Բռնցքամարտի ֆեդերացիան ասում է Ենգիբարյանի անվան դպրոցը հրաժարվել է մասնակցել, դպրոցը ասում է՝ ֆեդերացիան թույլ չի տվել

Հայաստանի բռնցքամարտի ֆեդերացիայի շուրջ նոր սկանդալ է առաջացել: Այսօրվանից՝ փետրվարի 25-ից, մեկնարկում է ՀՀ բռնցքամարտի երիտասարդների 2019 թ. առաջնությունը: Ֆեդերացիան ֆեյսբուքի պաշտոնական էջում հայտարարել է, որ Վլադիմիր Ենգիբարյանի անվան մարզադպրոցի տնօրենը զանգահարել է մրցաշարի գլխավոր մրցավարին եւ հայտարարել որ իրենք հրաժարվում են մասնակցել: Ֆեդերացիան նաեւ հայտնել է, որ այն մարզիկները, որոնք ցանկանում են մասնակցել, վաղը մինչեւ առաջնության մեկնարկը կարող են գնալ ֆեդերացիա իրենց ծնողների հետ, գրել դիմում եւ մասնակցել ֆեդերացիայի հայտով։

Մյուս կողմից մարզադպրոցի տնօրինությունը նամակ է ուղարկել ՀՀ Սպորտի եւ երիտասարդության հարցերի նախարարություն: Նամակում նշված է, որ ֆեդերացիան արգելել է իրենց 16 մարզիկներին մասնակցել առաջնությանը:

Այս կապակցությամբ նախարությունը հանդես է եկել հայտարարությամբ:

«Հայաստանի Հանրապետության բռնցքամարտի ֆեդերացիայի կողմից ՀՀ սպորտի եւ երիտասարդության հարցերի նախարարության ենթակայության «Վլ. Ենգիբարյանի անվան բռնցքամարտի օլիմպիական մանկապատանեկան մարզադպրոց» ՊՈԱԿ-ի սաներին բռնցքամարտի 2019 թվականի երիտասարդների Հայաստանի Հանրապետության առաջնությանը մասնակցել թույլ չտալու կապակցությամբ մարզադպրոցի տնօրենությունը նամակ-բողոքով դիմել է ՀՀ սպորտի եւ երիտասարդության հարցերի նախարարի 1-ին տեղակալ, նախարարի պաշտոնակատար Գաբրիել Ղազարյանին:

Այդ կապակցությամբ նախարարությունը հայտարարում է.

«Հաշվի առնելով այն հանգամանքը, որ Հայաստանի Հանրապետության բռնցքամարտի ֆեդերացիան նախարարության կողմից տրամադրվող միջոցներով է իրականացնելու ՀՀ երիտասարդների առաջնությունը, որին ֆեդերացիան չի թույլատրում մասնակցել պետական միջոցներով մարզվող մարզիկներին, ինչպես նաեւ ի գիտություն ընդունելով ՀՀ բռնցքամարտի ֆեդերացիայի վերջին ընտրությունների արդյունքները չընդունելու եւ նոր ընտրություններ անցկացնելու պահանջի մասին ՀՀ բռնցքամարտի ֆեդերացիայի նախագահին AIBA-ի կողմից ուղարկված նամակը եւ առաջնորդվելով Միջազգային օլիմպիական կոմիտեի Օլիմպիական խարտիայի՝ սպորտում խտրականությունն արգելող սկզբունքները (4-րդ, 6-րդ սկզբունքներ), ՀՀ սպորտի եւ երիտասարդության հարցերի նախարարությունը ՀՀ բռնցքամարտի ֆեդերացիայից պահանջում է հետաձգել 2019 թվականի երիտասարդների առաջնության անցկացումը եւ առաջարկում է վերանայել ֆեդերացիայի որոշումը՝ ՀՀ սպորտի եւ երիտասարդության հարցերի նախարարության ենթակայության «Վլ. Ենգիբարյանի անվան բռնցքամարտի օլիմպիական մանկապատանեկան մարզադպրոց» ՊՈԱԿ-ի սաների մասնակցությունն արգելելու մասին:

Միաժամանակ ՀՀ սպորտի եւ երիտասարդության հարցերի նախարարությունը հայտարարում է, որ սկսելու է ՀՀ բռնցքամարտի ֆեդերացիայի հետ համագործակցության պայմանագրի վերանայման գործընթաց»,- գրված է նախարարության հայտարարության մեջ:

Այս հայտարարությանը կցված է նաեւ վերեւի լուսանկարի նամակը եւ եւս մեկ նամակ, որը, ինչպես նշում է նախարարությունը, ստացված է ԱԻԲԱ-ից (Բռնցքամարտի միջազգային միություն):

2-րդ նամակում գրված է, որ ՀԲՖ-ն պետք է նոր ընտրություններ անցկացնի: Ավելի վաղ անդրադառնալով նոր ընտրություններ անցկացնելու պահանջին՝ ՀՀ Բռնցքամարտի ֆեդերացիայի նախագահ Արթուր Գեւորգյանը նշել էր, որ ինքը նման տեղեկություն չունի ու ֆեդերացիան շարունակում է աշխատել իր հունով:

ՀՀ բռնցքամարտի ֆեդերացիայի շուրջ այս սկանդալն առաջացել է նախագահի ընտրություններից հետո: 2018 թ. օգոստոսի 2-ին Գեւորգյանը, որը միակ թեկնածուն էր, վերընտրվեց: Դրանից հետո բռնցքամարտի մի շարք ներկայացուցիչներ ոտքի կանգնեցին, դիմեցին ՀԱՕԿ նախագահ Գագիկ Ծառուկյանին, ՀՀ սպորտի եւ երիտասարդության հարցերի այն ժամանակվա նախարար Լեւոն Վահրադյանին: Ըստ նրանց՝ ընտրություններն անցել էին խախտումներով: Այդ ժամանակվանից ՀԱՕԿ-ի ու ֆեդերացիայի միջեւ մամուլի ու սոցցանցերի միջոցով հեռակա բանավեճեր են ընթանում կամ էլ 2 կողմերի ներկայացուցիչները հանդես են գալիս բողոքի ակցիաներով: