Հենրիխ Մխիթարյանը դեպրեսիայի մեջ է. մի քանի շաբաթ է՝ ոչինչ չի գրում սոցցանցերում

«Մանչեստեր Յունայթեդի» կիսապաշտպան Հենրիխ Մխիթարյանն իր ապագայի վերաբերյալ ոչ մի ակնարկ չի անում: Բրիտանական, իտալական ու հայկական լրատվամիջոցները ողողված են նրա մասին տեղեկություններով, իսկ ինքը՝ ֆուտբոլիստը, լռում է: Մի քանի շաբաթ է՝ սոցիալական ցանցերում ոչ մի հրապարակում չի անում. ոչ տոնում է թիմի հաղթանակները, ոչ էլ հանդիպումներից առաջ հաղթական տրամադրվածություն ունենալու վերաբերյալ գրառումներ կատարում, թեեւ նախկինում նման սովորություն ուներ:

Մխիթարյանի վերջին հրապարակումը թվիթերում, ֆեյսբուքում եւ ինստագրամում եղել է նոյեմբերի 24-ին: Նա իր էջերը հանձնել էր երեխաներին՝ այդպիսով իր աջակցությունը հայտնելով Երեխաների համաշխարհային օրվա կապակցությամբ: Ժամանակավորապես էր հանձնել, սակայն այդ օրվանից դեռեւս չի վերադարձել սոցիալական ցանցեր: Նման պայմաններում դժվար է կռահել՝ ինչպես է պատրաստվում դասավորել ապագա կարիերան, սակայն մի բան պարզ է, որ բարձր տրամադրություն ունենալու ու այդ մասին սոցիալական ցանցերում կիսվելու տրամադրություն չունի: Նախկինում մեկ առիթով նշել է, որ վատ տրամադրություն ունենալու ու զայրացած լինելու դեպքում ճիշտ է համարում է ընդհանրապես չխոսել:

Նախորդ մրցաշրջանում նա նույնպես նման իրավիճակում էր, սակայն այդ մասին խոսել չէր խուսափում: Մշտապես նշում էր, որ պայքարելու է կազմում հաստատվելու ու թիմին օգտակար լինելու համար: Մամուլի ասուլիսներից մեկի ժամանակ, պատասխանելով «Հայկական ժամանակի» հարցին, ընդգծել էր, որ չի  հանձնվելու:

«Ամեն ինչ շատ լավ է: Թեեւ քիչ խաղային ժամանակ եմ ստանում, բայց դա խոչընդոտ չի կարող հանդիսանալ, որովհետեւ շատ երկար ճանապարհ եմ անցել, որպեսզի հասնեմ այստեղ: Կարծում եմ, որ ոչինչ չի կարող ինձ խանգարել իմ երազանքի հասնել ու առաջ շարժվել, քանի որ, եթե այս պարագայում ես հանձնվեմ, կստացվի, որ ոչինչ չեմ արել այնտեղ հասնելու համար: Փորձելու եմ իմ մեջ ուժ գտնել ու պայքարել իմ ուզածին հասնելու համար»,- ասել էր նա:

Անցած անգամ ջանքերն արդյունք տվեցին: Իմանալով Մխիթարյանի պրոֆեսիոնալզիմի ու նվիրվածության մասին՝ կարելի է վստահ լինել, որ հիմա էլ պատրաստ է պայքարել, եթե իրեն հնարավորություն տան, սակայն նրա լռությունը կարծես թե հուշում է, որ արդեն գիտի, որ այդ հնարավորությունը չի ունենալու: Եթե նախկինում հույսեր կային, որ լավ մարզավիճակ հավաքելու դեպքում կրկին թիմ կվերադառնար, ապա հիմա նման հեռանկար չի նշմարվում. նրա ու գլխավոր մարզիչ Ժոզե Մոուրինյոյի վատ հարաբերություններն արդեն գաղտնիք չեն: Օրերս այդ մասին բացահայտ ասել է նաեւ ՀՖՖ նախագահ Ռուբեն Հայրապետյանը:

«Հենրիխ Մխիթարյանն այն ֆուտբոլիստն է, որ այս իրավիճակը չի կարող երկար շարունակվել: Եվ բոլորիդ էլ հայտնի է՝ պատճառն ինչ է, ոչ թե Հենրիխի մարզավիճակը... հրապարակված է բազմաթիվ տեղերում: Մոտ ժամանակներս ինքս էլ կուսումնասիրեմ ու հայտարարություն կանեմ այդ ուղղությամբ»,- ասել էր նա:

Մխիթարյանը «կարմիր սատանաների» մեկնարկային կազմում չի եղել նոյեմբերի 5-ին կայացած Անգլիայի Պրեմիեր լիգայի 11-րդ տուրի «Չելսիի» դեմ խաղից սկսած: Դրանից հետո միայն 20 րոպե խաղաժամանակ է ստացել 13-րդ տուրի «Բրայթոնի» դեմ խաղում: Հենց այդ հանդիպումից հետո Մխիթարյանի ու մարզչի հարաբերություններն ավելի են սրվել: Խաղը վերլուծելու ընթացքում «յուրահատուկը» հայ ֆուտբոլիստին թիմակիցների մոտ քննադատել է իր գործողությունների համար, հետո վեճը շարունակվել է միջանցքում: Վերջին շաբաթներին էլ Մոուրինյոն չի բացառում, որ կարող է ազատվել նրանից ձմեռային տրանսֆերային պատուհանի ընթացքում: Նա նշում է, որ ցանկացած ֆուտբոլիստ իր գինն ունի, ու լավ գնի դիմաց այն խաղացողը, որը գոհ չէ թիմում իր կարգավիճակից, կարող է հեռանալ:

ՀՀ հավաքականի ավագին ձեռք բերելու հիմնական թեկնածուները վերջին շրջանում համարվում են նրա նախկին թիմը՝ Դորտմունդի «Բորուսիան», եւ Միլանի «Ինտերը»: Խոսվում է նաեւ Թուրինի «Յուվենտուսի» մասին, ուր նրան ԶԼՄ-ները տարիներ առաջ ուղարկում էին: Վերջին ակումբը, որի հետաքրքրության մասին շշուկներ կան, թուրքական «Բեշիկթաշն» է: