Մարզիչը գոհ է. մարմնամարզիկները հաշված օրերի ընթացքում տարբեր մրցումներից ոսկով ու արծաթով են եկել

ՀՀ մարմնամարզության հավաքականի գլխավոր մարզիչ Հակոբ Սերոբյանն անկաշկանդ կերպով սաներին գովելու հնարավորություն ունի: Մի քանի օրվա ընթացքում նրանք միջազգային մի քանի խոշոր մրցաշարերից վերադարձել են մեդալներով: Արթուր Դավթյանը չեմպիոն է դարձել 2019 թ. Եվրոպական խաղերի հենացատկում: Վահագն Դավթյանը (օղակներ) նույն Մինսկ 2019-ում դարձել է արխաթեմեդալակիր: Երեկ՝ հուլիսի 7-ին, Համաշխարհային ունիվերսիադայում չեմպիոն է դարձել Արթուր Ավետիսյանը (օղակներ): Գագիկ Խաչիկյանն էլ (նժույգթափեր), մասնակցելով առաջին անգամ Անցկացվող Երիտասարդների աշխարհի առաջնությանը, գրավել է 4-րդ տեղը, մի փոքր զիջելով 3-ին: Այսօր լրագրողների հետ հանդիպման ժամանակ Սերոբյանն ամփոփեց արդյունքները: Նախ անդրադարձավ Մինսկին:

«Մեդալի ակնկալիքներ կային անպայման: Սպասում էինք, բայց այս մեդալներն ավելի բարձր էին: Չեմպիոնությունը մազից կախված էր, Դավթյան Արթուրն արեց անհնարինը: Աշխարհում շատ քիչ է լինում, որ 2 ցատկի ժամանակ էլ քայլ չեն անում: 15.016 միավորն աշխարհի առաջնության եւ օլիմպիական խաղերի մեդալ է վստահաբար»,- ասաց նա:

Արթուր Դավթյանը մեդալին մոտ էր նաեւ բազմամարտի եզրափակչում, սակայն այնտեղ իր, այսպես ասած, ուժեղ գործիքի՝ հենացատկի վրա վարժությունը չստացվեց: Մասնակցեց նաեւ ազատ վարժության եզրափակչին, ինչը նորություն է ՀՀ համար, եւ ավարտեց վերջին՝ 6-րդ, տեղով: Մարզիչը կրկին ընդգծեց, որ զարմացած է նրա չեմպիոնական ցատկի որակով: Նաեւ գովեց նրան մյուս վարժություններում առավելագույնն անելու համար:

«Ուղղակի անձամբ զարմացա: Ուրախությանը չափ ու սահման չկա: Բազմամարտում պայքարում էր, 2-րդ տեղով մտավ եզրափակիչ, շատ լավ արդյունք է: Նաեւ անսպասելի էր մեզ համար ազատ վարժության եզրափակիչը, կյանքում չէինք մասնակցել ազատ վարժության եզրափակչին: Բազմամարտում լրիվ հնարավորություն ուներ 3-րդ տեղը գրավելու: Եթե եզրափակչի այդ ցատկը կատարեր բազմամարտում, 3-րդը կլիներ»,- ասաց նա:

Հավաքականի առաջատարներից մյուսը՝ Վահագն Դավթյանը, օղակների վրա վարժությունում արծաթ նվաճեց 14.766 միավորով: Շատ քիչ զիջեց իտալացի Մարկո Լոդադիոյին (14.800): Սերոբյանն ընդգծում է, որ Վահագնը կարողացել էր անտեսել ուսի լուրջ վնասվածքը:

«Ուներ վնասվածք: Մկանաթել էր կտրվել: Անտեսեց այդ ամենը, արեց իր մաքսիմումը: Մենք նույնիսկ մոռացել էինք, որ խնդիր կա: Արեց իր լավագույն կատարումներից մեկը: Ես օղակների գլխավոր մրցավարներից էի: Թերություններ կային, որոնք ես գիտեմ որպես մասնագետ, որոնք կարող էի ավելի լավ անել, բայց լարվածությունն այնքան շատ էր... 2-րդ տեղը շատ լավ արդյունք էր: Շատ քիչ հետ մնաց իտալացի մարզիկից: Մասնակիցները բոլորն էլ հանրահայտ էին՝ աշխարհի, Եվրոպայի, օլիմպիական խաղերի մրցանակակիրներ կային»,- ասաց նա:

Մոտ 1 շաբաթ առաջ առաջին անգամ անցկացվող երիտասարդների աշխարհի առաջնությունում Սերոբյանի համար գոհացուցիչ ելույթ է ունեցել Գագիկ Խաչիկյանը: Երեկ է մարմնամարզիկների հաջողակ շրջանը համաշխարհային ուսանողական խաղերում եզրափակեց Արթուր Ավետիսյանը:

«Խաչիկյանը Եվրոպայի առաջնությունում 3-րդ տեղն էր գրավել, աշխարհի առաջնությունում եղավ 4-րդը, 2 տասնորդական զիջեց: Ինչո՞ւ եմ ուրախ. Հարություն Մերդինյանը, իհարկե, դեռ մասնակցում է, հանդես կգա աշխարհի առաջնությունում նժույգթափերի վրա, բայց մենք ունենք փոխարինող: Շատ ուրախ եմ, որ երեկ մեր Արթուր Ավետիսյանն օղակների վրա 2-րդ տեղով մտավ եզրափակիչ, ու երեկ նա այնքան լավ կատարեց, որ բարդությունը բարձր չէր, բայց մաքրությունն այնքան լավն էր, որ 14.9 ստացավ ու դարձավ չեմպիոն: Շատ ուրախալի է, ունենք օղակներ վրա փոխարինող»,- ասաց մասնագետը:

Մարմնամարզիկների հաջորդ ստուգատեսն օգոստոսին է: Արթուր Դավթյանն ու Վահագն Դավթյանը մասնակցելու են Իսրայելի բաց առաջնությանը: Տարվա կարեւորագույն մրցաշարերից է հոկտեմբերի կայանալիք աշխարհի առաջնությունը, որն օլիմպիական վարկանիշային է: Մինչեւ այդ հավաք են անցկացնելու Թբիլիսիում, քանի որ Ալբերտ Ազարյանի անվան մարզադպրոցը, որտեղ նրանք մարզվում են, վերանորոգվելու է:

Աշխարհի առաջնությանը 1 երկրից կարող է մասնակցել 3 հոգի: ՀՀ-ն են ներկայացնելու Հարություն Մերդինյանը, Արթուր Դավթյանը եւ Արթուր Թովմասյանը: Օղակների վրա մասնակցելու է ոչ թե Վահագն Դավթյանը, այլ Թովմասյանը, քանի որ հավաքականում նախնական պայմանավորվածություն է եղել: Մարզչական շտաբը մարզիկների հետ եկել է պայմանավորվածության, որ այս 2 մարզիկներից աշխարհի առաջնությանն օղակների վրա կմասնակցի նա, ով ավելի շատ կհաղթի մյուսին 4 մրցաշարերում՝ 2018 թ. Գերմանիայի աշխարհի գավաթի խաղարկությունում, ՀՀ 2019 թ. առաջնությունում, 2019 թ. Դոհայի աշխարհի գավաթի խաղարկությունում եւ Եվրոպայի 2019 թ. առաջնությունում: Դրանից 3-ում Թովմասյանը Վահագնին գերազանցել է: