Ես, ճիշտն ասած, 4 տարի է «Գյումրի Գարեջուր» չեմ մտել. Սամվել Բալասանյան

Գյումրիում շարունակվում են տարաբնույթ խոսակցությունները՝ կապված քաղաքապետ Սամվել Բալասանյանի ընտանիքին պատկանող բիզնեսներից մեկում՝ «Գյումրի Գարեջուր» ընկերությունում հայտնաբերված չարաշահումների հետ: «Ճիշտն ասած, աշխատողները մոտեցել են, թե ճի՞շտ է, որ ուզում են գործարանը փակել, էսպիսի խոսակցություններ, ճիշտն ասած, տրամաբանական չէ, սա միակ գործարանն է աշխատող, ուզում են փակել, բան, էդպիսի տպավորություն թող չստեղծվի, որովհետեւ սովորական ստուգում է, սովորական»,- ասաց Սամվել Բալասանյանը:

Ըստ նրա՝ «Գյումրի Գարեջուր»-ը լուրջ հարկատու է: Շիրակի մարզում առաջին հարկատուն է, եւ տարեկան 1.8-ից 2 մլրդ գումար է վճարում:  Ըստ Բալասանյանի, սա այն գումարի չափն է, որը Գյումրին որպես սուբսիդիա է ստանում կենտրոնական բյուջեից:

ՊԵԿ տեղեկատվության համաձայն, ընդհանուր առմամբ, «Գյումրի Գարեջուր» ընկերությունը պետական բյուջե պակաս է վճարել շուրջ 360 մլն դրամ, որից մոտ 210 միլիոն դրամ` ակցիզային հարկ, եւ ավելի քան 150 մլն` շահութահարկ: Ընկերությունն իր արտադրանքը հիմնականում իրացրել է փոխկապակցված ընկերությունների միջոցով` կիրառելով ոչ շուկայական գներ: Բացի այդ, ստուգումների կազմակերպման եւ դիտարկման վարչությունից ստացված հաղորդման համաձայն` «Գյումրի Գարեջուր» ընկերությունը ծառայություններ է ձեռք բերել շրջանառության հարկ վճարող անհատ ձեռնարկատերերից: Մինչդեռ նախնական ուսումնասիրությունը կասկած է հարուցում, որ ծառայություններն իրականում չեն մատուցվել, սակայն նվազեցվել են համախառն եկամտից: Հարկային պարտավորությունների նախնական հաշվարկի համաձայն` «Գյումրի-Գարեջուր» ՍՊԸ կողմից չհաշվարկված հարկի գումարը գերազանցում է նվազագույն աշխատավարձի տասնհինգհազարապատիկի չափը: Հրապարակված այս տեղեկատվությունը Բալասանյանը ո՛չ հերքեց, ո՛չ հաստատեց: Վստահեցրեց, սակայն, որ, եթե ինչ-որ խախտումներ լինեն, կպարզաբանեն, եւ, ըստ Բալասանյանի, բնականաբար ամեն ինչ իր տեղը կընկնի:

«Ես չգիտեմ, ճիշտն ասած, 4 տարի երեւի «Գյումրի Գարեջուր» չեմ մտել, բայց եթե կան էդպիսի բաներ, բերեք ես մանրամասների մեջ չմտնեմ, հետաքննություն է գնում, բերեք չխանգարեմ: Հիմա ամենակարեւոր խնդիրն այն է, որ էն իրականությունը, որը կա, բացահայտվի, որպեսզի հասկանանք: Պարզ է, պետք է ստուգեն, բոլոր տեղերը ստուգում են, ես ամեն օր ծանուցում եմ տալիս քաղաքի բնակիչներին, որպեսզի իրենց հարկերն ու տուրքերը, գույքահարկը, հողի հարկը մուծեն: Ո՞նց կարող ենք հարկ չհավաքել եւ գոյատեւել: Ի՞նչ կարեւոր է՝ գարեջուրն է, թեթեւ արդյունաբերությունն է, բոլորը պետք է մուծեն: Էնտեղ ձեւակերպումներ կան, խաղի այլ  կանոններ կան եւ այլն, որը ինչ-որ տեղ տարբեր բաներ է առաջացրել, բայց հիմա դա կապ չունի: Կա օրենք, բոլորս պետք է ենթարկվենք եւ մուծենք: Եթե ինչ-որ պատժելու մարդ կա, պետք է պատժել, եթե հարկը չեն մուծել, պետք մուծեն, բոլորս պետք է անենք դա»,- ասաց Սամվել Բալասանյանը:

«Գյումրի Գարեջուր» ընկերության նախագահը Սամվել Բալասանյանի ավագ որդի Միսակ Բալասանյանն է: Տնօրենը՝ ընտանիքի բարեկամ Արշալույս Սանոյանը: Այս պարագայում ինչպե՞ս կարող էր Բալասանյանը չիմանալ ընկերության ֆինանսական խնդիրների մասին: «Ի՞նչ կապ ունի իմ որդին, ի՞նչ է, ես իմ որդուն ասել եմ՝ հարկը չմուծե՞ս: Որեւէ մեկի մտքով չանցնի էդպիսի բան, մենք ազնիվ բիզնես աշխատող ենք եղել, մենք կույտերի միջից ենք հառնեցրել այդ գործարանը, եւ ոչ միայն դա: Երբ հետաքննությունն ավարտվի, ամեն ինչ պարզ կդառնա, բայց ես վստահ եմ, որ դա 2016 թվականի թվերի մասին է խոսքը»,-ասաց Սամվել Բալասանյանը:

Նշենք, որ 2016 թվականի նոյեմբերին ՀՀ տնտեսական մրցակցության պաշտպանության պետական հանձնաժողովը «Գյումրի-Գարեջուր» ընկերությունում արձանագրել էր որոշ խախտումներ: Մասնավորապես՝ ընկերությունը նվազեցրել էր հարկային պարտավորությունները: Գարեջրի շուկայի ուսումնասիրության ընթացքում հանձնաժողովը բացահայտել էր նաեւ «Գյումրի-Գարեջուր» ընկերությունում գնային բարձրացում, ՏՄՊՊՀ-ը պահանջել էր ներկայացնել համապատասխան հիմնավորումներ: Ըստ ընկերության ներկայացրած պարզաբանման, ծախսերի ավելացումը հանգեցրել է ինքնարժեքի բարձրացմանը: Հանձնաժողովը, սակայն ընդգծել էր, որ ընկերության կողմից ներկայացված փաստաթղթերում նշված ծախսերն ուռճացված են եւ ունեն ձեւական բնույթ: 2016 թվականին ՏՄՊՊ-ն գործն ուղարկել էր ՊԵԿ:

Այս պահին ՊԵԿ իրավախախտումների հայտնաբերման եւ վարչական վարույթների իրականացման վարչության հետաքննություն բաժնում հարուցվել է քրեական գործ` ՀՀ քրեական օրենսգրքի 205-րդ հոդվածի 2-րդ մասով նախատեսված հանցագործության հատկանիշներով` առանձնապես խոշոր չափի հարկը չվճարելու նպատակով օրենքով սահմանված հաշվետվությունում ակնհայտ կեղծ տվյալ մտցնելու դեպքի առթիվ: Հետաքննության բաժնի եւ օպերատիվ հետախուզության վարչության աշխատակիցների համատեղ գործողությունների ընթացքում դատարանի որոշման հիման վրա կատարված խուզարկությամբ հայտնաբերվել եւ առգրավվել են քրեական գործի համար կարեւոր նշանակություն ունեցող փաստաթղթեր, համակարգիչներ, կրիչներ եւ հաշվապահական այլ փաստաթղթեր: Հետաքննությունը շարունակվում է: