Հայաստանում տաքացվող մարզադաշտեր կլինեն. Ռուբեն Հայրապետյան

Հայաստանում տաքացվող ֆուտբոլային մարզադաշտերի կարիք կա: Հայաստանի ֆուտբոլի ֆեդերացիայի նախագահ Ռուբեն Հայրապետյանն այս մասին ասել է այսօր՝ դեկտեմբերի 15-ին, «Բանանց» ֆուտբոլային ակումբի արհեստական խոտածածկերով խաղադաշտների բացումից հետո լրագրողների հետ զրույցում: Նա խոսել է ինչպես այդ, այնպես էլ ֆեդերացիայի կողմից տարվող այլ աշխատանքների մասին, մեկնաբանել Հենրիխ Մխիթարյանի՝ «Մանչեստեր Յունայթեդում» խաղաժամանակ չստանալու խնդիրը:

- Արհեստական խոտածածկերի բացումն ի՞նչ հնարավորություններ է ստեղծում «Բանանցի» համար:

- Գիտեք մեր երկրի կլիմայական պայմանները, եթե հիշում եք նախկինում մեր բոլոր պատանի ֆուտբոլիստները ձմռան ամիսներին մտնում էին փակ մարզադաշտ, փայտի վրա էին մարզվում, իսկ դա նույնիսկ վնասակար է: Կարծում եմ՝ ճիշտ շահագործելու դեպքում «Բանանցը» շատ մեծ առավելություն կունենա, եւ ֆուտբոլիստներն ավելի լավ կվերապատրաստվեն, հավաքականներին ավելի լավ եւ ուժեղ ֆուտբոլիստներ կուղարկեն:

- Այս նույն ծրագիրը սպասվո՞ւմ է մյուս ակումբերին:

- Այս նույն ծրագիրն իրականացրվել է «Փյունիկում», նաեւ Չարենցավանում, Սիսիանում, Էջմիածնում, Արմավիրում, Սեւանում, «Ալաշկերտ» ակումբում ենք պատրաստվում կառուցել, «Արարատինը» արդեն 2 տար է՝ ավարտել ենք:

- Նախորդ ամիս պաշտոնական այցերով եղաք մարզերում: Կխոսե՞ք տարվող աշխատանքների մասին:

- Վանաձորի մարզադաշտն ավարտել ենք, ցավոք սրտի, այդ օրը շատ քիչ լրագրողներ էին եկել բացմանը: Հիմա անցել ենք արդեն մարզադաշտը կառուցելուն: 3-4 տարի առաջ խոստացել էինք, որ կկառուցենք եւ արդեն սկսել ենք աշխատանքները: Մարզային իմ այցերը հիմնականում եղել ենք Սիսիան, Արմավիրի մարզ: Նայել եմ աշխատանքները, բավականին գոհ եմ: Կարծում եմ՝ մինչեւ մայիս կբացենք Էջմիածնի ֆուտբոլի դպրոցը: Արմավիրի մարզադաշտի մասին դժվարանում եմ ասել: Դաշտը կառուցված է, ուզում ենք նաեւ տրիբունաների վրա ծածկ ավելացնել: Ժամկետները դժվարանում եմ ասել, բայց աշխատանքներից գոհ եմ:

- Տաքացվող խաղադաշտեր ունենալու մասին ի՞նչ կասեք:

- Առաջինը փորձում ենք կիրառել Վանաձորի մարզադաշտում: Փորձը մենք չունենք: Հիմա ուսումնասիրում ենք: Հանձնարարվել է, արդեն գտել են ընկերություններ, որոնք կարող են դա անել: Տեսնենք: Կարծում եմ՝ կստացվի: Մանավանդ մեր երկրի նման կլիմայական պայմաններ ունեցող երկրին դա անհրաժեշտ է:

- Ի՞նչ կասեք «Մանչեստեր Յունայթեդում» Հենրիխ Մխիթարյանի իրավիճակի մասին:

- Հենրիխ Մխիթարյանը, կարծում եմ, բոլորդ էլ գիտեք մեծ պրոֆեսիոնալ է, աշխատասեր, նվիրված ֆուտբոլին: Հենրիխ Մխիթարյանն այն ֆուտբոլիստն է, որ այս իրավիճակը չի կարող երկար շարունակվել: Եվ բոլորիդ էլ հայտնի է՝ պատճառն ինչ է, ոչ թե Հենրիխի մարզավիճակը... հրապարակված է բազմաթիվ տեղերում: Մոտ ժամանակներս ինքս էլ կուսումնասիրեմ ու հայտարարություն կանեմ այդ ուղղությամբ: Հենրիխն անպայման կխաղա եւ կուրախացնի բոլորիս:

- Հենրիխ Մխիթարյանը տարվա լավագույն մարզիչ ընտրելիս չէր ներառել իր մարզիչին՝ Ժոզե Մոուրինյոյին:

- Հենրիխն ազատ մարդ է, ու ունի իր ազատ կարծիքը, նա քվեարկել է իր կարծիքով:

- Մի քանի օր առաջ Արգենտինայից ժամանած մարզիչներ էին այստեղ: Նրանք աշխատելու են մինչեւ 17, մինչեւ 19 տարեկանների հավաքականների հետ:

- 2018 թ. հունվարին նրանք կվերադառնան 6 մարզչով եւ կմարզեն Ավանի ֆուտբոլի ակադեմիայի բոլոր պատանեկան հավաքականները: Հիմնականում շեշտը դնում ենք 2000 թ. ծնված պատանիների վրա, որոնք մասնակցելու են 2019 թ. Եվրոպայի առաջնությանը:

- Որքա՞ն հեռու կգնա այդ ծրագիրը: Արդյո՞ք արդյունավետ կլինի:

- Կարծում եմ՝ այո՛, քանի որ, եթե ուշադրություն դարձրել եք, մենք Ավանի ակադեմիայում վերջին 2-3 տարիների ընթացքում ստեղծել ենք տարբեր տարիքային հավաքականներ: Դա ՈՒԵՖԱ-ի նոր ծրագիրն է, որում, կարծում եմ, առայժմ 3-4 երկիր են, աստիճանաբար ավելանում է դրանց քանակը: Գիտակ ֆուտբոլային ղեկավարներից շատերը գտնում են, որ դա ճիշտ չէ, բայց ես համարում եմ, որ որքան պատանի ֆուտբոլիստները շփվեն իրար հետ, ինչքան շատ միջազգային հանդիպումներ անցկացնեն, այնքան լավ: Կարծում եմ՝ այդ ծրագիրն ունենալու է իր արդյունքը: Համոզված եմ, որ շուտով ֆուտբոլի մյուս դպրոցները նույնպես կընդգրկվեն այս ծրագրում, եւ նրանք էլ արտասահմանցի մարզիչներ կներգրավեն: Պետք է ամեն ինչ անենք, որ ծրագիրը լինի շարունակական:

- ՀՀ տարվա լավագույն մարզիկի ընտրության նոր ձեւաչափ է սահմանվել: Ի՞նչ կասեք այդ մասին:

- Անընդհատ ինչ-որ շահարկումներ են, խոսակցություններ են լինում, որ անարդար է, դրա համար մենք (խմբ. ՀՖՖ-ն) որոշել ենք անել ազատ ու բաց քվեարկությամբ, ինչը միշտ եղել է: Որպեսզի շահարկումները քիչ լինեն, հանել ենք գործկոմի անդամների մասնակցությունը, որ ֆեդերացիան մաքսիմում հեռու լինի խոսակցություններից:

- Այս անգամ տարվա լավագույն մարզիչ կոչումը չի լինելու: Ի՞նչ կասեք այդ մասին:

- (Խմբ. լավագույն մարզիչ) միշտ էլ չի եղել, ճիշտ չենք արել, որ սահմանել ենք այդ մրցանակը, իսկ հիմա, որպեսզի ավելորդ քննարկումներ չլինեն, թե ով պետք է քվեարկի, ով է լավը, արդար է, թե՝ ոչ... եթե հիշում եք՝ մենք ունենք հայկական Մոուրինյո, որն անցած տարի հայտարարեց, թե ինքն է լավագույնը, բայց սխալ ընտրություն է կատարվել: Նման բաներից խուսափելու համար, ավելի լավ է չունենանք լավագույն մարզչի անվանակարգը: Հետագայում, եթե անհրաժեշտություն լինի, կմտցնենք: