Մարտուն Գրիգորյանը չի բացառում, որ Գյումրիում առճակատումներ կլինեն

Գյումրիի նախկին քաղաքապետ Վարդան Ղուկասյանին իր դաշինքում ընդգրկելու մասին Գագիկ Ծառուկյանի որոշումը Գյումրիից պատգամավոր Մարտուն Գրիգորյանն անսպասելի է համարում:

«Պարզից էլ պարզ է, որ չեմ կարող լինել մի թիմում, որտեղ կա Գյումրու նախկին քաղաքապետը»,- նախօրեին հայտարարեց Մարտուն Գրիգորյանը:

Վերջինս ապրիլյան խորհրդարանական ընտրություններին Շիրակի մարզում ռեյտինգային ընտրակարգով առաջադրվելու է Հանրապետական կուսակցության ցուցակով: Հայտնի է, որ Մարտուն Գրիգորյանի եւ Վարդան Ղուկասյանի հարաբերությունները բավական լարված են: Գրիգորյան եւ Վարդանյան գերդաստանների միջեւ խմբային բախումները միջեւ անգամ սպանություններով են զուգորդվել: «Հինգ տարիների հաշտ ու համերաշխ հարաբերությունները, խաղաղ մթնոլորտը չտուժեցին քաղաքական ու կուսակցական թեթեւ ինտրիգներից, քաղաքական պայքարը մնաց հիմնականում կոռեկտության եւ փոխադարձ հարգանքի սահմաններում, իշխանությունում մնացած մարդկանցից որեւէ մեկն արյուն չհեղեց»,- ասում է Մարտուն Գրիգորյանը:

Խորհրդարանական ընտրությունների ժամանակ Գյումրիում հնարավոր լարվածության եւ Վարդան Ղուկասյանի առաջադրվելու մասին զրուցեցինք Մարտուն Գրիգորյանի հետ:

- Պարոն Գրիգորյան, դուք կարծում եք, որ Վարդան Ղուկասյանի վերադարձով Գյումրիում մթնոլորտը կարող է թեժանա՞լ:

- Գյումրիի բոլոր ընտրությունների ժամանակ էլ եղել են խոսակցություններ կամ մամուլն է գրել, թե կռիվ, արյուն, պատերազմ է լինելու. մենք արդեն սովոր ենք դրան: Կարծում եմ` մի կերպ նորմալ ընտրություններ կկազմակերպենք:

- Հնարավո՞ր է, այնպիսի լարվածություն առաջանա, որ դուք եւ Վարդան Ղուկասյանը նորից առճակատվեք:

- Ճիշտն ասած, ո´չ ես, ո´չ էլ որեւէ մեկը չի կարող այդ հարցի պատասխանը տալ, քանի որ որեւէ մեկս չգիտենք, թե ինչ զարգացումներ կլինեն: Համենայնդեպս, մենք ամեն ինչ անելու ենք, որ ընտրություններն անցնեն նորմալ, խաղաղ պայմաններում, առանց ավելորդ լարվածության: Ես այնքան աշխատանք ունեմ կատարած, որ դատարկ զրույցների ժամանակ չունեմ` նմանատիպ բաների հետեւից ընկնելու համար:

- Իսկ Շիրակում ՀՀԿ-ի ռեյտինգային թեկնածուների միջեւ կա՞ լարվածություն. մարզում յուրաքանչյուր կուսակցություն կարող է մոտ 15 թեկնածու առաջադրել, եւ ձայներ տանելու համար նույն կուսակցության ներսում մեծ մրցակցություն է լինելու:

- Իհարկե, բոլորն էլ ուզենալու են իրենց համար շատ ձայներ հավաքել, ամեն մեկը պետք է մի ճանապարհ գտնի` իր ուզածին հասնելու համար: Բայց կցանկանայի, որ ամեն մեկն ի ճանապարհն անցներ մաքուր, առանց մյուսին վնասելու, որովհետև ընտրություններից հետո գալիս է հաջորդ օրը, կուսակցություններն իրենց ստանալիքը ստանալու են ու թողնելու են գնան այստեղից, քաղաքում մնալու է թշնամության ու լարվածության մթնոլորտը:

- Կարծում եք, այս անգամ խորհրդարանական ընտրություններն ավելի լարվա՞ծ են լինելու:

- Սա հարյուր տոկոսանոց ռեյտինգ չափելու ընտրություն է, թե՛ կուսակցության մեջ եւ կուսակցությունից դուրս յուրաքանչյուր անձ մարզում ինչ ռեյտինգ ունի, թե´ թիմակիցների հետ, թե´ թիմակիցներից դուրս պայքարում: Եվ կարծում եմ` ընտրություններից հետո ով ինչ արդյունք ունեցավ, այդքանով էլ կունենա ժողովրդի կողմից տրված հնարավորություն, մանդատ` հետո աշխատելու համար: Այս ընտրությունները կոնկրետ լինելու են անձի ընտրություն, ոչ թե կուսակցության: Այստեղ առաջին հերթին անձի գործոնն է դրված, որեւէ կուսակցություն ժողովրդի մոտ ֆիքսված չէ, այսօր ամեն մեկն ունի իր թեկնածուն, հատկապես Գյումրիում, որը փոքր քաղաք է: Ժողովուրդն այսօր ընտրելու է այն մարդուն, որը կարող է գնալ, պայքարել, համոզել ու գումարներ բերել Գյումրի, Շիրակի մարզ, որտեղ սոցիալական վիճակն ավելի վատ է:

- Դուք ասում եք` անձերի եւ վարկանիշների պայքար է, բայց իշխանություններն ասում են, որ սա միայն կուսակցությունների պայքար է:

- Այո, բայց տվյալ անձը կամ պատգամավորը պետք է կարողանա կապ ստեղծել ժողովրդի ու իր թիմի միջեւ: Այսպես թե այնպես, անձը պիտի միջնորդ լինի ժողովրդի ու կուսակցության միջեւ: Կուսակցությունն այդ անձերի միջոցով է կառույց ստեղծելու: Եթե ժողովուրդն այդ անձին չի վստահելու, նա վաղն այդ կուսակցության հետ ինչպե՞ս է հույսեր կապելու: Կուսակցություններն ընտրությունների ժամանակ ակտիվանում են, գալիս են Գյումրի, խոստումներ տալիս: Աշնանը Գյումրու ընտրություններն անցան, այդ կուսակցությունները գնացին, իսկ գյումրեցին մնաց իր խնդիրների հետ: