Կասիլյասը շաբաթ օրը գուցե դուրս գրվի հիվանդանոցից, բայց կավարտի կարիերան

Աշխարհահռչակ ֆուտբոլիստ Իկեր Կասիլյասը ստիպված կլինի ավարտել կարիերան: Այս մասին գրում են իսպանական լրատվամիջոցները: Մամուլում բազմաթիվ հարցազրույցներ կան սրտաբանների հետ, որոնք գնահատում են սրտի կաթված ստանալուց հետո խաղադաշտ վերադառնալու հնարավորությունները: Նրանք նշում են, որ ոչ մի պատճառ չկա, որը կխանգարի նրան վերադառնալ սովորական կյանքին, բայց ինչ վերաբերում է կարիերան շարունակելուն, ապա այդ հարցում խիստ կասկածում են:

Ըստ ամենալավատեսական մեկնաբանությունների՝ ժամանակը ցույց կտա՝արդյոք նա կվերադառնա խաղադաշտ, թե՝ ո՛չ, սակայն մասնագետներից շատերն ընդգծում են, որ ստենտավորումից հետո դա անհնար է: Վերջիններս բացատրում են, որ ֆուտբոլը ֆիզիկական մեծ ծանրաբեռնվածություն է պահանջում հատկապես դարպասապահից, որն անընդհատ բախումների մեջ է, ցատկեր է կատարում, ընկնում: Լրատվամիջոցները նաեւ հղում են կատարում իսպանացու ներկա թիմի՝ «Պորտուի» իրենց աղբյուրներին, որոնք նույնպես կասկածում են, որ ֆուտբոլիստը կկարողանա շարունակել պրոֆեսիոնալ կարիերան:

Իկեր Կասիլյասը սրտի կաթված է ստացել երեկ՝ մայիսի 1-ի առավոտյան, մարզման ժամանակ: Ակումբի բժիշկները նրան ժամանակին օգնություն են ցույց տվել: Նա տեղափոխվել է հինադանոց ու վիրահատվել: Հետագայում մասնագետները ԶԼՄ-ների հետ զրույցում ընդգծել են, որ նրա կյանքը փրկելու հարցում մեծ դեր է ունեցել հենց ակումբի բժիշկների ճիշտ ու ժամանակին կատարած աշխատանքը: Ֆուտբոլիստի գործակալը եւս նշել է, որ եթե այդ պահին նա այլ տեղում լիներլ եւ ոչ թե մարզմանը, որտեղ էին նաեւ բժիշկները, հետեւանքները կարող էին ահավոր լինել: Գործակալը նաեւ տեղեկացրել է, որ նա գիտակցությունը չի կորցրել եւ չի հասկացել՝ ինչ է իր հետ կատարվում: Միայն վիրահատությունից հետո է իմացել՝ ինչ է եղել:

Նշվում է, որ շաբաթ օրը նա կարող է դուրս գրվել հիվադնանոցից, սակայն վերականգնողական փուլը դանդաղ է լինելու, քանի որ խնդիրն էլ լուրջ է: Նա շփվելու է միայն հարազատների հետ ու բջջային հեռախոս օգտագործել չի կարող: Մեկ հայտարարություն սոցցանցերում նա այնուամենայնիվ երեկ երեկոյան արել է:

«Այստեղ ամեն ինչ վերահսկողության տակ է: Շատ վախեցանք, բայց ուժերս տեղում են: Շատ շնորհակալ եմ բոլորին հաղորդագրությունների եւ սիրո համար»,- գրել է նա՝ կից հրապարակելով հետեւյալ լուսանկարը.

Նա նաեւ կարողացել է հեռախոսով զրուցել մտերիմների հետ եւ վստահեցնել, որ ինքը հանգիստ է: Ֆուտբոլիստի կինը՝ ճանաչված մարզական լրագրող Սառա Կարբոներոն, որն այլ քաղաքից անմիջապես ամուսնու մոտ է շտապել, նույնպես գրառում է կատարել: Նա եւս գրել է, որ պարզապես վախեցել են, ու շնորհակալություն է հայտնել ջերմ վերաբերմունքի համար:

Կասիլյասին մինչեւ այժմ, բացի երկրպագուներից, առողջություն են մաղթել մի շարք ֆուտբոլային ակումբներ՝ այդ թվում «Ռեալ Մարիդը», որի համար նա իսկական լեգենդ է, «Բարսելոնան», «Չելսին» եւ այլն: Նրան աջակցել են նաեւ կոլեգաները, նախկին ու ներկա թիմակիցները: Նրանց թվում են Կրիշտիանու Ռոնալդուն, Լիոնել Մեսսին, Սերխիո Ռամոսը, Սեսկ Ֆաբրեգասը: Նրան առողջություն են մաղթել նաեւ այլ մարզաձեւերի հայտնի ներկայացուցիչներ, օրինակ, թենիսիստ Ռաֆայել Նադալը, ինչպես նաեւ այլ բնագավառների մի շարք հայտնի ներկայացուցիչներ: Ֆուտբոլիստով հետաքրքրվել է նախկին մարզիչ՝ Ժոզե Մոուրինյոն, որի հետ «Ռեալում» աշխատելու ժամանակ նա խիստ լարված հարաբերություններ է ունեցել:

Կասիլյասը, որը մայիսի 20-ին կդառնա 38 տարեկան, մարզական կարիերայի ընթացքում հասել է բոլոր հնարավոր հաջողություններին: Իսպանիայի հավաքականի կազմում դարձել է աշխարհի չեպիոն, Եվրոպայի կրկնակի չեմպիոն: «Ռեալի» հետ 3 անգամ հաղթել է Չեմպիոնների լիգայում, 2 անգամ՝ Եվրոպայի Սուպերգավաթում, 1 անգամ՝ աշխարհի ակումբային առաջնությունում, 2 անգամ Միջմայրցամաքային գավաթի խաղարկությունում: «Ռեալի» հետ նաեւ 5 անգամ դարձել է երկրի չեմպիոն, 2 անգամ՝ երկրի գավաթակիր, 4 անգամ՝ սուպերգավաթակիր: Բազմաթիվ անհատական ռեկորդներ է գրանցել:

Կարիերայի մեծ մասն անցակացրել է հարզատ ակումբում՝ «Ռեալում», որի կազմում լեգենդ է դարձել: Եղել է թիմի ավագը: Մոուրինյոյի հետ տարաձայնությունների պատճառով կորցրել է տեղը մեկնարկային կազմում, իսկ 2015 թ. տեղափոխվել է «Պորտու»: Պորտուգալական թիմի հետ վերջերս 1 տարով երկարաձգել է պայմանագիրը: