Նախկինում ընդդիմությունը չի կարողացե՞լ հարցեր տալ, ուզել են հարց տալ, եկել-ծեծել ե՞ն բազկաթոռի վրա․ Մարուքյան

«Լուսավոր Հայաստան» կուսակցությունը ատելության խոսքի հարձակման տակ է։ Այս մասին այսօր Ազգային ժողովում ճեպազրույցի ժամանակ ասաց ԼՀԿ խմբակցության ղեկավար Էդմոն Մարուքյանը՝ հավելելով, որ կուսակցությունը որոշակի մեդիամանիպուլյացիաների եւ կեղծ լուրերի հարձակման տակ է, որում մեծ դերակատարում ունեն նաեւ «իշխանական» լրատվամիջոցները։

Մարուքյանն անդրադարձավ իշխող խմբակցության ներկայացուցիչների հնչեցրած այն կարծիքներին, թե ընդդիմությունը կարողացել է ազատ դեմ քվեարկել կառավարության ծրագրին, կարողացել է հարցեր տալ կառավարությանը եւ այլն․

«Իրենք կարծում են, թե հանդուրժող ու սիրալիր էի՞ն։ Կամ, իրոք ասել են՝ կարողացել ենք հարցեր տա՞լ, ինչի նախկինում ընդդիմությունը չի կարողացե՞լ հարցեր տալ, ուզեցել են հարց տալ, եկել են, ծեծել ե՞ն բազկաթոռի վրա, եղել ա՞ դեպք, որ ընդդիմությունը չկարողանա հարց տալ»,-ասաց Մարուքյանը՝ շարունակելով․

«Կամ, որ ասում են ընդդիմությունն ազատորեն կարողացավ դեմ քվեարկել, ի՞նչ պիտի անեին, թեւներս կապեին՝ չկարողանայինք քվեարկե՞լ»։

Մարուքյանն ասաց, որ որեւէ բան իրենց չի կանգնեցրել նախկինում, եւ չի կանգնեցնի հիմա․ իրենք զուսպ, հանդարտ, իրենց գաղափարներին հավատարիմ՝ շարունակելու են աշխատել։

Պատգամավորը նշեց, որ մոտ օրերս շրջանառության մեջ կդնեն սահմանադրական բարեփոխումների մի փաթեթ, որը հնարավոր է անել պառլամենտական մակարդակում։ Փաթեթը պատրաստվել է «ԵԼՔ» դաշինքի ժամանակ՝ հենց Էդմոն Մարուքյանի կողմից։ Խոսքը խորհրդարանում խմբակցությունների դերի բարձրացման մասին է։

Ինչ վերաբերում է «Հայ ազգային կոնգրես» կուսակցության այն առաջարկին, որ պետք է սահմանադրական փոփոխություն նախաձեռնել եւ վերադառնալ կիսանախագահական համակարգին, Մարուքյանն ասաց, որ թեեւ հարգում են առաջարկը, բայց չեն պաշտպանում ՀԱԿ-ի նախաձեռնությունը, որովհետեւ մենք կիսանախագահականից անցել ենք պառլամենտական համակարգի, որը դեռ ամբողջովին չի էլ սկսել գործել․

«Դեռեւս չհամտեսած պառլամենտական կառավարման համակարգը՝ նորից գնալ կիսանախագահականի՝ հետընթաց է, մենք պետք է առաջ գնանք, գնանք ամբողջական խորհրդարանական կառավարման»,-ասաց Մարուքյանը։

Ճեպազրույցի ժամանակ լրագրողի հարցին՝ մի կողմից խոսվում է հակահեղափոխական մամուլի մասին, մյուս կողմից իշխանական, անվանական որո՞նք են այդ իշխանական եւ հակաիշխանական լրատվամիջոցները, Մարուքյանը պատասխանեց․

««Հայկական ժամանակ» օրաթերթը խմբագրական ա հրապարակել, վերնագիրը մոտավոր սենց ա՝ «Դիմակները պատռվեց»: Նայում եմ, հեղինակին չեմ գտնում, գնացեք կարդացեք էդ հոդվածը։ Ամբողջ վերլուծությունն էն մասին ա, որ մենք դեմ ենք քվեարկել կառավարության ծրագրին, մենք ռոբերտքոչարյանա-սերժսարգսյանական չգիտեմ ինչ բաների մեջ ենք։ Գիտենք չէ՞՝ ումն ա էդ թերթը: Անցանք առաջ: «Ժողովուրդ» թերթը գիտենք չէ՞՝ ումն ա. իշխանական թերթ կարա՞մ ասեմ, հա՞, կարա՞մ ասեմ: Տպել ա, ասում ա՝ ԼՀԿ պատգամավորները գնում են Արմեն Սարգսյանի մոտ, հանդիպումներ են ունենում, նրանք ստվերային հովանավորչություն ունեն, բան... Միշիկից, Սաշիկից, Սերժիկից պրծանք, հիմա էլ՝ Արմեն Սարգսյանն եկավ: Հետո հարցնում են մեր խմբակցության պատգամավոր Գորգիսյանին, նա ասում ա՝ նման բան չկա, ու թերթում գրում են՝ բնական է, որ կհերքեր: Էլի կարամ բերեմ օրինակներ: Երկու իշխանական թերթ, եթե «Հայկական ժամանակ»-ը նման բան ա գրում, ֆեյսբուքյան օգատետերից ոնց նեղանամ, որ քրֆում են»,-ասաց Էդմոն Մարուքյանը։

«Այսինքն՝ ինչ նախագիծ բերեն, պտի վախից կողմ քվեարկե՞նք, որ չասեն Քոչարյան-Սարգսյանական, հա՞, է՞ս ա նոր Հայաստանը: Տեղ ենք հասել, իջեք։ Ես ցավում եմ, որ երկրում իմ ամենաընթերցած թերթը իշխանություն-ընդդիմություն մի հատ բախումից նման խմբագրական ա հրապարակում»,-եզրափակեց պատգամավորը։

Խմբագրի կողմից (չշփոթել գլխավոր խմբագրի հետ)․ Այստեղ տեղադրում ենք Էդմոն Մարուքյանի նշած խմբագրականի հղումը՝ Դիմակները պատռելու ժամանակը. խմբագրական: Հավելենք, որ թեեւ խմբագրականի տակ ընդունված չէ անուն հրապարակել (սովորաբար այդպես է բոլոր լրատվամիջոցներում), բայց դավադրությունների տեսությունների սիրահարների համար «բացահայտենք» մի «գաղտնիք»․ ամենեւին պարտադիր չէ, որ լրատվամիջոցի գլխավոր խմբագիրը խմբագրական գրի. տվյալ խմբագրականի եւ ՀԺ-ում վերջին շրջանի խմբագրականների հեղինակը Արմեն Բաղդասարյանն է:

Ի դեպ, Էդմոն Մարուքյանը նախկինում վստահության քվե է տվել տապալված ռեժիմի վարչապետերի ծրագրերին, ու հիմա, փաստորեն, փորձում է ինչ-որ կերպ «դուրս գալ» վերջին քվեարկության տակից: Նրա այս բոլոր հայտարարությունները, թերեւս, պետք է հենց այդ համատեքստում դիտել:

Հիշեցնենք, որ վարչապետ Նիկոլ Փաշինյանը կառավարության ծրագրի քննարկման ժամանակ մի քանի օր շարունակ հանգամանալից պատասխանել է բոլոր պատգամավորների հնչեցրած հարցերին:

Ինչ վերաբերվում է նախկինում ընդդիմության հարց տալ-չտալուն կամ ազատ խոսքին, ապա դրա համար հետապնդում էին ու բանտերը լցնում, լրատվամիջոցն էլ փակում: