Հունաստանի ֆուտբոլի հավաքականը Եվրոպայի միակ չեմպիոնը չէ, որին ՀՀ-ն հաղթել է

Հունաստանի ֆուտբոլի ազգային հավաքականն իր ամենալավ օրերը չի ապրում, սակայն դա չի նսեմացնում նրա նկատմամբ Հայաստանի արտագնա հաղթանակը (3:2): Այն կարելի է նույնիսկ պատմական անվանել: Եվրո 2020-ի ընտրական փուլի այս հաջողությունը Հայաստանի համար հերթական էր Եվրոպայի չեմպիոնի կոչում ուենցող թիմի դեմ խաղում: Հունաստանը Եվրոպայի չեմպիոն է դարձել 2004 թ.:

Օրերս՝ հունիսի 11-ին, Աթենքում կայացած խաղում ՀՀ ընտրանու կազմում գոլի հեղինակ դարձան Ալեքսանդր Կարապետյանը, Գեւորգ Ղազարյանը եւ Տիգրան Բարսեղյանը: Հունաստանի թիմից Կարլոս Զեկայի ու Կոստաս Ֆորտունիսի գոլերը բավարար չեղան:

Եվրոպայի նախկին չեմպիոններից Հայաստանից տուժել է նաեւ Դանիան: 1992 թ. չեմպիոնը Հայաստանին պարտվեց 2013 թ. հունիսին սեփական հարկի տակ (0:4) աշխարհի 2014 թ. առաջնության ընտրական փուլում: Այդ խաղում դուբլի հեղինակ դարձավ Յուրա Մովսիսյանը: Աչքի ընկան նաեւ Արաս Օզբիլիսը եւ Հենրիխ Մխիթարյանը:

Այդ ընտրական փուլում սա Հայաստանի միակ հնչեղ հաղթանակը չէր: Թիմը պարտության մատնեց նաեւ Չեխիային: Դա տեղի ունեցավ 2013-ի սեպտեմբերին: ՀՀ կազմում աչքի ընկան Կառլեն Մկրտչյանը եւ Գեւորգ Ղազարյանը: Վերջինս հաղթական գոլը խփեց ավելացված ժամանակում: Չեխերից միակ գնդակն իր հաշվին գրանցեց Թոմաշ Ռոսիցկին:

Չեխիան համարվում է Եվրոպայի 1976 թ.: Այն ժամանակ տիտղոսը նվաճել է Չեխոսլովակիան, սակայն Չեխիայի ու Սլովակիայի առանձնանալուց հետո ՈՒԵՖԱ-ն չեմպիոնությունը վերագրել է Չեխիային:

Այդ ընտրական փուլը Հայաստանը 13 միավորով՝ նույնքան, որքան Բուլղարիան, ավարտեց նախավերջին՝ 5-րդ տեղում: Առաջ անցավ միայն Մալթայից (3 միավոր), իսկ Բոլղարիային զիջեց լրացուցիչ ցուցանիշներով:

Սլովակիային Հայաստանը նույնպես հաղթել է այն էլ 2 անգամ: 2 հաղթանակներն էլ եղել են ՀՀ ընտրանու լավագույն տարիներին՝ Եվրո 2012-ի ընտրական փուլում: Տանը Հայաստանն առավելութան հասավ 3:1 հաշվով: ՀՀ կազմում գոլերի հեղինակ դարձան Յուրա Մովսիսյանը, Գեւորգ Ղազարյանը, Հենրիխ Մխիթարյանը, իսկ հյուրերի կազմում՝ Վլադիմիր Վայսը:

Նույն ընտրական փուլի պատասխան խաղում սլովակները սեփական հարկի տակ ոչ միայն չկարողացան ռեւանշի հասնել, այլեւ ավելի ցավալի պարտություն կրեցին՝ 0:4: Հայաստանից աչքի ընկան Յուրա Մովսիսյանը, Հենրիխ Մխիթարյանը, Գեւորգ Ղազարյանը եւ Արթուր Սարկիսովը:

Ընտրական խմբում ՀՀ-ն բավական մոտ էր ուղեգրերի համար պայքարին: 17 միավորով գրավեց 3-րդ տեղը: Զիջեց առաջին հորիզոնականը զբաղեցրած Ռուսաստանին (23 միավոր) եւ 2-րդը դարձած Իռլանդիային (21): Սա հենց Իռլանդիայի դեմ ցավալի հանդիպման ընտրական փուլն էր, որում Ռոման Բերեզովսկին կարմիր քարտ ստացավ:

Լեհաստանը Եվրոպայի չեմպիոն չի եղել, սակայն նրա նկատմամբ հաղթանակը նույնպես հնարավոր չէ մոռանալ: Դա տեղի ունեցավ 2007 թ. հունիսին Եվրո 2008-ի ընտրական փուլի շրջանակներում: ՀՀ-ն Երեւանի Վազգեն Սարգսյանի անվան «Հանրապետական» մարզադաշտում հաղթեց 1:0: Գոլի հեղինակ դարձավ Համլետ Մխիթարյանը:

Ընտրական A խմբում Հայաստանն այն ժամանակ 9 միավորով զբաղեցրեց նախավերջին՝ 7-րդ, տեղը: Գերազանցեց միայն Ադրբեջանին (5 միավոր): ՀՀ-ն եւս 2 հաղթանակ կարող էր տանել, եթե որակավորման փուլի՝ Ադրբեջանի դեմ 2 հանդիպումները չչեղարկվեին:

Հոգեբանական տեսանկյունից Հայաստանի համար շատ կարեւոր է եղել Չեռնոգորիայի նկատմամբ 2016 թ. նոյեմբերի տնային հաղթանակը: Հայերը պարտվում էին 0:2, սակայն կարողացան կամային բարձր հատկանիշներ դրսեւորել ու հաղթել 3:2 հաշվով: Ընտրական E խմբում Հայաստանը 7 միավորով զբաղեցրեց նախավերջին՝ 5-րդը, տեղը՝ գերազանցելով միայն Ղազախստանին (3 միավոր):

Ինչ վերաբերում է այս ընտրական փուլին, ապա Լիխտենշտեյնի ու Հունաստանի դեմ 2 անընդմեջ հաղթանակներով ՀՀ-ն վաստակեց 6 միավոր ու այժմ J խմբում 3-րդն է: Զիջում է գլխավոր ֆավորիտին՝ Իտալիային, որը 12 միավորով առաջիին է, եւ Ֆինլանդիային (9 միավոր): Հայաստանի հաջորդ հանդիպումը սեպտեմբերի 5-ին է: Այդ օրը «Հանրապետականում» հյուրընկալելու է ահեղ Իտալիային: