Միգուցե սա իմ վերջին ելույթն է այս ամբիոնից. Շարմազանովը քննադատում է վարչապետին

ԱԺ փոխխոսնակ, ՀՀԿ խմբակցության պատգամավոր Էդուարդ Շարմազանովը ԱԺ հատուկ նիստի իր ելույթում մի քանի կետով խոսեց Նիկոլ Փաշինյանի կառավարության վեց ամիսների աշխատանքի մասին.

«Ուղիղ վեց ամիս առաջ՝ մայիսի 1-ին, ԱԺ-ն առաջին անգամ քննարկեց վարչապետի թեկնածու Փաշինյանի ընտրության հարցը, եւ այսօր՝ վեց ամիս անց, մենք նորից քննարկում ենք այս հարցը, եւ բնականաբար կա չգրված օրենք՝ իշխանությունն աշխատում է, փորձում է ներկայացնել իր աշխատանքը, ընդդիմությունը քննադատում է: Հիմա քանի որ մենք լսեցինք իշխանության արած աշխատանքի մասին հաղորդում, ես կփորձեմ մնալ պառլամենտական ոճի մեջ եւ կներկայացնեմ իմ կարծիքն այս վեց ամսվա մասին, կխոսեմ քննադատաբար, բայց կփորձեմ խոսել ոչ թե օդից կախված լուրերով, այլ փաստացի:

Ուրեմն՝ հարց առաջին. երբ պարոն Փաշինյանն առաջադրվում էր վարչապետ, եւ դրանից առաջ, ինքն ու իր կողմնակիցները նշեցին, որ այսպես ասած սիրո եւ համերաշխության հեղափոխությունից հետո ՀՀ-ն պետք է թեւակոխի թռիչքային զարգացում: Հիմա համադրենք փաստերը: Ինչքան աշխատատեղեր են ստեղծվել, տնտեսական-ներդրումային վիճակն ինչպիսին է, ժողովրդի կենսամակարդակը լավացել է, թե վատացել է, առաջին անհրաժեշտության ապրանքները թանկացել, թե էժանացել են, եւ, առհասարակ, մեր կյանքը լավացել է, թե՝ վատացել: Մեր կյանքը, որ ասում եմ, հանրապետականին նկատի չունեմ, սիրելի ժողովուրդ, այլ մեր քաղաքացիներին:

Ուրեմն՝ ներդրումային միջավայրի մասին. առաջին եռամսյակի համեմատ՝ երկրորդ եռամսյակում երեք անգամ ներդրումները պակասել են, առաջինում կազմել են 100 մլն ԱՄՆ դոլար, երկրորդում՝ 9 մլն ԱՄՆ դոլար: Սրանք իմ տվյալները չեն, այլ պրոֆեսիոնալ տնտեսագետների տվյալներ, որոնք հրապարակային են, կարծում եմ՝ պարոն վարչապետին զեկուցած կլինեն: Ներդրումային բում էինք սպասում հեղափոխությունից հետո, եկանք, կանգնեցինք ներդրումային անկման տաշտակի առջեւ: Սա լավացնում է երկրի վիճակը, թե վատացնում է: Իհարկե՝ վատացնում է: Ներդրումները երեք անգամ առաջին եռամսյակի համեմատ կրճատվել են»,- ասաց Շարմազանովը՝ անցնելով իր հաջորդ քննադատություններին:

«Երկրորդ՝ մենք ակնկալում էինք թռիչքային զարգացում, էս բյուջեով գրված էր 6.5 տոկոս տնտեսական աճ, 2019 թվականին մենք սպասում ենք 4.9 տնտեսական աճ: 2019-ի բյուջեի նախագծով՝ 3.5 տոկոս գնաճ է նախատեսվում, եւ 0 տոկոս աշխատավարձերի բարձրացում: Էն դեպքում, որ 3.5 տոկոս գնաճ ենք սպասում: Հաջորդը. ինչքա՞ն աշխատատեղեր եք բացել: 10-15 աշխատատեղ բացում եք, հայլուրը մի շաբաթ ցույց ա տալիս, առավոտը, իրիկունը, թերթերը, սայտերը: Էն դեպքում, որ Ալավերդու պղնձաձուլարանը փակման ենթակայա դարձել: Ես չգիտեմ՝ ով ա մեղավոր, Ձեզ էլ դիմել եմ, պարոն վարչապետ, բայց 630 ալավերդցի էսօր կանգնած են աշխատանքը կորցնելու վտանգի եւ փաստի առջեւ:

Հաջորդ. երբ հեղափոխություն դեռ չէիք արել, մեզ քննադատում էին է՛լ կարմիր գծերի, է՛լ կամեռաների համար: Հիմա պարզվում է՝ կարմիր գծերը պետք են, որ մանկապարտեզները վերանորոգենք: Կամեռաներն էլ ոչ թե պետք է փակեք, այլ շատացնենք: Բա ո՞նց եղավ, բա հեղափոխության շրջանում ձեր կողմնակիցները, հազար ներողություն, իրենց ներքնաշորերով կամեռաներն էին փակում, դրանով բողոք էին հայտնում, որ տեսախցիկները պետք չեն: Հաջորդը, երբ խոսում էի՝ գյուղատնտեսությունը ո՞նց ա զարգանալու, հեղափոխական տեմպերով զարգանալու ա՞: Ասացի, որ մանր, խոշոր եղջերավորների կաթնատվությունը հեղափոխական տեմպերով պետք է ավելացվեն: Դուք ասացիք՝ ոչ, այլեւս մի հոգի չի արտահանի, եւ մեր եղջերավորներն ազատ են արտահանման համար: Հիմա հարց, էդ եղջերավորները, էդ որ ազատվեցին, ինչքա՞ն են արտահանվել:

Ելույթի վերջում Էդուարդ Շարմազանովը հայտարարեց՝ խորհրդարանում ելույթ է ունենում երեւի թե վերջին անգամ: «Թավշյա հեղափոխությունից 6 ամիս անց սերն ու համերաշխությունը հաղթեցին: Թե՛ իշխանությունը, թե՛ ընդդիմությունն այսօր միակարծիք են: Վարչապետ Փաշինյանի թեկնածությանը չպետք է կողմ քվեարկել»,- ասաց  ԱԺ փոխնախագահը:

Շարմազանովն ասաց, որ չի մասնակցելու Նիկոլ Փաշինյանի՝ որպես վարչապետի թեկնածուի ընտրության քվեարկությանը: «Ես ծառայելու եմ Հայաստանի Հանրապետությանը: Չկա հին ու նոր Հայաստան: Հայաստանը մեկն է, որը գալիս է Հայկ Նահապետից, որը հաղթեց Բելին ու գնալու է հավերժություն: Հայկը երբեք չի կարող պարտվել Բելին»,- եզրափակեց ԱԺ փոխնախագահը:

Նիկոլ Փաշինյանը Շարմազանովի հայտարարություններին անդրադարձավ իր եզրափակիչ ելույթում.