Երկու ամիս է աշխատանքի չեմ գնում, «Հայասի»-ն ղեկավարում է Բաղդասարյանի որդին. Հ. Մարգարյան

Մամուլը երեկ գրել էր, որ Օրինաց Երկիր կուսակցության վարչության անդամ Հովհաննես Մարգարյանը հեռացվել է կուսակցությունից եւ «Հայասի» գործարանի տնօրենի պաշտոնից: Այս գործարանը պատկանում է ՕԵԿ նախագահ Արթուր Բաղդասարյանին: Հովհաննես Մարգարյանը ՀԺ-ի հետ զրույցում ապատեղեկատվություն է որակել կուսակցությունից հեռանալու տեղեկությունները: Նա նաեւ անդրադարձել է ՕԵԿ-ի պասիվությանն ու իշխանամետ ընդդիմություն լինելու փաստին:

-Պարոն Մարգարյան, ինչու՞ եք լքել ՕԵԿ-ը եւ ազատվել «Հայասի» գործարանի տնօրենի պաշտոնից:

-Դա ակնհայտ սուտ է եւ ապատեղեկատվություն: Գյումրեցու խոսք կա՝ եզը վերցրել, տակը հորթ են ման գալիս: Իրականությունն այն է, որ ես երկու ամիս է աշխատանքի չեմ գնում՝ առողջական խնդիրներ ունեմ: Հիմա իմ բուժումն եմ շարունակում, որը մի քանի ամիս եւս տեւելու է: Այս ընթացքում տեղի ունեցավ ՕԵԿ-ի համագումարը եւ Արթուր Բաղդասարյանը տեղեկացրեց, որ ես եւս ընտրվել եմ վարչության անդամ: Ես այդ օրերին գտնվում էի բուժման մեջ եւ չէի կարող մասնակցել համագումարին: Ինչ վերաբերվում է «Հայասի» գրուպին ես գլխավոր տնօրենն եմ, բայց երկու ամիս է՝ աշխատանքի չեմ գնում եւ բնականաբար պետք է մեկը ղեկավարի: Քննարկումներից որոշում կայացվեց, որ այն ղեկավարելու է Վահան Բաղդասարյանը՝ Արթուր Բաղդասարյանի որդին: Ի դեպ, Վահանը շատ պատրաստված տղա է, գիտությունների թեկնածու, Եվրոպայում մեծ փորձ ձեռք բերած: Իսկ ես որպես այդ ընտանիքի ընկեր, հարազատ՝ Վահանի կողքը կլինեմ:

-Պարոն Մարգարյան, ՀՎԿ-ն կրկին վերանվանվեց ՕԵԿ, իսկ հիմա ինչո՞վ է զբաղվելու:

-Կուսակցությունը գտնվում էր հետընտրական փուլում եւ ավելի հանգիստ վիճակում էր: Կազմակերպչական աշխատանքների մեջ էր, բայց պետք է գնանք ակտիվացման:

-Ինչու՞ է պասիվ կուսակցությունը:

-Չէի ասի: Ոչ պասիվ է, ոչ՝ ակտիվ: Հիմա տեղափոխվում ենք մի նոր փուլ եւ ավելի ակտիվ կլինի:

-Համենայնդեպս, անմասն է մնում այս ընթացքի քաղաքական գործընթացներից:

-Ոչ մի պրոցեսներից էլ անմասն չի մնում: Պրոցեսները կատարվում են ժողովրդի կողմից տրված վստահության քվեին համապատասպխան: Ժողովուրդն ընտրել է այն իշխանությանը, որին ուզել է: Չլինելով խորհրդարանական քաղաքական ուժ, չես կարող ավելի ակտիվ լինել:

-Բայց կան ոչ խորհրդարանական ուժեր՝ Ժառանգությունը, Հանուն Հայաստան պետության ճակատը, որոնք գործողությունների պլան են մշակում, հանրահավաքներ կազմակերպում:

-Գիտեք, որ մեկ ամիս էլ դեռ չի անցել, որ ՕԵԿ-ը վարակազմավորվեց: Նոր ենք սկսում էլի: Կլինենք ակտիվ կտեսնեք:

-Պարոն Մարգարյան, ՕԵԿ-ը միշտ ընդդիմությանը մեջքից հարվածել է: Օրինակ, 2008 թվականին, երբ համազգային շարժում էր ձեւավորվել ընդդեմ իշխանության, իսկ ՕԵԿ-ն ընդդիմություն լինելով իշխանության հետ կոալիցիա կազմեց:

-Հավերժ ընդդիմություն եւ հավերժ իշխանություն չկա: Ես հակառակը կասեմ, որ միշտ ՕԵԿ-ին են թիկունքից խփել: ՕԵԿ-ը երեբեք որեւէ մեկին թիկունքից չի խփել, համագործակցել է բոլորի հետ եւ այդ համագործակցության պտուղները բոլորն են տեսել: ՕԵԿ-ի համագործակցության արդյունքում էր, որ ավանդները ետ տվեցին:

-Այս ապրիլից հետո սպասե՞նք ՕԵԿ-իշխանություն համագործակցության:

-Մենք բաց քաղաքական ուժ ենք եւ կմնանք այդպիսին: ՕԵԿ-ը միշտ որդեգրել է լավին՝ լավ, վատին՝ վատ քաղաքականություն: Եղել են լավ նախաձեռնություններ եւ անկախ նրանից, թե դա ում կողմից կլինի, մենք ի նպաստ մեր ժողովրդի անպայման աջակցելու ենք, զորակցելու ենք եւ մասնակցելու ենք եւ հակառակը:

-ՀՀԿ-ն որ առաջարկի համագործակցություն բաց ե՞ք  քննարկումների համար:

-Ես եթեներով հարցերի չեմ պատասխանում: Մեր համագործակցությունը ցանկացածի հետ ինքնանպատակ չէ, եթե բացեք եւ կարդաք 2008 թվականի հուշագիրը՝ կտեսնեք:

-Պարոն Մարգարյան, Սերժ Սարգսյանի վերջին հարցազրույցում նա ասել էր, որ եթե առաջադրեն իրեն, ապա մեկ նպատակ է հետապնդելու, որ երիտասարդ լիդերներ պատրաստի: Սա Ձեզ համար ի՞նչ ենթատեքստ ունի:

-Դա ՀՀԿ-ի մենաշնորհն է, իրենք են որոշելու, ես այստեղ ոչ մի բան չեմ տեսնում: Ինչ մնում է կադրերին տեղ տալուն՝ ես ողջունում եմ:

-Իսկ 2014-ի նրա այն հայտարարությունը, որ չի հավակնում նախագահ եւ վարչապետ դառնալուն, չի՞ հակասում այս հայտարարությանը:

-Ես չեմ ուզում տեսակետ հայտնել այս մասին, որովհետեւ մանրամասն չեմ վերլուծել ոչ այս, ոչ էլ այն հայտարարությունները: Դա ՀՀԿ-ի մենաշնորհն է, որ ընտրի վարչապետ:

 -Ինչու՞ եք համակերպվում, որ դա ՀՀԿ-ի մենաշնորհն է:

-Չենք համակերպվում, Սահմանադրությունն եմ մեջ բերում:

-Ապրիլի 9-ից 17-ը Հայաստնում գործադիր իշխանություն չի լինելու: Ընդդիմադիրներն ասում են՝ սա բացառիկ դեպք է: Ինչպե՞ս է ՕԵԿ-ն այս առիթը օգտագործելու կամ ինչու՞ իշխանափոխության քայլ չեք կատարում:

-Ես չգիտեմ ով ինչ է ասում, բայց մենք առաջիկայում ավելի կակտիվանանք: Մենք դադար ենք վերցրել, որպեսզի հավաքեինք մեր ուժերը:

Հարցազրույցը տպագրվել է «Հայկական ժամանակ» օրաթերթի մարտի 22-ի համարում: