Դահուկասպորտի ֆեդերացիայում տարաձայնություններն անցյալում են. Գագիկ Սարգսյան

Հայաստանի դահուկասպորտի ֆեդերացիայում խնդիրները հարթվել են ու տարաձայնությունները մոռացվել են: Այս մասին այսօր՝ դեկտեմբերի 12-ին, լրագրողների հետ հանդիպման ժամանակ ասաց ֆեդերացիայի գլխավոր քարտուղար Գագիկ Սարգսյանը: 2018-ի սկզբին լեռնադահուկային սպորտի հավաքականի հետ կապված մեծ աղմուկ էր բարձրացել: Փհենչհանում կայացած օլիմպիական խաղերում Աշոտ Կարապետյանը մնացել էր առանց դահուկների, ու տարբեր տեսակետներն էին հնչում, թե ով է մեղավոր: Սարգսյանն ընդգծում է, որ այդ մասին հիմա չեն հիշում, իսկ մարզիկը որեւէ խնդիր չունի:

«Աշոտը ՀՀ քաղաքացի է, մեր երեխան է, մեր կրտսեր եղբայրն է: Նա չի կարող որեւէ խնդիր ունենալ: Ցանկացած մարզիկ մեր ֆեդերացիայում որեւէ անձնական խնդիր չի կարող ունենալ: Եղել էր խնդիր, հարթվեց, էջը փակվեց մեզ համար: Ինքներդ համոզվեցիք, որ մենք հիշաչար չենք: Մենք այն մարդիկ չենք, որ ջարդենք մարզիկին: Ընդհակառակը, մարզիկին թեւ տալ է պետք, մարզիկին պետք է ապահովել ամեն ինչով»,-ասաց նա՝ ավելացնելով, որ ոչ մի մարզիկ չունի գույքի, հանդերձանքի, հավաքների կամ մրցումների խնդիր:

Բարձացած աղմուկից հետո ՀՀ լեռնադահուկային սպորտի հավաքականը ցրվեց: Հիմա այն չկա, ու ինչպես Գագիկ Սարգսյանը տեղեկացրեց, դեռ 1 տարի էլ չի լինելու: Պատճառն անարդյունավետ աշխատանքն է: Ֆեդերացիան հասակցել է, որ համակարգում տարիներ շարունակ ինչ-որ բան սխալ է գործել, ու փոփոխություն է անհրաժեշտ: Հիմա չկա հավաքական, չկա մարզիչ, կան անհատ մարզիկներ, որոնց ֆեդերացիան գործուղում է մրցումների, ապահովում ծախսերը: 2019 թ. մարտ ամսից էլ գործելու է նորմատիվային համակարգ, եւ երկիրը ներկայացնելու համար մարզիկները պետք է համապատասխանեն որոշակի չափանիշների:

«Մարզիկները մարզվում են իրենց մարզիչների մոտ, ամիսը 1 անգամ նույն վայրում հանձնելու են նույն նորմատիվները: Դահուկավազքի նորմատիվներն ընդունելու է լեռնադահուկային սպորտի մասնագետները, լեռնադահուկային սպորտի մասնագետները՝ դահուկասպորտի նորմատիվները»,- ասաց նա՝ ավելացնելով, որ այդպես մի քանի ամիս անց պարզ կդառնա, թե որ մարզիչն ինչպես է աշխատում:

Այս շրջանում թե՛ դահուկավազքի, թե՛ լեռնադահուկային սպորտի ներկայացուցիչները մասնակցում են մրցումների ու ուսումնամարզական հավաքների: Մրցաշրջանը բաց կթողնի առաջատար մարզիկ Սերգեյ Միքայելյանը, նա ապաքինվում է: Մեջքի ու ծնկի վասվածք է ունեցել: Վերջերս ծնկի վիրահատության է ենթրկվել ու նոր-նոր է սկսում մարզվել: Սարգսյանը նշեց, որ վիրահատությունը հաջող է անցել, ֆեդերացիան հոգացել է բոլոր ծախսերը, անհրաժեշտության դեպքում կարող էր նաեւ արտասահման բուժման ուղարկել նրան, սակայն կարիքը չի եղել: Այս մրցաշրջանից հետո կորոշվի՝ ինչպես Միքայելյանը կշարունակի կարիերան:

Առաջիկայում հայ մարզիկներին 2 կարեւոր ստուգատես է սպասվում: 2019-ի փետրվարին կայանալու է աշխարհի առաջնությունը: Այնտեղ ՀՀ-ն կներկայացնեն 2-3 մարզիկներ: Միքայել Միքայելյանն էլ հունվարին կմասնակցի աշխարհի մինչեւ 20 տարեկանների առաջնությանը:

Բացի այդ՝ դահուկասպորտի մի շարք մրցաշարեր են տեղի ունենալու ՀՀ-ում՝ հիմնականում Աշոցքում: 2018 թ. Դեկտեմբերի 21-23-ը Աշոցքում կկայանա ՀՀ երիտասարդների եւ պատանիների առաջնությունը, 2019 թ. հունվարի 6-9՝ մեծահասակների առաջնությունը: Հունվարի 19-20-ն արդեն 2-րդ տարին ՀՀ-ում Եվրամիության ներկայացուցչության հետ համատեղ կանցկացվի դահուկավազքի փառատոն, որը ՀՀ ֆեդերացիան հետագայում փորձելու է միջազգային դարձնել:

2019 թ. հունվարի 20-ին միջազգային ֆեդերացիան նշում է ձյան համաշխարհային օրը: Դրա շրջանակներում ՀՀ-ում կլինի 2 միջոցառում՝ առաջինը Աշոցքում՝ Եվրամիության կազմակերպած փառատոնի շրջանակներում, 2-րդը՝ Ծաղկաձորում: Փոքր տարիքի երեխաների մրցումներ են լինելու:

Հունվարի 19-20-ին նախատեսվում է Աշոցքի դահուկային կենտրոնի բացումը: ՀՀ ֆեդերացիան ֆինանսական աջակցություն է ստացել Եվրամիությունից ֆինանսական աջակցություն ենք ստացել Եվրամիությունից: Սարգսյանը նշում է, որ կլինի փոքր կենտրոն, բայց մեծ հեռանկարով, որը, բացի մարզաձեւի առաջընթացից, կնպաստի սպորտային տուրիզմի զարգացմանը:

Հունվարի 28-ից փետրվարի 1-ը կանցկացվեն լեռնադահուկային առաջնություններ: Միջազգային ֆեդերացիան ՀՀ-ին է վստահել անցկացնել զարգացող երկրների լեռնադահուկային սպորտի 2019 թ. գավաթի խաղարկությունը, կմասնակցի մինչեւ 10 պետություն ուժեղ մարզիկներով: Նաեւ պարալեռնադահուկային սպորտի մրցաշար է լինելու: 2019 թ. փետրվարի 7-9 տեղի կունենա վարկանիշային մրցաշար, մարտի 6-9 կկայանա ՀՀ պատանիների եւ երիտասարդների առաջնություն, որը եւս վարկանիշային է: