Գագիկ Ծառուկյանն իր խոստումը չի կատարել. Կապանի քաղաքապետը հակադարձում է ԲՀԿ նախագահին

Ապրիլին կայանալիք խորհրդարանական ընտրություններին մասնակցող «Ծառուկյան» դաշինքը գլխավորող ԲՀԿ նախագահ Գագիկ Ծառուկյանը քարոզարշավի շրջանակներում այսօր այցելել է Սյունիքի մարզկենտրոն Կապան քաղաք, որտեղ տեղական իշխանություններին քննադատող հայտարարությամբ է հանդես եկել: «Ես խոստացել էի, ուզում էի Ղափանում (Կապան, խմբ. հեղ.) ջրաշխարհ կառուցել, չթողեցին, տեղը չհատկացրին: Այնտեղ ուզում են ինչ-որ բնակարան կառուցեն, մինչև այսօր էլ քարուքանդ, ավերված մնացել է»,- նշեց Ծառուկյանը:

Գագիկ Ծառուկյանի հայտարարության հետ կապված armtimes.com-ը զրուցեց Կապանի ՀՀԿ-ական քաղաքապետ Աշոտ Հայրապետյանի հետ:

- Պարոն Հայրապետյան, ծանո՞թ եք Գագիկ Ծառուկյանի հայտարարությանը:

- Այո, ծանոթ եմ:

- Այդ ջրաշխարհի տեղում շենքեր էին նախատեսված կառուցել, կառուցվե՞լ են, թե՞ ոչ:

- Ձեր ասած կառուցվող շենքերի հետ կապված ես տեղեկություններ չունեմ, որ առաջարկ է եղել Ծառուկյանի կողմից ջրաշխարհ կառուցելու մասին: Համենայնդեպս, իմ պաշտոնավարման ընթացքում նման հարց չի քննարկվել: Ծառուկյանը Կապանի քաղաքապետարան, Կապանի տեղական իշխանություն եզրույթներն օգտագործելով չգիտեմ ում նկատի ուներ, համենայնդեպս իմ պաշտոնավարման 5 տարիների ընթացքում ես նման առաջարկ չեմ ստացել: Ավելին ասեմ, այդ կառուցվող շենքերը, որոնց մասին խոսք է գնացել, նույնպես իմ պաշտոնավարման ընթացքում չեն սկսվել կառուցվել, եւ ես չեմ կարող նման զուգահեռներ անցկացնել:

- Ձեր պաշտոնավարման ընթացքում ենթադրում եմ, որ հետեւած կլինեք շինաշխատանքներին: Ավարտվե՞լ են այդ շենքերի կառուցման աշխատանքները:

- Ոչ: Դա եղել է մեր խնդիրներից մեկը, որ ներկայացրել ենք ժամանակին: Խնդրով մտահոգ են թե՛ տեղական, թե՛ մարզային իշխանությունները, թե՛ առհասարակ կառավարության ղեկավարները, որովհետեւ նախկինում տվյալ տարածքում եղել է, կարելի է ասել լքված արհեստական լիճ, որոշակի հանգստի գոտի, որի տեղում սկսվեց ձեր ասած շինարարությունը եւ մենք այս ընթացքում կապ հաստատել ենք շինարարությունը պատվիրած կողմի հետ եւ փորձել ենք ընդհանուր լուծումներ գտնել այդ ամենի ճակատագրի վերաբերյալ:

- Հիմա հիմքերը գցած ե՞ն:

- Կարծում եմ հիմքերն էլ են գցած եւ մի բան էլ ավելին: Եթե չեմ սխալվում, դա իմ գնահատականը չի, իմ խոսքերից չէ, 100 մլն դոլարից ավելի ներդրում է կատարվել:

- Հիմա շինաշխատանքներ ընթանո՞ւմ են:

- Ոչ, հիմա շինաշխատանքներ չեն ընթանում:

- Որքա՞ն ժամանակ է կանգնել է կառուցապատումը:

- Եթե չեմ սխալվում 2.5 տարի:

- Ներդրողի հետ կապ չի՞ լինում հաստատել:

- Լինում է, կապ ունենք, պարբերաբար անդրադառնում ենք այդ խնդրին:

- Նորից ժամանցային կենտրոն ստեղծելը անհեռանկարային ծրագի՞ր է:

- Չեմ կարծում: Դա էլ քննարկման առիթ կարող է դառնալ եւ առհասարակ ցանկացած ներդրում կատարող կողմի հետ պատրաստ ենք քննարկելու, ցանկացած ողջամիտ առաջարկություն:

- Ձեր պաշտոնավարման ընթացքում անձամբ Ծառուկյանի կողմի որեւէ առաջարկ չի՞ եղել:

- Կապանում ջրաշխարհի հետ կապված խոսակցություններ կենցաղային մակարդակում լսել եմ, համենայնդեպս ինձ ուղղված առաջարկ չի եղել: Ինչ վերաբերվում է մեր կողմից կարեւորվող առաջարկին, ոչ թե առաջարկին, այլ խոստումին, դա Կապան քաղաքում կառուցվելիք մասնագիտացված ատլետիկայի սպորտդպրոցն էր իր «մանեժով», որը մինչեւ հիմա ոչ միայն չի իրականացվել, այլ խոսք էլ չի եղել, թե այն երբ կարող է իրականացվել: Խոստումը տրված էր Ծառուկյանի կողմից:

- Ո՞ր ժամանակահատվածի մասին է խոսքը:

- Խոսքը գնում է 2012 թվականի ԱԺ ընտրություններին ընդառաջ, քարոզարշավի շրջանակներում: Այդ մասին անդրադարձ եղավ նաեւ 2015 թվականի հայտնի քաղաքական իրադարձությունների շրջանակներում, նաեւ Կապանում տեղի ունեցած հանրահավաքների ժամանակ:

- Ծրագրի իրականացման մասին դուք որտեղի՞ց եք լսել:

- Դա հստակ խոստում էր: Այն ժամանակ ԲՀԿ-ի կողմից:

- Ո՞չ անձամբ Գագիկ Ծառուկյանի կողմից:

-Ծառուկյանի կողմից: Դե այն ժամանակ «Ծառուկյան» դաշինք չէր՝ ԲՀԿ էր: