Ինչո՞ւ են կառավարության կառուցվածքը փոխում հիմա, եւ ի՞նչ կապ ունի Դավիթ Հարությունյանը

Մայիսի 30-ին կառավարության առաջարկությամբ Ազգային ժողովն արտահերթ նիստ կգումարի, որպեսզի մի շարք օրենքներում փոփոխություններ կատարի: Կառավարությունը մայիսի 22-ին արտահերթ նիստ էր հրավիրել այդ նպատակով:

Օրենսդրական փաթեթի նպատակն է ՀՀ կառավարության կառուցվածքը համապատասխանեցնել Սահմանադրության փոփոխություններին՝ համաձայն որի նախարարների թիվը պետք է լինի տասնութը: Բացի այդ, նախագիծը նպատակաուղղված է կառավարման արդյունավետությունը բարձրացնելու և կառավարման ձևը կիսանախագահականից խորհրդարանականի անցման գործընթացը սահուն անցկացնելու համար: Փոփոխությունների արդյունքում «ՀՀ կառավարության աշխատակազմի ղեկավար-նախարար» քաղաքական պաշտոնը փոխարինվում է «ՀՀ կառավարության աշխատակազմի ղեկավար» հայեցողական պաշտոնով՝ համապատասխանաբար փոփոխելով նաև նրա տեղակալների պաշտոնների անվանումները:

Չհաշված կառավարության աշխատակազմի ղեկավար-նախարարի պաշտոնը գործող կառավարության նախարարությունների թիվը 18 է: Այսինքն՝ բացի այս փոփոխությունից որեւէ այլ առանցքային փոփոխություն տեղի չի ունենալու: Մյուս փոփոխությունները վերաբերվում են հարակից օրենքներին:

2015 թվականի դեկտեմբերի 6-ին ընդունված Սահմանադրության 147-րդ հոդվածի 2-րդ կետը սահմանում է, որ նախարարությունների ցանկը և կառավարության գործունեության կարգը կառավարության ներկայացմամբ սահմանվում են օրենքով: Փոխվարչապետների թիվը չի կարող գերազանցել երեքը, իսկ նախարարներինը` տասնութը: Այժմ կա մեկ փոխվարչապետի պաշտոն, որը համատեղությամբ զբաղեցնում է նաեւ միջազգային տնտեսական ինտեգրման եւ բարեփոխումների նախարարի պաշտոնը: Այդ պաշտոնում այժմ ժամանակավորապես նշանակված է Վաչե Գաբրիելյանը: Կառավարության կողմից առաջարկվող փոփոխություններով փոխվարչապետների թիվը չի ավելացվում:

Նոր Սահմանադրության անցումային դրույթներում կառավարության կազմին վերաբերող հոդվածի կիրառման ժամկետների մասին որեւէ նշում չկա: Այսինքն՝ այդ կառուցվածքային փոփոխությունը հենց այս պահի հրամայական չէ: Քանի որ ժամկետների մասով օրենքի պահանջ չկա այդ հարցում, ուրեմն այն իրավիճակային է:

Կառավարության աշխատակազմի ղեկավար-նախարարի պաշտոնը 2013 թվականին ստեղծվել է կառավարության որոշման հիման վրա ԱԺ-ում ընդունված՝ Կառավարության կառուցվածք մասին օրենքում փոփոխություներ կատարելու մասին օրենքով: Այն ժամանակ վարչապետը Տիգրան Սարգսյանն էր եւ նա կառավարության 2013 թվականի մայիսի 8-ի նիստում այդ պաշտոնում առաջարկել էր ներկայիս փոխվարչապետ Վաչե Գաբրիելյանի թեկնածությունը: «Համոզված եմ, որ Վաչե Գաբրիելյանն իր փորձով, գիտելիքով կարող է լավագույնս իրականացնել այս աշխատանքը: Մենք գտնվում ենք փոփոխությունների ժամանակաշրջանում և տարբեր ոլորտներում իրականացվում են տարբեր բարեփոխումներ: Անհրաժեշտություն է առաջանում կոորդինացնել մի քանի գերատեսչությունների բարեփոխումները: Այդ տեսակետից, պարոն Գաբրիելյանի վրա պարտականություն է դրվելու, որպեսզի նա կոորդինացնի կրթության, առողջապահության և կառավարման ապարատի ոլորտներում բարեփոխումները»,- ասել էր Տիգրան Սարգսյանը: 2013 թվականին ոչ մի խոսք չկա, որ այդ պաշտոնը քաղաքական է, այլ ընդհակառակը՝ հիմնավորվում էր տնտեսական բարեփոխումներով:

2014 թվականին, երբ Տիգրան Սարգսյանի կառավարությունը հրաժարական տվեց, այս պաշտոնում նշանակվեց Դավիթ Հարությունյանը, որը ԱԺ-ի պետաիրավական հարցերի մշտական հանձնաժողովի նախագահն էր:

Հիմա երբ արդարադատության նախարարի պաշտոնը թափուր է եւ ամենահավանական թեկնածուն հենց Դավիթ Հարությունյանն է, կառավարությունը որոշել է կառավարության աշխատակազմի ղեկավար-նախարարի պաշտոնը չպահպանել եւ այն հիմնավորել է կառավարման խորհրդարանական համակարգի սահուն անցմամբ: Հանրապետական կուսակցությունը, եթե բացի Դավիթ Հարությունյանից արդարադատության նախարարի այլ թեկնածու ունենար, ապա այս պաշտոնը չեր վերացնի այս փուլում:

Նշենք, որ Դավիթ Հարությունյանը արդարադատության նախարարի պաշտոնում աշխատել է մոտ 9 տարի՝ 1998-ից 2007 թվականներին: