Գյումրիում բացվել է Հայաստանում առաջին «Երիտասարդների տուն»-ը

Գյումրիում եզակի գաղափար է կյանքի կոչվել: Երիտասարդական նախաձեռնությունների կենտրոնի կողմից իրականացվել է «Երիտասարդների տուն» բաց երիտասարդական ծրագիր»-ը, որի շրջանակներում Հայաստանում առաջին «Երիտասարդների տուն»-ն է բացվել:Այստեղ օրվա ցանկացած ժամի կարող են այցելել Շիրակի մարզի եւ Գյումրու 13-ից 18 տարեկան երիտասարդները: Նրանք ոչ ֆորմալ կրթություն ստանալու հնարավորություն ունեն տարբեր դասընթացների, խաղերի եւ ուղղակի շփումների միջոցով: Ծրագիրը ֆինանսավորվել է Եվրոպական միության կողմից, տարածքը կազմակերպությանը հատկացրել է  Գյումրու քաղաքապետարանը՝ անհատույց, 10 տարի ժամկետով: «Երիտասարդների տան» գաղափարը դուր եկավ ՀՀ Սպորտի եւ երիտասարդության հարցերի նախարարի տեղակալ Քրիստինե Ասատրյանին: Ասաց՝ Գյումրիում գործունեություն ծավալող Երիտասարդական նախաձեռնությունների կենտրոնն այսուհետ ինչ առաջարկություն ու ծրագիր ներկայացնի, նախարարությունը կաջակցի, քանի որ նրանց կողմից իրականացվող ծրագրերը դրված են նաեւ նախարարության քաղաքականության հիմքում: Աշխատանքի եւ սոցիալական հարցերի նախարարությունը եւս պատրաստ է կանգնել այս գաղափարի տարածման կողքին: Նախարարի տեղակալ Արման Ուդումյանն ասաց՝ նորաբաց «Երիտասարդների տուն»-ն ուղղակիորեն օժանդակություն է պետության կողմից իրականացվող խնամքի եւ մանկատների բեռնաթափման ծրագրին:«Մենք այսօր խնդիր ունենք ենթակառուցվածքների, խնդիր ունենք մասնագիտական ներուժի եւ խնդիր ունենք աշխարհագրական առումով մարզային եւ համայնքային մակարդակում նման կենտրոններ ունենալու: Գյումրու այս կենտրոնի մոդելը հետաքրքիր կլինի նախարարության համար նաեւ այլ տեսանկյունից: Պետք է այն ուսումնասիրենք, բայց ես տեսա փաստաթղթերում ծախսային արդյունավետության հաշվարկները: Դրանք շատ կարեւոր կլինեն նախարարության համար նույնպես, որպեսզի մենք էլ հետագայում ունենանք նմանատիպ ցերեկային կենտրոններ, որտեղ կկարողանան այցելել նաեւ խնամքի տներից եւ մանկատներից տուն վերադարձած երեխաները»,-ասաց Ուդումյանը:Նախարարությունների ներկայացուցիչները նաեւ նշեցին, որ այդ աշխատանքներում իրենք կունենան «Երիտասարդների տան» հեղինակների օգնության կարիքը: ԵՆԿ հկ նախագահ Արթուր Նաջարյանը վստահեցրեց, որ ոչ միայն կաջակցեն տեսական մասով, այլեւ գործնականում կկանգնեն նախարարությունների կողքին՝ աշխատանքների կազմակերպչական մասով, որովհետեւ այսօր նման կենտրոններ ունենալն ուղղակի անհրաժեշտություն է:ՀՀ ԿԳ նախարարի տեղակալ Լուսինե Առաքելյանն էլ ընդգծեց, որ Գյումրիում նմանատիպ մի քանի կենտրոն պետք է բացել, որպեսզի ավելի մեծ թվով երիտասարդներ ինքնակրթվելու, զարգանալու, փողոցից կտրվելու հնարավորություն ունենան: Այս մասին արդեն մտածել են գաղափարի հեղնակները: Նորաբաց կենտրոնը 600 երիտասարդի հաշվարկով էր պլանավորված եւ նախատեսված էր օրական 20-25 երիտասարդի այցի համար: Չնայած Երիտասարդների տունը բացվել է Գյումրու երկրորդական թաղամասերից մեկում, օրական 40-ից 50 այց է լինում: Ըստ Ծրագրի ղեկավար Աննա Եղոյանի, կենտրոն այցելած երիտասարդն ունի բոլոր հնարավորությունները ինքնակրթվելու, զարգանալու, սեփական գաղափաները կյանքի կոչելու համար: Այստեղ նրանք կարողանում են վերաարժեւորել իրենց, դառնալ ինքնավստահ: Սա բարդ աշխատանք է նաւ հոգեբանական տեսանկյունից: Կենտրոն են այցելում ամենատարբեր սոցիալական խմբերի պատանիներ եւ երիտասարդներ, տարբեր կեցության եւ  զբաղվածության: Հիմնական նպատակը, որը որդեգրել է ԵՆԿ-ն, այն է, որ կենտրոն մտած երիտասարդին ցույց տա ճիշտ ապրելու, այս կյանքում ուղիղ ճամփով քայլելու, սեփական ես-ն ունենալու անհրաժեշտությունը:«Երիտասարդների տան»-ը երիտասարդներին ամեն ինչ թույլատրվում է: Բայց հստակ սահմանափակումներ կան. կենտրոնում արգելվում է ալկոհոլ օգտագործելը, ծխել, վիճելը, միմյանց նվաստացնելը: Երիտասարդների տուն չբերել վատ սովորույթներ: Սա առաջին եւ կարեւոր նախապայմանն է: