«...որ զինվորները ունենան արժանապատիվ փոխհատուցում». Ա. Հովհաննիսյանը՝ 1000 դրամների մասին

Ինչպես տեղեկացրել ենք, զոհված կամ վիրավորված զինծառայողների ընտանիքներին ապահովագրական գումար վճարելու մասին ՀՀ պաշտպանության նախարար Վիգեն Սարգսյանի կողմից այսօր Կառավարություն ներկայացված նախագիծը բուռն քննարկումների առիթ է տվել:

Մարդկանց մտահոգում է նախագծի հատկապես այն դրույթը, ըստ որի յուրաքանչյուր աշխատող ֆիզիկական անձ իր աշխատավարձից պետք է պարտադիր ամսական 1000-ական դրամ փոխանցի զինծառայողների ընտանիքներին օգնելու համար բացված հիմնադրամին:

Խնդրի շուրջ զրուցել ենք ՀՀ պաշտպանության նախարարի մամուլի քարտուղար Արծրուն Հովհաննիսյանի  հետ.

- Պարոն Հովհաննիսյան, նախարարի կողմից ներկայացված նախագիծը քննադատության է արժանանում: Հնարավո՞ր է այն մինչեւ Ազգային ժողով ներկայացվելը որոշակի փոփոխության ենթարկվի:

- Նախագիծն այսօր ներկայացվել է Կառավարություն, դուք դա գիտեք: Դեռ մինչեւ Ազգային ժողով ներկայացվելը պիտի ճանապարհ անցնի, ինչպես ցանկացած նախագիծ: Այդ ընթացքում, իհարկե, հնարավոր են փոփոխություններ: Բացի այդ՝ նախագծի հետ կապված ամեն ինչ չէ, որ այսօր հրապարակվել է: Ամեն ինչ իր հերթին. սպասենք, նախագիծը անցնի բոլոր աստիճաններով, հասնի իր ելակետին՝ այն ժամանակ ամեն ինչ պարզ կլինի:

- Համենայնդեպս պարզ է, որ աշխատավարձերից պարտադիր պահման դրույթի հետ կապված ակնհայտ բացասական վերաբերմունք կա: Փոփոխություն հնարավո՞ր է նախագծում:

- Ես ոչինչ չեմ կարող ասել, սպասենք, թող հասնի Ազգային ժողով, այն ժամանակ կերեւա: Հիմա դուք ինձնից ուզում եք, որ ընդամենը մի քանի հոգու ֆեյսբուքում գրած բացասական վերաբերմունքի համար ասեմ, թե արդյոք դրանից նախագիծը կփոխվի, թե ո՞չ:

- Նախարարությունում քննարկվո՞ւմ է հասարակության բացասական վերաբերմունքով պայմանավորված այդ դրույթից հրաժարումը:

- Անկեղծ ասած ես մինչեւ այսօր այդ մտքի վերաբերյալ լսել եմ գերազանցապես դրական գնահատականներ, կարծում եմ, որ գերազանցապես դրական գնահատականներ եմ լսելու մինչեւ վերջ: Կլինե՞ն բացասական խոսացողներ, իհարկե կլինեն: Ցանկացած նախագծի վերաբերյալ կարող են լինել բացասական վերաբերմունք արտահայտող մեկնաբանություններ: Բայց ի՞նչ է դա նշանակում: Ինձ համար ճիշտ չէ գնահատական տալ, քանի դեռ նախագիծը վերջնական չէ:

- Իսկ նախարարը վստա՞հ է, որ առաջարկող տարբերակը խնդրի լուծում է:

- Ես, ու ընդհանրապես, մենք այս ամենը համարում ենք շատ կարեւոր, առանցքային լուծում տվյալ պրոբլեմի, որ մեր հաշմանդամները, զոհվածները, վիրավորները հետայսու ունենան արժանապատիվ փոխհատուցման մեխանիզմներ, որոնք ընդունված են աշխարհի առաջատար պետություններում: Եվ իհարկե, դրանով կարեւորում ենք նաեւ հայ քաղաքացու մասնակցությունը այս գործին: Ես կարծում եմ, որ դա ըստ էության օրինաչափ է աշխարհի բոլոր պետություններում, որոնք անվտանգության նման խնդիր ունեն, նման երեւույթներ կան եւ սա ընդհանուր առմամբ ազգ-բանակ հայեցակարգի մի բաղադրիչն է:

- Մարդիկ դեմ չեն, որ այդ երեւույթը կայանա. քննարկումներից հասկացվում է, որ դեմ են միայն նրան, որ առանց այն էլ ցածր աշխատավարձից պարտադիր պահում լինի: Մանավանդ որ քաղաքացիները այսպես թե այնպես հարկ են վճարում, որ բանակը պահվի:

- Նախեւառաջ, ինչ վերաբերում է ցածր աշխատավարձին: Օրինագիծը, նորից եմ կրկնում, դեռ կյանք ունի ապրելու: Ես դեռ չեմ կարող ասել. կարող է լինել այնպես, որ որոշակի աշխատավարձերի պարագայում դա չլինի, դա կարող է չվերաբերել ինչ-ինչ կատեգորիայի, ես չեմ կարող ասել: Դեռ պետք է քննարկվի:

Երկրորդ՝ հարկերի վերաբերյալ: Հարկեր վճարում ենք, հարկերով մենք ապահովում ենք երկրի անվտանգությունը, բայց սա անվտանգությանը չի վերաբերում, սա հետագա գործընթացին է վերաբերում: Այսինքն այն մարդիկ, որոնք անցնելու են այս ճանապարհով, չեն շարունակելու չէ՞ ծառայել, դառնալու են ՀՀ քաղաքացի, որին մենք վճարելու ենք: Իրենց տեղը գալու է մարդ, որը մեր տված հարկերով շարունակելու է ծառայություն իրականացնել: Դրանք տարբեր բաներ են, մենք չպիտի խառնենք իրար հետ:

- Այսինքն պետք է խոստովանել, որ այս պահին մեր ունեցած բյուջեով, մեր վճարած հարկերով հնարավոր չէ եւ անվտանգություն ապահովել եւ վիրավորված ու զոհված զինվորների ընտանիքներին օգնել:

- Մենք շատ ենք խոսել, որ ցավոք, մեր երկրում դեռ երկար ժամանակ օրինաչափ է լինելու որոշակի մեծ բանակ ունենալը, անվտանգության վրա մեծ ծախսեր ունենալը, որովհետեւ մենք գտնվում ենք անվտանգության այսպիսի համակարգի եւ իրավիճակի մեջ: