Սահմանամերձ դպրոցի ուսուցիչներն անակնկալ են պատրաստել շրջանավարտների համար. նրանք կպարեն

Հայաստանի հանրակրթական ուսումնական հաստատություններում այսօր՝ մայիսի 25-ին, հնչելու է վերջին զանգը: Ի տարբերություն մայրաքաղաքի դպրոցների, որտեղ շրջանավարտների մեծ մասը կյանքի այդ փուլը եզրափակում է ճոխ ու շռայլ՝ անկախ այն բանից՝ ընտանիքներն ունեն այդ միջոցները թե չէ եւ անկախ այն բանից՝  որքանով է դա համատեղելի օրվա խորհրդի հետ, հատկապես սահմանամերձ բնակավայրերում «Վերջին զանգի» միջոցառումներն անցկացնում են չափազանց զուսպ ու սահմանափակ հնարավորություններով:

Երեկ մենք հարցումներ անցկացրինք սահմանամերձ շուրջ 20 համայնքում: Այստեղ գործող դպրոցներում շրջանավարտների առավելագույն թիվը 10-ն էր: 12-րդ դասարանում այդքան աշակերտ կա Տավուշի մարզի Վերին Կարմիրաղբյուր գյուղում: Իսկ ահա Դովեղի դպրոցն ընդհանրապես շրջանավարտ չունի: Բարեկամավանում շրջանավարտների թիվը 2 է: Նույնքան երեխա դպրոցին հրաժեշտ կտա Վայոց Ձորի մարզի Խաչիկ համայնքում:

Սահմանամերձ գյուղերի դպրոցների մեծ մասում արդեն ավանդույթ է դառնում, որ «Վերջին զանգի» միջոցառումները ոչ թե տվյալ դասարանի, այլ համադպրոցական արարողություն է դառնում, որովհետեւ մեկ-երկու աշակերտի մասնակցությամբ ավարտական միջոցառում ու բեմադրություն կազմակերպել հնարավոր չի լինում եւ օգնության են հասնում ավելի ցածր դասարանները, մանավանդ որ հեռավոր շրջաններում ընդունված են նաեւ երկկոմպլեկտ ու եռակոմպլեկտ դասարանները եւ այդ երեխաներն, ինչ-որ իմաստով համադասարանցիներ են: Արդյունքում, ի դեպ, ստացվում է, որ նրանց կյանքում մի քանի «Վերջին զանգեր» են լինում: Որոշ գյուղերում էլ մեկտեղվում է շրջանավարտների հրաժեշտի եւ նոր սերնդին բարի գալուստ մաղթելու արարողությունը, եւ տոնը բազմամարդ է դառնում այդկերպ:

Այս օրերին շրջանավարտներից շատերը, պատրաստվելով «Վերջին զանգի» ու վերջին դասի միջոցառումներին, նաեւ անակնկալներ են պատրաստում իրենց ուսուցիչների համար: Տավուշի մարզի սահմանամերձ Ներքին Կարմիրաղբյուր գյուղում ուսուցիչները որոշել են շեղվել ընդունված տարբերակից ու իրենք զարմացնել աշակերտներին: Տնօրեն Նառա Պապյանը մեզ հետ հեռախոսազրույցում ասաց, որ այդ պահին մոտ տասնյակ ուսուցիչների հետ գտնվում են ուսուցչանոցում եւ գաղտնի փորձում են շրջանավարտների բեմադրած պարը, որպեսզի երբ այսօր տոնական հանդիսության ժամանակ երեխաները սկսեն իրենց պարային միքսը, ուսուցիչներն անսպասելի միանան նրանց: Ներքին Կարմիրաղբյուրում դպրոցը կավարտի 4 շրջանավարտ, որոնցից երկուսը պատրաստվում է բուհ ընդունվել: Այդ օրվա միջոցառումը շրջանավարտները կանցկացնեն 9-րդցիների հետ:

Բերքաբեր համայնքում 12-րդ դասարանն այս տարի ավարտում է 3 երեխա: «Երեք աշակերտով շատ դժվար է ինչ-որ միջոցառում կազմակերպելը: Բոլոր դեպքերում այդ օրը դարձնում ենք տոն»,- ասաց դպրոցի տնօրեն Գայանե Խուդավերդյանը՝ ավելացնելով, որ շրջանավարտներին աջակցելու են 9-11-րդ դասարանցիները: Առաջին դասարանը նույնպես ընթացիկ տարում մեկ երեխա է ավարտել, եւ նրա այբբենարանի հանդեսն էլ անցել է այլ դասարաններում սովորողների հետ համատեղ: Բերքաբերի դպրոցի տնօրենի խոսքով, շրջանավարտները, կրթօջախում անցկացվող միջոցառումներից հետո ավարտական խնջույք չեն կազմակերպում, որովհետեւ ընտանիքներն անապահով են ու նման ծախսերը նրանց համար շքեղություն է: Այս անգամ էլ բացառություն չի լինի: Տնօրեն Խուդավերդյանը տեղեկացրեց, որ անցյալ տարի դպրոցը շրջանավարտ չի ունեցել: Նախանցյալ տարի նրանց թիվը եղել է երկուսը: Ավարտական միջոցառումների գեղարվեստական մասը ծնողները լրացրել են դպրոց բերած մեկ տորթով ու շամպայնով: Ահա եւ այդ տարվա շրջանավարտների հրաժեշտի «խնջույքը»:

Համեմատաբար հիշարժան է դառնալու Մովսես գյուղի շրջանավարտների հրաժեշտը դպրոցին: Տնօրեն Ռուզաննա Ադամյանը տեղեկացրեց, որ նրանք 6-ն են: Ի դեպ, նաեւ նշեց, որ 12 տարի առաջ առաջին դասարան են ընդունվել 14 երեխա, բայց ավարտում է նրանց կեսից էլ պակասը, որովհետեւ մյուսների ընտանիքներն աստիճանաբար հեռացել են գյուղից: Դպրոցում, ըստ տնօրենի, շրջանավարտները վերջին դաս կանեն, հետո մշակույթի տանը կանցկացվի նրանց «Վերջին զանգի» միջոցառումը: Հետո արդեն երեխաները կգնան տուն: Գյուղում ընդունված է, որ այդ օրը նրանց են այցելում հարեւան-բարեկամները՝ շնորհավորելու եւ բարեմաղթանքներ ուղղելու: Ընդունված է նաեւ, որ ավարտական երեկոն (կամ կարող է դրա փոխարեն նախընտրելի համարվել էքսկուրսիան) անցկացվում է քննություններից հետո: Ռուզաննա Ադամյանն ասաց, որ ֆիզկուլտուրայի ուսուցիչը, որին դպրոց է գործուղել «Դասավանդիր Հայաստան» կազմակերպությունը, հունիսի 28-ին՝ դարձյալ քննություններից հետո երեխաների համար կազմակերպելու է եռօրյա շրջայց՝ Երեւանում:

Համեմատաբար մեծ է Այգեձորի դպրոցի շրջանավարտների քանակը: Նրանք 9-նն են: Այստեղից ասացին, որ ավարտական միջոցառումը կազմակերպվում է շատ համեստ՝ մի սովորական դասաժամի ընթացքում: «Սովորաբար վերջին դասից հետո շրջանավարտներն անտառ են գնում, ուրախանում՝ դասղեկի եւ մի խումբ ուսուցիչների հետ»,- նշեց դպրոցի տնօրենը:

Տպել
2298 դիտում

Երեք շաբաթ անց՝ նոր համալրում բանակի շարքերում. շարունակվում է ամառային զորակոչի նախապատրաստությունը

Թբիլիսիից 10 արհեստական շնչառության սարք է գնվել, դրանք ուղարկվել են Հայաստան

Միմյանցից դժգոհելն ամենահեշտն է

Հոսպիտալացման խնդրի պատճառով այսօր ունեցել ենք մահվան առաջին դեպքը. մենք արդեն քայլում ենք դժոխքի եզրով. վարչապետ

ՊԲ հրամանատար Ջալալ Հարությունյանի նախագահությամբ անց է կացվել ՌԽ հեռավար նիստ

72 ժամով կասեցվել է ռեստորանային համալիրի գործունեությունը. մոտ 50 հանրային սննդի օբյեկտի աշխատանքը՝ 24 ժամով

Վարչապետը շնորհավորական ուղերձ է հղել Շվեդիայի վարչապետին՝ երկրի ազգային տոնի առթիվ

Գավառի արյունալի միջադեպերի հետեւանքով տուժած 5 անձինք ապաքինվել են եւ դուրս գրվել հիվանդանոցներից

«Սուրբ Հովհաննես» մատուռ բարձրանալիս քաղաքացին ընկել և վնասել է ոտքը. օգնել են փրկարարները

Քաղաքացիների ահազանգերը՝ տնտեսավարողների կասեցման հիմք․ ԱԱՏՄ-ն շարունակում է անակնկալ ստուգայցերը և կասեցումները

Ձորագյուղի մուտքի ու ելքի սահմանափակումները կգործեն այսօր, ժամը 18:00-ից սկսած՝ 2 շաբաթ շարունակ

Փոխվարչապետ Տիգրան Ավինյանը աշխատակազմին է ներկայացրել ՊԵԿ նորանշանակ նախագահին

Մնացել են փեսայի կեղծ մատնագրերի հույսին

Արցախի 10 համայնքների համար կիրառվող սահմանափակումները շարունակում են գործել, դրանք հանվել են մի շարք համայնքներում

Եսայան եղբայրները հերքում են ԱԱԾ հրավիրվելու մասին լուրը

Վանաձորի տներից մեկի բակում ականանետային արկ է հայտնաբերվել (լուսանկարներ)

Արմեն Սարգսյանը շնորհավորական ուղերձ է հղել Շվեդիայի թագավոր Կարլ Գուստավ Տասնվեցերորդին` երկրի ազգային տոնի առթիվ

Պարետի որոշմամբ կարգելափակվեն Ձորագյուղի ելքերն ու մուտքերը. 1 անձը վարակել է թաղման մի քանի տասնյակ մասնակցի. վարչապետ

Կմեկնարկի Արցախը մայր հայրենիքին կապող նոր մայրուղու շինարարությունը. պաշտոնյաները հարավային թեւում են

Կոլորադոյի Ներկայացուցիչների պալատը միաձայն ընդունել է դպրոցներում Հայոց ցեղասպանության ուսուցման մասին օրինագիծ