Մակունցի եւ «Shaula International»-ի տնօրենի խոսքերը չեն համընկնում. ո՞վ չի կատարել խոստումը

Սեպտեմբերի 28-ից հոկտեմբերի 25-ը «Ժամանակակից արվեստի միջազգային ցուցահանդես. Հայաստան-2018» (ICAE2018) լայնամասշտաբ միջոցառումների շրջանակներում Երեւանի տարբեր ցուցասրահներում կներկայացվեն ավելի քան յոթանասուն օտարերկրյա ստեղծագործողների աշխատանքներ:

Սակայն, մինչ կկայանար լայնամասշտաբ միջոցառումը՝ «Ժամանակակից արվեստի հնչյունային սահմանները» համակարգողներ Մազդակ Ֆաիզնիան, Մարինա Հակոբյանն ու մյուսներն իրենց մտահոգություն էին հայտնել, որ այն կարող է չեղյալ համարվել:

Մեր տեղեկություններով՝ միջոցառման իրականացման համար դեռեւս նախորդ կառավարության օրոք մշակույթի նախարարության կողմից բավականին մեծ գումարներ էին խոստացվել, սակայն վերջին պահին անորոշ պատասխաններ տրվել: Կազմակերպիչների մեծ ջանքերի շնորհիվ, այնուամենայնիվ, ցուցահանդեսի բացման հանդիսավոր արարողությունն իրականացավ ՀՀ ազգային պատկերասրահում:

Մշակույթի նախարար Լիլիթ Մակունցը ՀԺ-ի հետ զրույցում ասաց, որ բարձր է գնահատում Երեւանի մշակութային կյանքն ակտիվացնող ցանկացած միջոցառում եւ, հատկապես այն միջոցառումները, որոնք միջազգային են եւ ներգրավում են միջազգային արվեստագետների: «Յուրաքանչուր միջոցառման հետ նկատում եմ, որ մարդկանց, այցելուների քանակը շատանում է թանգարաններ ու պատկերասրահներ, ինչն ինձ համար անչափ ուրախալի է»,- ասաց նախարարը:

Խոսելով միջոցառման հնարավոր չեղարկման եւ մշակույթի նախարարության կողմից տրվող ֆինանսական աջակցության մասին՝ Մակունցն ասաց. ««Shaula International» ՍՊԸ-ն դեռեւս նախորդ կառավարության օրոք որոշակի բյուջեի սահմաններում աջակցություն ստանալու պայմանավորվածություն էր ունեցել: Մենք արել ենք ոչ միայն այն, ինչը որ նախատեսված է պայմանավորվածության համաձայն, այլեւ անվճար ապահովել ենք բոլոր այն աջակցությունները, որոնք կարող էինք, մասնավորապես՝ սոցիալական գովազդներն ու այն հատվածները, որոնք կարողացել ենք մեր ՊՈԱԿ-ների միջոցով անել»,- ասաց Մակունցը:

ՀԺ-ի ճշտող հարցին, թե արդյո՞ք տրամադրվող գումարը 140 հազար դոլարի սահմաններում է եղել, Մակունցը ժխտեց, ասելով, որ գումարն այդքան չի եղել, ավելի քիչ է եղել: Վերջինս չցանկացավ հստակ թիվ նշել, ասելով, որ դահլիճների գումարն են տրամադրել եւ մի քանի փոքր հարցեր են կարգավորել:

«Ինչ վերաբերում է որոշակի խնդիրներին, ապա ասեմ, որ Հայաստանում կազմակերպիչներն ունեցել էին հովանավոր, որոնք խոստացել էին միջոցառման իրականացման համար ֆինանսավորել, սակայն վերջին պահին հրաժարվել էին: Մշակույթի նախարարության մեղքով միջոցառումից որեւէ հատված դուրս չի մնացել, ավելին, այն ինչ-որ նախատեսված է եղել՝ արել ենք թե՛ բանակցությունների, եւ թե՛ տեղափոխման աշխատանքների հետ կապված: Նույնիսկ գովազդները, որոնք կարող էին ահռելի թվեր արժենալ իրենց համար՝ մենք ենք արել»,- ասաց Լիլիթ Մակունցը:

Ցուցահանդեսի մտահղացման հեղինակ եւ կազմակերպիչ «Shaula International» ՍՊԸ-ի գործադիր տնօրեն Ֆաբիո Լենցին ՀԺ-ի հետ զրույցում բացառեց Մակունցի հայտարարությունը՝ ՀՀ-ում հովանավորներ ունենալու հետ կապված:

Ֆաբիո Լենցին նշեց, որ իրենք ի սկզբանե ոչ մի բարերարի հետ գործ չեն ունեցել, եւ միակ պայմանավորվածությունը մշակույթի նախարարության հետ է եղել: «Մենք ավելի մեծ աջակցություն էինք սպասում մշակույթի նախարարությունից, ոչ միայն ֆինանսական, այլ՝ ընդհանուր: Այս ընթացքում հասել էինք մի փուլի, երբ ստիպված պետք է չեղյալ համարեինք միջոցառումը, բարեբախտաբար, գտնվեցին աջակիցներ եւ մեր ընկերների հետ միասին մեզ հնարավորություն տվեցին այն իրականացնել»,- ասաց Ֆաբիո Լենցին:

Ինչ վերաբերում է մշակույթի նախարարության ֆինանսավորմանը, ապա նախաձեռնության հեղինակն ասաց. «Մենք մի քանի բարեգործական հիմնադրամների աջակցությամբ ենք իրականացրել, որոնք միայն ֆինանսական աջակցություն չէ, որ ցուցաբերել են մեզ»:

Մեր հարցին, թե ճի՞շտ են այն տեղեկությունները, որ մշակույթի նախարարությունը վերջին պահին է հրաժարվել ֆինանսական աջակցություն տրամադրել, Ֆաբիո Լենցինն ասաց. «Մշակույթի նախարարությունը մեզ օգնել է այնքանով, որքանով կարողացել է, իսկ ինչ վերաբերում է ֆինանսի չափին, ապա չեմ կարծում, որ կոռեկտ է այդ թիվը բարձրաձայնելը: Պարզապես կասեմ, որ մենք մշակույթի նախարարությունից ավելի մեծ աջակցություն էինք սպասում՝ բոլոր առումներով»:

Վերջինս քմծիծաղով խոսեց մշակույթի նախարարության կողմից տրամադրված գումարի մասին, նշեց, որ այն խոստացվածի 1 տոկոսն է կազմում, որից բացի նախարարությունը աջակցել է՝ 3 անվճար տարածք տրամադրելով, դրանք են՝  Ազգային պատկերասրահ, Նկարիչների միություն եւ Ա. Խաչատրյանի տուն-թանգարան:

Ֆաբիո Լենցինի փոխանցմամբ՝ հրավիրյալ արվեստագետների մեծ մասն առաջին անգամ է Հայաստան գալու: Եվ ծրագրի հիմնական նպատակն է, որը արվեստագետները կիսվեն իրենց փորձառությամբ:

«Մշակութային փորձի փոխանակում պետք է լինի, ուստի շատ կարեւոր էր այս արվեստագետներին հրավիրել Հայաստան: Հիմնական նպատակներից մեկն էլ այն է, որ ցանկացած արվեստագետ, որն այս ծրագրին է մասնակցում՝ այստեղի հետ կապված որեւէ անելիք ունենա: 70 մասնակիցը սեմինարներ պետք է անցկացնեն ուսանողների հետ, կամ գոնե մեկ շաբաթ պետք է ապրեն Հայաստանում՝ այստեղի հետ կապն ամրապնդելու համար»,- ասաց Ֆաբիո Լենցին:

Վերջինս նշեց, որ մեկ ամիս տեւող ցուցահանդեսի շրջանակներում տարբեր մտահղացումներ են իրականացվելու, եւ քանի որ ծրագիրը համընկնում է Ֆրանկոֆոնիայի՝ Երեւանում կայանալիք գագաթաժողովի հարակից միջոցառման եւ Երեւան քաղաքի ծննդյան 2800-ամյակի տոնակատարությունների հետ՝ Կանադայից հրավիրել են արվեստագետ, որն այդ միջոցառումների շրջանակներում է ստեղծելու իր արվեստի գործն ու նվիրաբերելու է Հայաստանին:

Ցուցահանդեսը եւ ծրագիրը ներառում են յոթ վայր, որոնց թվում են հետեւյալ մշակութային օջախները՝ Նորարար փորձառական արվեստի հայկական կենտրոն, Արամ Խաչատրյանի տուն-թանգարան, Գաֆէսճեան արվեստի կենտրոն, Հայ-Արտ մշակութային կենտրոն, Հայաստանի նկարիչների միություն, Ա. Սպենդիարյանի անվան օպերայի եւ բալետի ազգային ակադեմիական թատրոն, Հայկական բարեգործական ընդհանուր միություն:

Ցուցահանդեսը մեկտեղում է ժամանակակից կերպարվեստը, քանդակագործությունը, լուսանկարչությունը, տեսանյութեր, աշխարհահռչակ պատկերասրահներից եւ հավաքածուներից փոխառված հանրահայտ գործեր, նկարիչների կողմից տեղում պատվերով կատարված գործեր:

Հրավիրյալ մի շարք նկարիչներ պրեզենտացիաներ եւ աշխատաժողովներ կանցկացնեն Հայաստանի գեղարվեստի ակադեմիայի, Թերլեմեզյանի անվան գեղարվեստի պետական քոլեջի եւ Ստեղծարար տեխնոլոգիաների Թումո կենտրոնի սաների հետ: Միջոցառումը նպատակ ունի ցուցահանդեսի, աշխատաժողովների եւ պրեզենտացիաների միջոցով Հայաստանում ձեւավորել միջազգային գեղարվեստական բանավեճի եւ մշակութային փոխանակման մթնոլորտ:

Տպել
3897 դիտում

Սուր դանակը մեզ պետք է հաց կտրելու, ոչ թե վնասելու համար․ պատգամավորը՝ դատավորների բարեվարքության ստուգման նախագծի մասին

Իրավապահների անգործությունը կամ ինչպես դառնալ միլիոնատեր ուրիշի անձնագրով. ֆեյսբուքյան օգտիրոջ պատմությունը

Նոյեմբերի 25-ից ավտոմեքենաների մաքսազերծման գործառույթն ամբողջովին կտեղափոխվի Գյումրի քաղաք

«Խառը զգացմունքներ». պրեմիերա Երեւանի Կ. Ստանիսլավսկու անվան ռուսական թատրոնում

Հարկերի մասին մատչելի տեղեկատվությունն արդեն հասանելի է էլեկտրոնային հարթակում

Եվրասիական զարգացման բանկը նպատակ ունի ընդլայնել իր գործունեությունը Հայաստանում. էկոնոմիկայի նախարարություն

Փաշինյանին տեղեկություն տվողները կամ գիտությունից բան չեն հասկանում, կամ ակադեմիայի թշնամիներն են. Ռադիկ Մարտիրոսյան

Սիմֆոնիկ նվագախումբը կներկայացնի Ջեքսոնի հիթերը դասական մոտեցմամբ. համերգը նախորդ տարի հետաձգվել էր

ԱՄՆ Սենատում երկրորդ անգամ է վետո դրվել Հայոց ցեղասպանությունը ճանաչող բանաձևի վրա

Նոր օրինագծով հայոց լեզվի քննությունը բուհ ընդունվելիս պարտադիր կլինի, իսկ մինչ այդ խախտվում է «Լեզվի մասին» օրենքը

Չարենցավանի բժշկական կենտրոնի շուրջ 15 տարի լքված մասնաշենքը հիմնանորոգվել է

Իսրայելի գործող վարչապետ Բենյամին Նեթանյահուին պաշտոնական մեղադրանք է առաջադրվել

Փոքր եւ միջին ջերմատնային տնտեսությունների ներդրման պետական աջակցության ծրագիրը բացասական կողմեր չունի. գյուղատնտես

ԱԻՆ գլխավոր քարտուղար Վահագն Օհանյանը շրջայց է կատարել հրշեջ-փրկարարական ջոկատներում. ԱԻՆ

Քննարկվել են «Կուսակցությունների մասին» ՀՀ օրենքում առաջարկվող փոփոխությունները

ԱԻՆ-ում տեղի ունեցավ պաշտոնների նշանակման և հերթական կոչումների շնորհման հանդիսավոր արարողություն

Աղմուկ հանած եւ Կինոկենտրոնից 16 միլիոն դրամ ստացած «Չնչիկ»-ն այս տարի էլ մեծ էկրան չի բարձրանա

Վանաձորի՝ անձրեւի ժամանակ հեղեղվող դպրոցի տանիքը վերջապես կփոխվի (լուսանկարներ)

Նախագահ Արմեն Սարգսյանը հանդիպել է Ուկրաինայի վարչապետ Օլեքսի Հոնչարուկին

Խաշմանյանը պետք է ներողություն խնդրեր երկրպագուներից ու հրաժարական տար. Լեւոն Պաչաջյան