Շմայսը դժվար թե կարողանա հիմնավորել իր ֆինանսական կարողության ծագման օրինականությունը

Նախօրեին ԱԱԾ բերման ենթարկված ԱԺ նախկին պատգամավոր Առաքել Մովսիսյանի տան խուզարկությամբ հայտնաբերված մի քանի զենքերը օրինական էին: Սակայն հետագայում պարզվել է, որ նա, այնուամենայնիվ, ապօրինի զենք ու զինամթերք է թաքցրել: Երեկ ՀՀ Ազգային անվտանգության ծառայությունը հաղորդագրություն տարածեց այդ մասին:

«Օպերատիվ-հետախուզական միջոցառումների արդյունքում ստացված տվյալների հիման վրա նախապատրաստված նյութերով ՀՀ ԱԱԾ քննչական վարչությունում հարուցվել է քրեական գործ՝ ՀՀ քրեական օրենսգրքի 235-րդ հոդվածի 2-րդ մասի հատկանիշներով, այն է՝ մի խումբ անձանց կողմից նախնական համաձայնությամբ հրազեն ու ռազմամթերք ապօրինի կերպով ձեռք բերելը, փոխադրելը եւ պահելը: Վերոհիշյալ քրեական գործի շրջանակներում 2018 թվականի հուլիսի 21-ին խուզարկություններ են իրականացվել Առաքել Մովսիսյանի տանը, ինչպես նաեւ զենք-ռազմամթերք տեղափոխելու եւ պահելու հնարավոր վայրերում: Խուզարկությամբ հայտնաբերվել է ենթադրաբար օրինական զենք եւ ռազմամթերք՝ գրանցման փաստաթղթերով:

Առաքել Մովսիսյանը հուլիսի 21-ին բերվել է Ազգային անվտանգության ծառայության քննչական վարչություն, որտեղ նրան են ներկայացվել զենքի ապօրինի շրջանառության իր ներգրավվածության վերաբերյալ անառարկելի տվյալներ: Ինչպես նաեւ պարզաբանվել են դրանք ինքնակամ հանձնելու դեպքում օրենքով սահմանված կարգով պատասխանատվությունից ազատվելու հիմքերը, ինչից հետո՝ բացատրական աշխատանքների արդյունքում, վերջինս պատրաստակամություն է հայտնել՝ հանձնելու դեռեւս Արցախյան ազատամարտի տարիներին ապօրինի կերպով ձեռք բերված եւ պահած զենքն ու ռազմամթերքը:

Նույն օրը՝ ժամը 23:00-ի սահմաններում, Առաքել Մովսիսյանն Այգեկ գյուղի ամայի տարածքում գտնվող երկու տարբեր թաքստոցներից՝ հողածածկույթի տակից հանել ու կամովի հանձնել է զենքն ու ռազմամթերքը, մասնավորապես՝ «ԱԿՄ» տեսակի 2 ինքնաձիգ, որից մեկը՝ փողատակային նռնականետով, «ՌՊԿ» տեսակի մեկ գնդացիր, «Բելկա» տեսակի 1 համակցված հրացան, 3 որսորդական հրացան, տարբեր տրամաչափի թվով 162 փամփուշտներ:

Զենքն ու ռազմամթերքը կամովին հանձնելու հիմքով Առաքել Մովսիսյանը ազատ է արձակվել: Կատարվում է նախաքննություն, նշանակվել են համապատասխան փորձաքննություններ, միջոցներ են ձեռնարկվում՝ հայտնաբերված զենքի օգտագործումն այլ հանցագործություններում ստուգելու ուղղությամբ:»,- ասված էր ԱԱԾ հաղորդագրության մեջ:

Շմայս մականունով Առաքել Մովսիսյանը, ինչպես պարզ է դառնում երեկ «Ազատություն» ռադիոկայանի թղթակցի հետ նրա ունեցած զրույցից, շատ երջանիկ էր, որ ազատության մեջ է: Թղթակցի հարցերին ի պատասխան նա ասում էր, թե ԱԱԾ աշխատակիցները «մի հատ անօրինական բան չեն արել»,  «շատ շնորհքով ներխուժել են» իրենց տուն, այնքան շնորհքով, որ «ոչ մի երեխա չի վախեցել տանը»...: Ընդ որում, Առաքել Մովսիսյանը նույնիսկ շնորհակալ է ԱԱԾ-ից: «Ես շատ շնորհակալ եմ ազգային անվտանգությունից, նախկինում նման բաներ չեն եղել, վայրագություններ ա եղել էն ժամանակ...»,- ասել է նա:

Շատ ուշագրավ տրանսֆորմացիա է ապրել ՀՀԿ խորհրդի անդամ Առաքել Մովսիսյանը վերջին շրջանում: Ընդամենը ապրիլի վերջին, մինչեւ Սերժ Սարգսյանի հրաժարականը, երբ Հայաստանում անց էին կացվում զանգվածային անհնազանդության ակցիաներ, Շմայսը ստանձնել էր Երեւանը արմավիրցի ցուցարարներից պաշտպանելու գործառույթը: Նա իր «համախոհների» հետ այդ օրերին փակում էր այսպես կոչված Արգավանդի խաչմերուկը՝ խոչընդոտելով Արմավիրի մարզից Սերժ Սարգսյանի հրաժարականը պահանջող մարդկանց հոսքը դեպի Երեւան: Բացի այդ, ըստ որոշ տեղեկությունների, կազմակերպում եւ համակարգում էր սադրիչների խմբեր, որոնք մինչեւ Սերժ Սարգսյանի հրաժարականը տեղի ունեցած հանրահավաքների ժամանակ սադրում էին բախումներ ոստիկանության հետ: 

Առաքել Մովսիսյանը այս պահին իրավապահներին հետաքրքրում է միայն ապօրինի զենք- զինամթերք պահելու տեսանկյունից: Այս պահին: Թե հետագայում ուրիշ ինչ տեսանկյունից կհետաքրքրի, դեռ հայտնի չէ: Միայն նշենք, որ նա տարիներ շարունակ երեւանամերձ մի քանի գյուղերում իրեն զգացել է տերուտիրական, «վերահսկել է» բոլոր ընտրական գործընթացները: Նրա անվան հետ են կապվում բազմաթիվ «օբյեկտներ», ունի բավական ծանրակշիռ ֆինանսական կարողություն, որի ծագման օրինականությունը դժվար թե կարողանա հիմնավորել: