-լայն առևտրաշրջանառությունը գրեթե եռապատկվել է. օն-լայն նախագծերի մրցույթի արդյունքներն ամփոփվում են

Թոքերի արհեստական օդափոխման սարքերի նախագծումը 1-2 ամսվա գործընթաց չէ. միանալու պատրաստակամություն են հայտնել շատերը

Պաշտպանները Ռոբերտ Քոչարյանի խափանման միջոցը վերացնելու նոր միջնորդություն են ներկայացրել. դատավորը դեռ անաշխատունակ է

Մանկական հոգեբուժական դիսպանսեր ծառայությունը կենտրոնացվել է «Սուրբ Գրիգոր Լուսավորիչ» ԲԿ-ի պոլիկլինիկայում

Երեւանում հայտնաբերվել է դասալքության համար նախորդ տարվանից հետախուզվող երիտասարդը

Արմեն Թավադյանի եւ Վարուժան Մկրտչյանի վերաբերյալ քրեական գործով առաջին նիստի օրը հայտնի է

Հակոբ Ճաղարյանն ազատվել է վարչապետի խորհրդականի պաշտոնից

Թալինում «Mercedes C» ավտոմեքենան բախվել է գազատար խողովակին․ կա տուժած

COVID-19-ի հետազոտման շարժական լաբորատորիան կգործարկվի այսօրվանից՝ հետազոտելով 99 տոկոս ճշտությամբ

Մահվան դեպքն արձանագրվել է Արտաշատի բժշկական կենտրոնում. պացիենտը եղել է 93 տարեկան

Աշխարհահռչակ Ռոնալդինյոն 1.6 մլն դոլար գրավ է վճարել, որ բանտում մնալու փոխարեն տնային կալանքի ենթարկվի

Այսօր ունենք կորոնավիրուսի 28 նոր դեպք. գրանցվել է 1 նոր մահ. վարչապետ

Կորոնավիրուսով վարակված արցախցու հետ շփված 20 անձ է մեկուսացվել, ինքնամեկուսացած է ամբողջ գյուղը

ՌԴ-ն արտահանձնում է Ալրաղացի Լյովիկ մականունով հայտնի Լեւոն Սարգսյանին

Հայկական դուդուկը ՅՈՒՆԵՍԿՕ-ի ցանկում գրանցվել է 2008 թվականին․ ԿԳՄՍՆ

Պայթյուն թուրքական ռազմարդյունաբերական ընկերության գործարանի տարածքում. 3 վիրավոր կա

Հրդեհ Ագարակ գյուղում. տուժածներ չկան