Մենք չենք կարող ամեն ինչ մեղսագրել նախագահին, որովհետեւ նա եղել է նախագահ. փաստաբան

«Մենք դիմել ենք վարույթն իրականացնող մարմնին՝ մեր պաշտպանյալի հանդեպ հետապնդումը դադարեցնելու համար: Քոչարյանն ունի անձեռնմխելիություն տվյալ հետապնդումից: Սա նշանակում է, որ առաջադրված մեղադրանքը չի կարող քննվել, որովհետեւ դրանք նախագահի գործողություններ են, ավելի կոնկրետ՝ պետության գործողություններ, իսկ Սահմանադրության համաձայն՝ նախագահն ունի անձեռնմխելիություն»,- այս մասին այսօր հայտարարեց Ռոբերտ Քոչարյանի փաստաբան Արամ Օրբելյանը՝ անդրադառնալով Քոչարյանի մեղադրանքին:

Քոչարյանի մյուս փաստաբանը՝ Հովհաննես Խուդոյանը, նշեց, որ անկախ նրանից՝ քրեական հետապնդումը կդադարեցվի, թե՝ ոչ, մեղադրանքն իրավաչափ է, թե՝ ոչ, բայց քանի չկա խափանման միջոց, մեղադրյալի անձնագիրը չպիտի պահվի. «Սա օրենքի խախտում է, որը պիտի հետեւանքներ առաջացնի կարգապահական ոլորտում»,- ասաց Խուդոյանը:

Քոչարյանի փաստաբաններն անդրադարձան նաեւ ՀՔԾ պետ Սասուն Խաչատրյանի այն հայտարարությանը, որտեղ վերջինս Քոչարյանի ազատ արձակումը որակել էր ապօրինի: Փաստաբանների խոսքով՝ իրենք որոշումը ստացել են դատարանի կողմից այն հրապարակելուց մի քանի օր հետո. «Եվ քանի մենք դատարանի որոշման տեքստը չենք տեսել, իրավունք չենք վերապահել հիմնավորվածության մասին գնահատական տալ, հետո ենք գնահատել, ու որոշ հարցերի համար բերել ենք վճռաբեկ բողոք: Իսկ ՀՔԾ պետը միանգամից հաստատել է, որ դա ապօրինի է»,- ասացին Քոչարյանի փաստաբանները:

Փաստաբան Օրբելյանը կրկին անդրադարձավ անձեռնմխելիությանը. «Ուզում եմ հստակ լինի՝ անձեռնմխելիությունը չի նշանակում, որ կա հանցանք, չկա պատիժ: Դա նշանակում է, որ անձեռնմխելիությունից ելնելով՝ գործողություններ են արվել, ու եթե այն արարքը, ինչի համար ուզում են պատասխանատվության ենթարկել, արվել է՝ ելնելով այդ անձեռնմխելիությունից, այդ գործը չպիտի քննվի»,- ասուլիսի ժամանակ ասաց Քոչարյանի փաստաբանը:

Հովհաննես Խուդոյանը՝ Ռոբերտ Քոչարյանի մյուս պաշտպանը, հավելեց, որ եթե, ինչպես հայտարարում է ՀՔԾ պետը, դատավորը իր լիազորությունները սահմանազանցել է, դա հիմք է, որ դատավորի նկատմամբ քրեական հետապնդում սկսվի. «Խնդրում եմ՝ հարցը ուղղեք ՀՔԾ պետին: Բացի այդ՝ ինչո՞ւ չեն կատարել որեւէ գործողություն: Չեն կատարել, որովհետև այդ հայտարարությունն անհիմն է»,- ասաց Խուդոյանը:

Քոչարյանի փաստաբանները հայտարարում են, որ Քոչարյանի բոլոր գործողությունները արվել են իր լիազորությունների սահմաններում եւ Սահմանադրության համաձայն՝ անձեռնմխելիությամբ, եւ դրա համար նախագահը չպիտի ենթարկվի քրեական հետապնդման:

«Հայկական ժամանակ»-ի հարցին՝ 2008 թվականին Քոչարյանը հայտարարել է, որ տեսագրություններ կան, որտեղ ցուցարարները դուրս են գալիս ավտոբուսների հետեւից, կրակում են իրավապահների վրա, նորից անցնում են ավտոբուսների հետեւը, այդ տեսագրություններն ու ինֆորմացիան Քոչարյանի կողմից նախաքննական մարմին ներկայացվե՞լ են, փաստաբան Օրբելյանը պատասխանեց.

«Գործի նյութերի պարունակությանը հետո կանդրադառնանք, հիմա չեմ կարող ասել՝ ինֆորմացիոն ինչ նյութեր կան գործում: Եթե գործը կհասնի դատարան, ուր կարիք կլինի գնահատել գործի նյութերը, կգնահատենք: Հիմա անմեղության կանխավարկածի հիմք է, որ անձը ինքը չպիտի ապացույցներ ու հիմքեր բերի, որ ինքն անմեղ է: Հետո կքննարկենք, կհասկանանք՝ ինչ փաստաթղթեր, ինչ նյութեր կան»,- ասաց Օրբելյանը:

Վերջինիս լրացրեց մյուս փաստաբանը՝ նշելով, որ ցանկացած անձ հրապարակային կարող է հայտնել տեղեկություն, բայց որևէ մեկն իրավունք չունի ասել, թե ինչ է հայտնել վարույթ իրականացնող մարմին կամ հարցաքննվել է, թե՝ ոչ. «Որովհետև նման տեղեկատվության հրապարակումը կլինի նախաքննության տվյալների հրապարակում: Դա կարող է անդրադառնալ նաեւ այլ վկայի վրա, նման ինֆորմացիան անթույլատրելի է հրապարակել»,- ասաց Խուդոյանը:

Փաստաբանները եւս մեկ անգամ հայտարարում են, որ Մարտի 1-ի այս գործը մահերի հետ կապ չունի: Ինչ վերաբերում է ներքաղաքական գործողություններին զորքերը ապօրինի ներգրավելուն, սահմանադրական կարգը տապալելու մեղադրանքին, Քոչարյանի պաշտպան Արամ Օրբելյանը ասաց, որ զորքերը ներգրավելը գործողություն չէ, հետեւանք է. «Եւ մենք չենք կարող ամեն ինչ մեղսագրել նախագահին, որովհետեւ նա եղել է նախագահ»,- ասաց Քոչարյանի փաստաբանը: