Միեւնույն է ձմեռային դադարի ընթացքում հայկական ֆուտբոլային թիմերը համալրվեցին լեգեոներներով

ՀՀ ֆուտբոլի Բարձրագույն խմբի առաջնության շուրջ աշխուժությունը մրցաշրջանի 2-րդ հատվածին ընդառաջ պահպանվել է: Նույնիսկ կարելի է ասել՝ մի փոքր էլ ավելացել է: 2018-19 մրցաշրջանի գարնանային հատվածից առաջ թիմերն անցկացրին ծրագրով նախատեսված իրենց հավաքները, ինչպես նաեւ համալրեցին կազմերը: Ու թեեւ վերջին շրջանում հաճախ է քննադատության ենթարկվում արտասահմանցիների ձեռք բերելը, այն ակումբները, որոնք դրա հնարավորությունն ունեին, այնուամենայնիվ լեգեոներներից չհրաժարվեցին:

Գործող չեմպիոն «Ալաշկերտը» վերջին պահին հասցրեց բերել Չիլիի հավաքականի նախկին կիսապաշտպան Ջերսոն Ասեւեդուին: Նրա մի շարք թիմերի թվում է եղել ռուսական «Ուրալը», որի կազմում բազմաթիվ գեղեցիկ գոլեր է խփել տուգանային հարվածներից: Ձմեռային դադարի ընթացքում թիմը համալրվեց նաեւ ՀՀ հավաքականի թեկնածու Դենիս Թումասյանով, բրազիլացի հարձակվող Գլաուսիո Ժոզե դե Արաուժո Սիլվայով: Ապա «Ալաշկերտ» եկավ հարձակվող Ալեքսանդր Պրուդնիկովը, որի նախկին թիմերից են Մոսկվայի «Սպարտակը», «Անժին», «Ռուբինը», «Դինամոն», «Ալանիան», «Ամկարը»: Ռուսաստանի Մ-17 հավաքականի կազմում նա նվաճել է Եվրոպայի առաջնության հաղթողի կոչումը: Թիմի վերջին ձեռքբերումներից մեկը նույնպես ռուս Նիկիտա Տանկովն էր:

«Բանանցի» ձեռք բերած ֆուտբոլիսների շարքում նույնպես շատ են արտասահմանցիները: Թիմը պայմանագիր է կնքել հարձակվող Վարդան Պողոսյանի, պաշտպան Ռոբերտ Ղարիբյանի, պաշտպան Անդրանիկ Ոսկանյանի ռուս պաշտպան Ալբերտ Գաջիբեկովի, Բոսնիա եւ Հերցեգովինայից հարձակվող Ալեքսանդար Գլիշիչի, մոլդովացի հարձակվող Իլյա Դամաշկանի, ռուս հարձակվող Եվգենի Կոբզարի հետ:

«Փյունիկը» եւս չի կաշկանդվել արտասահմանցիներ ձեռք բերելիս: Թիմ են տեղափոխվել հարձակվող Արթուր Միրանյանը, նիգերիացի կիսապաշտպան Ուսման Մուհամեդը, ռուս կիսապաշտպան Դենիս Տալալայը, ալբանացի պաշտպան Քրիստի Մարկուն, պաշտպան Սերգեյ Շեւչուկը: Թիմը վերադարձրել է «Արցախում» վարձավճարով հանդես եկող կիսապաշտպան Հովհաննես Պողոսյանին: Իսկ ահա ՀՀ հավաքականի հեռանկարային խաղացողներից մեկին՝ 23-ամյա կիսապաշտպան Պետրոս Ավետիսյանին, «Փյունիկը» 40 հազար դոլարի դիմաց զիջել է «Արարատ-Արմենիային»:

«Արարատ-Արմենիան» նույնպես իրեն պատրադրված չի զգացել միայն հայերի հետ պայմանագիր կնքել: Բացի խոստումնալից Պետրոսյանից՝ գլխավոր մարզիչ Վարդան Մինասյանի տրամադրության տակ են հայտնվել բազմաթիվ արտասահմանցիներ: Նրանք են՝ նիգերիացի հարձակվող Լուիս Օգանան, Կաբո Վերդեի հավաքականի կիսապաշտպան Մաիլսոն Լիման, կոտդիվուարցի կիսապաշտպան Կոջո Ալֆոնսը, կոտդիվուարցի հարձակվող Ժան-Ժակ Բուգուին, սերբ դարպասապահ Ստեֆան Չուպիչը, Հայիթիից պաշտպան Ալեքս Քրիստիան Ջունիորը:

«Լոռին», որը երբեք էլ «չի խոստացել» շեշտը դնել միայն տեղացի ֆուտբոլիստների վրա, ձմռանը նաեւ մի քանի հայերի ձեռք բերեց: Թիմում հայտնվեցին գանացի հարձակվող Ենոք Դարկոն, մոլդովացի հարձակվող Ալեքսանդրու Օսիպովը, ռուս դարպասապահ Արսեն Սիուկաեւ, կիսապաշտպան Վլադիմիր Բաբայանը, պաշտպան Հայկ Իշխանյանը, պաշտպան Արման Մկրտչյանը, կիսապաշտպան Արամ Քոչարյանը:

«Շիրակը» պայմանագրեր է կնքել ուսաստանցի հարձակվող Արտյոմ Գեւորգյանի, մակեդոնացի կիսապաշտպան Յուսուֆի Ֆատյոնի հետ: Թիմ են վերադարձել հարձակվող Դավիդ Ղանդիլյանը եւ սերբ պաշտպան Մառկո Պրլեւիչը:

«Գանձասար-Կապանը» պայմանագիր է ստորագրել պորտուգալացի կիսապաշտպան Ժորժե Շուլայի, պերուացի պաշտպան Ալեքս Մարտին Մագայանեսի, պաշտպան Համլետ Ասոյանի եւ պաշտպան Արման Հովհաննիսյանի հետ: Թիմ է վերադարձել հարձակվող Գեղամ Հարությունյանը:

«Արցախը» եւս շեշտը միայն հայերի վրա չի դրել: Թիմ են եկել ուկրաինացի կիսապաշտպան Դմիտրի Կլիմակովը, ռուս պաշտպան Ալան Տատաեւը, դարպասապահ Ալեքսեյ Սոլոսին, ռուս դարպասապահ Աշոտ Այվազյանը, հարձակվող Էդգար Մովսեսյանը, կիսապաշտպան Մհեր Սահակյանը, կոտդիվուարցի հարձակվող Ուիլֆրեդ Էզան եւ կիսապաշտպան Ջեո Դենի Էքրան, կիսապաշտպան Բենիկ Հովհաննիսյանը, հարձակվող Վարդան Բակալյանը, պաշտպան Վարդան Մովսիսյանը եւ կիսապաշտպան Վիգեն Ավետիսյանը:

«Արարատն» էլ տարբերակում չի դրել հայերի ու արտասահմանցիների միջեւ: Գլխավոր Մարզիչ Աբրահամ Խաշմանյանը մրցաշրջանի գարնանային հատվածում կաշխատի նորեկներ ֆրանսիացի պաշտպան Աբուբակար Գասամայի, ալժիրցի դարպասապահ Հոսին Լագունի, կիսապաշտպան Սարգիս Շահինյանի, ուկրաինացի պաշտպան Միխայիլ Կալուգինի, հարավկորեացի կիսապաշտպան Վուն-Սուբ Սիմի, Հարավաֆրիկյան Հանրապետությունը ներկայացնող Զվանե Մպումելելո Դեդիբոյի, բելգիացի պաշտպան Նտիկա Բոնդոմբեի, սերբ կիսապաշտպան Դեյան Վուկումանովիչի, բելառուս կիսապաշտպան Անդրեյ Չուխլեյի, ուկրաինացի կիսապաշտպան Անդրեյ Յակովլեւի, ռուս պաշտպան Մատվեյ Գույգանովի, հարձակվող Ռազմիկ Հակոբյանի, կիսապաշտպան Արտյոմ Սիմոնյանի հետ:

Ինչպես երեւում է, լեգեոներների թվի սահմանափակման թեման մնաց միայն խոսակցությունների մակարդակում: Դրան դեմ ու կողմ բազմաթիվ մեկնաբանություններ եղան, սակայն ակումբները՝ նույնիսկ նրանք, որոնք կողմ են սահմանափակմանը, այդքան էլ պատրաստակամ չէին առաջին քայլն անել առանց սպասելու, որ նման օրենք ուժի մեջ մտնի: