Տեր-Պետրոսյանը պետք է խոսի. ասում է ԱԺ պատգամավոր Էմմա Խուդաբաշյանը

Տպագրվել է «Հայկական Ժամանակ» օրաթերթի՝ 2004 թվականի նոյեմբերի 5-ի համարում

Վերջին ամիսներին հանրապետության տարբեր բնակավայրերում ժողովրդի հետ տասնյակ հանդիպումներն ԱԺ պատգամավոր Էմմա Խուդաբաշյանին համոզել են, որ հայ հասարակությունն այսօր գտնվում է բավականին վտանգավոր ապատիայի մեջ, որի խորացումը կարող է դեգրադացնել հասարակությանը: «Մի կողմից՝ իշխանությունները որեւէ առիթ բաց չեն թողնում իրենց գործողություններով ժողովրդի գլխին պարբերաբար բամփելու համար, վերջին հարվածն էլ «ԱրմենՏելի» խայտառակ համաձայնությունը եղավ, մյուս կողմից՝ իրեն խիստ արմատական հռչակած ընդդիմությունը իր անկարողությամբ ժողովրդին ուզում է վերածել զոմբիների,  օրվա հացի խնդրով ապրող օրգանիզմների:

Ես հիշում եմ, թե 2004-ի նախագահական ընտրություններից առաջ ի՜նչ հավատով ու ակտիվությամբ էր ժողովուրդը սպասում, որ իր անունից իր մոտ եկած ընդդիմության լիդերներն իրենց փրկելու են սափրագլուխների այս իշխանությունից: Սակայն, իշխանությունն իր ջրցան մեքենաներով ու էլեկտրաշոկերով, ընդդիմությունն էլ՝ իր պատեհապաշտությամբ, ժողովրդին հասցրել են այնպիսի ծայրահեղ հուսահատության, որը ես տեսա իմ տասնյակ հանդիպումների ժամանակ: Ինձ անկեղծորեն զարհուրանք պատճառեց այն արհամարհանքը, որ ժողովրդի մեջ կար թե՛ իշխանությունների, թե՛, որքան էլ ցավալի է, ընդդիմության նկատմամբ:

Ժողովուրդն այսօր ոչ մի բանի չի հավատում, իսկ անհավատությունը հասարակությանը տանելու է բարոյական այնպիսի դեգրադացիայի, որի սաղմերն արդեն իսկ նկատվում են, երբ ժողովուրդը, մեր բոլոր աչքի առաջ, դառնում է երեսպաշտ եւ մտածում բացառապես իր օրվա շահի մասին: Այս վիճակն այլեւս հանդուրժել չի կարելի, ուստի երկրի բոլոր առողջ ուժերը, որոնք անկասկած կան թե՛ նախկին իշխանության մեջ, թե՛ ներկայիս ընդդիմության, թե՛ գործող կոալիցիայում, պետք է միավորվեն: Այլապես, մենք կանգնելու ենք հայրենիք կորցնելու վտանգի առաջ: Այսօր, երբ իշխանությունների յուրաքանչյուր քայլը հարված է ժողովրդի թիկունքին, բոլոր այն ուժերը, որոնց համար Հայաստանը որբի գլուխ չէ, պետք է մի կողմ դնեն լիդերության համար կռիվը, մեղավորներ փնտրելու մարմաջն ու միավորվեն: Այլապես, ուշ է լինելու եւ հետո արդեն, ապավինելով հայի ետին խելքին, նստելու եւ զբաղվելու ենք մեղավորներ գտնելով»,- ասում է ԱԺ պատգամավորը:

Ըստ նրա՝ երկիրն այսօր կանգնել է այնպիսի քաղաքական եւ բարոյական դեգրադացիայի առաջ, որ առաջին նախագահի լռության ուխտը հավասարազոր է պետական դավաճանության: «Ես կարծում եմ, որ այն նախագահը, ով մեր անկախ պետության կայացման գործում հսկայական ներդրում է ունեցել, ում օրոք մենք պատերազմ ենք շահել, այսօր լռելու բարոյական իրավունք չունի: Այդ լռությունն, ըստ իս, ոչ թե արժանապատիվ կեցվածքի դրսեւորում է, ինչպես փորձում է ներկայացնել առաջին նախագահի շրջապատը, այլ դավաճանություն, քանզի սեփական ժողովրդից նեղանալն ինքնին դավաճանություն է: Այսօր ցանկացած գործիչ, ով մեր երկրի կայացման համար գոնե մի քար է դրել, պետք է մի կողմ դնի իր ամբիցիաներն ու դիմի ժողովրդին»,- ասում է Էմմա Խուդաբաշյանն ու առաջին նախագահին կոչ անում դիմել ժողովրդին եւ չսպասել, որ ժողովուրդն իրեն ազգովի խնդրի: 

Իսկ ի՞նչ պետք է լինի հետո, եթե Լեւոն Տեր-Պետրոսյանը խախտի լռության ուխտը: «Եթե առաջին նախագահը մտահոգ է իր երկրի ճակատագրով, նա չպետք է բիզնեսմենի հաշվարկ անի՝ ի՞նչ է շահելու կամ ի՞նչ է կորցնելու ինքն անձնապես: Նա, հաշվի առնելով իր ներդրումը մեր երկրի կայացման գործում, պարզապես պարտավոր է դիմել ժողովրդին: Կարծում եմ, մեր ժողովուրդը մեծահոգի է, եւ եթե ժողովրդի հետ ազնիվ ես, նա պատասխանում է ազնվությամբ: Կների՞ ժողովուրդը Լեւոն Տեր-Պետրոսյանին, թե՝ ոչ, ժողովուրդն ինքը կորոշի: Եւ, ի դեպ, ես դիմում եմ ոչ միայն նրան. բոլոր այն առողջ քաղաքական ուժերը, որոնք չեն վարակվել իշխանատենչության եւ մեծամտության մոլուցքով, ում ուղեղը չի փտել քաղաքական այս արվամոլա-աղանդավորական կեղտի մեջ, բոլորը պետք է միանան ու ձեռք մեկնեն ժողովրդին:

Ես բազմաթիվ անգամներ խոսել եմ նաեւ կոալիցիայի անդամ կուսակցությունների տարբեր ներկայացուցիչների հետ, ու նրանցից շատերը եւս հրաշալի գիտակցում են, որ երկիրն անդունդ է գլորվում: Բոլորին է պետք միավորել: Հետո արդեն ժողովուրդն ինքը կորոշի, թե ով պետք է գլխավորի ազգային-ազատագրական նոր ալիքը: Իսկ որ մեզ նոր ազգային շարժում է պետք, դրանում ես համոզվեցի՝ անցած ամիսներին լինելով հանրապետության տասնյակ բնակավայրերում»,- ասում է նա: Ի դեպ, ամփոփելով երկրի բոլոր քաղաքական ուժերին ուղղված իր կոչը, Խուդաբաշյանը վստահ է, որ իր խոսքերում որեւէ մեկին պաշտպանելու եւ սատարելու պատվեր չեն փնտրի ու կհասկանան, որ քանի դեռ ողջ քաղաքական դաշտը զբաղված է իրար տակ փորելով ու ամեն տեղ պատվեր ու ական փնտրելով, շատ շուտով Հայաստանից մեծ կտորն ականջն է մնալու, այն էլ՝ այս կամ այն գերտերության կրնկի տակ ճմրթված: 

Նաիրա Զոհրաբյան