Սա ցույց տվեց, որ բասկետբոլը պետք է ՀՀ-ին. «Ուրարտուի» մարզիչը՝ ԵԱՏՄ գավաթը նվաճելու մասին

Ըստ «Ուրարտուի» գլխավոր մարզիչ Միքայել Պողոսյանի՝ ԵԱՏՄ գավաթի անդրանիկ խաղարկությունը մի շարք առումներով կարեւոր էր հայկական բասկետբոլի համար: Փետրվարի 23-26-ը Երեւանում կայացած մրցաշարի առաջին խաղում նրա թիմը պարտվեց ղազախական «Բարսի Ատիրաուին», սակայն մյուս 2 խաղերում հավաքվեց, հաղթեց բելառուսական «Բորիսվենին» ու ռուսական՝ Տուլայի «Արսենալին» եւ նվաճեց գավաթը: «Հայկական ժամանակ»-ի հետ զրույցում մարզիչը (լուսանկարում՝ աջից) նշեց, որ մրցաշարը ցույց տվեց, որ մարզաձեւը հետաքրքրում է հայերին:

«Մրցաշարը ցույց տվեց, որ Հայաստանում արդեն լավ մակարդակի բասկետբոլ ունենք ու որ բասկետբոլը հետ է գալիս Հայաստան: Մենք արդեն հասկանում ենք, որ մարդիկ կարող են սիրել բասկետբոլը, հետեւել՝ ինչ ենք անում բասկետբոլում: Նույնիսկ կարելի է ասել, որ ոչ թե բասկետբոլի մակարդակը ցույց տվեց, այլ այն, որ բասկետբոլը պետք է Հայաստանին»,- ասաց նա:

Մրցաշարից առաջ ակումբի նախագահ Կարեն Գիլոյանը նշում էր, որ սա իրենց համար լավ հնարավորություն է պարզելու՝ արդյոք թիմը կարող է պայքարել եվրագավաթներում: «Ուրարտուն» այստեղ հաղթեց եւ լավ խաղ ցուցադրեց: Մարզիչը, սակայն, չի շտապում ասել, որ իրենք այսօր պատրաստ են միջազգային ասպարեզ դուրս գալ:

«Մրցումը ցույց տվեց, որ կարող ենք այս մակարդակում խաղալ, սակայն դեռ չեմ կարող ասել՝ Եվրոպայում կարող ենք, թե՝ ոչ: Պետք է փորձենք ընտրական խաղեր անցկացնել, որպեսզի այդ մակարդակի հասնենք»,- ասաց նա:

Մարզիչը խոստոնավեց, որ ԵԱՏՄ գավաթի բասկետբոլը գերազանցում էր Հայաստանի առաջնությանը: Ըստ նրա՝ թե խաղերն էին ավելի դինամիկ, եւ թե խաղացողներն էին ավելի լավ պատրաստված:

«Խաղացողներն ավելի արագ էին խաղում, տակտիկապես ավելի ուժեղ էին, զգացվում էր, այլ մակարդակ էր»,- ասաց նա:

Գավաթի խաղարկության բոլոր խաղերը, բացառությամբ մեկի, տեղի են ունեցան «Միկա» մարզահամալիրում: Միայն 1 հանդիպում կայացավ «Օլիմպավանում»: Հաճախում էին բազմաթիվ երկրպագուներ ու մեծ աջակցություն ցույց տալիս հայկական թիմին: Մարզիչը շնորհակալություն է հայտնում դրա համար:

«Շատ ուրախ եմ, որ այդքան մարդ էր եկել: Շնորհակալ եմ յուրաքանչյուրին, ով եկել ու օգնել է մեզ: Իհարկե, մի քիչ ազատ տեղեր կային, ավելի շատ կարող էին գալ»,- ասաց Պողոսյանը:

Մարզիչը ցանկացավ նաեւ շնորհակալություն հայտնել ՀՀ առաջնության՝ A լիգայի առաջատար «Արագած» թիմին: Թեեւ «Ուրարտուն» նրանց անմիջական մրցակիցն է չեմպիոնական պայքարում, ԵԱՏՄ գավաթի խաղարկությունից առաջ նրանք իրենց խաղացողներից 2-ին թույլ էին տվել միանալ «Ուրարտուին»: Բացի այդ՝ «Ուրարտուին» օգնել է նաեւ «Արագածի» մարզիչը:

«Մեր շնորհակալությունն ենք ուզում հայտնել «Արագածին» այդ 2 խաղացողների համար, ինչպես նաև նրա համար, որ մարզիչը եկել աշխատել է մեզ հետ, այս մրցաշարը խաղացել ենք ոչ միայն «Որարտուի», այլեւ Հայաստանի համար: Նրանք հետ են գնալու «Արագած», ու մենք իրար դեմ ենք խաղալու»,- ասաց Պողոսյանը՝ ավելացնելով, որ մրցաշրջանի մնացած հատվածում ձգտելու են հաղթել Հայաստանի առաջնությունում ու երկրի գավաթի խաղարկությունում:

Միջազգային այս ստուգատեսն աննախադեպ էր. ԵԱՏՄ երկրներում օլիմպիական մարզաձեւերից նման մրցաշար դեռ չէր կազմակերպվել: Մասնակցեց 4 թիմ: 2-րդ տեղը զբաղեցրեց «Բարսի Ատիրաուն», լավագույն եռյակը եզրափակեց «Արսենալը»: «Բորիսֆենն» արժանացավ սփոփիչ 3-րդ հորիզոնականի:

Մրցաշարի լավագույն խաղացողի մրցանակը ստացավ Թադե Քեշիշյանը («Ուրարտու»): Լավագույն խաղարկող ճանաչվեց Օլեգ Բալաշովը («Բարսի Ատիրաու»), լավագույն պաշտպան՝ Թադե Քեշիշյանը («Ուրարտու»), լավագույն թեթեւ հարձակվող՝ Դարոլ Էրնանդես Զինենկոն («Ցոր-Բորիսֆեն»), լավագույն ծանր հարձակվող՝ Շեյն Հենրին («Ուրարտու»), լավագույն կենտրոնականը՝ Դմիտրի Ռիտենկոն («Արսենալ»): Լավագույն մարզչի մրցանակը բաժին հասավ Միքայել Պողոսյանին: ԵԱՏՄ գավաթի խաղարկության կազմակերպիչ եւ A լիգայի նախագահ Արա Պողոսյանն արժանացավ հատուկ մրցանակի: