Առաջին անգամ Հայաստանը ներկայացուցիչ կունենա հեծանվահրապարակի Եվրոպայի առաջնությունում

Այսօր Փարիզի մերձակայքում գտնվող Սեն Կանտեն Ան Իվելին քաղաքի հեծանվահրապարակում մեկնարկում է Եվրոպայի մեծահասակների առաջնությունը: Պատմության ընթացքում առաջին անգամ Հայաստանը մասնակից է ունենալու այս մրցաշարում: Ընդհանուր առմամբ, Եվրոպայի առաջնությանը մասնակցելու հայտ են ներկայացրել 35 երկրի 280 հեծանվորդ, որոնց թվում են եվրոպական գրեթե բոլոր ուժեղագույն մարզիկները: Ռիո Դե Ժանեյրոյում ամռանը կայացած Օլիմպիական խաղերից հետո մեկնարկող Եվրոպայի առաջնությունն առաջին մեծ մրցաշարն է, եւ մասնակիցների թվում են Օլիմպիական խաղերի չեմպիոններ, բրիտանացիներ Սթիվեն Բերկը, Քեթի Արչիբալդը, Էլինոր Բարկերը, աշխարհի բազմակի չեմպիոն, գերմանացի Սեբաստիան Մորը, իտալացի Ֆիլիպո Գանան եւ այլ հայտնի հեծանվորդներ:

Հայաստանը Եվրոպայի առաջնությունում ներկայացնելու է 2011 թվականի աշխարհի երիտասարդական առաջնության կրկնակի արծաթե մեդալակիր, Հայաստանի 2016 թվականի բացարձակ չեմպիոն Մհեր Մկրտչյանը: Մինչ այժմ հայ հեծանվորդները իրավունք էին ստացել մասնակցելու միայն երիտասարդական մրցաշարերին, բայց վերջին տարիներին արձանագրած հաջողությունների շնորհիվ Հայաստանն արդեն ներկայացուցիչ ունի նաեւ մեծահասակների մրցաշարում՝ Եվրոպայի առաջնությունում: Հիշեցնեմ, որ անցյալ տարի Էդգար Ստեփանյանը նվաճեց Եվրոպայի երիտասարդների չեմպիոնի, աշխարհի երիտասարդների փոխչեմպիոնի կոչումները, որից հետո հայ հեծանվորդների հանդեպ որոշակի հետաքրքրություն առաջացավ Եվրոպայում:

Այս տարի Հայաստանի հեծանվային մարզաձեւերի ֆեդերացիայի եւ սպորտի նախարարության ջանքերով նույն Էդգար Ստեփանյանը 3 ամիս մարզվեց հեծանվասպորտի միջազգային ֆեդերացիայի կենտրոնում, ուր իրավունք են ստանում մարզվել միայն տաղանդավոր եւ հեռանկարային մարզիկները: Մարզումներին զուգահեռ Էդգարը մասնակցեց Պորտուգալիայում, Ֆրանսիայում կայացած մի քանի հեղինակավոր մրցաշարերի, ապա Հայաստանը ներկայացրեց Եվրոպայի մինչեւ 23 տարեկանների առաջնությունում:

3 մրցաշարերում 19-ամյա Էդգարին հաջողվեց տեղ զբաղեցնել առաջին տասնյակում, ինչը մեծ հաջողություն է երիտասարդ մարզիկի համար: Զուգահեռաբար, Մհեր Մկրտչյանը հրավերք ստացավ եւ մինչ այսօր էլ մարզվում է ֆրանսիական «Շարվե Շավանյե» հեծանվային ակումբում եւ մասնակցել է մի քանի միջազգային մրցաշարերի, Ֆրանսիայի «Գրան Պրի» մրցաշարում էլ Մհերը զբաղեցրել է 12-րդ տեղը:

Էդգար Ստեփանյանը եւ Մհեր Մկրտչյանը հեծանվասպորտի միջազգային ֆեդերացիայի խաղացանկում տեղ գտած մրցաշարերում իրենց զբաղեցրած տեղերին համապատասխան վարկանիշային միավորներ են վաստակել եւ տեղ են գտել մեծահասակների համաշխարհային վարկանիշային աղյուսակում. Ստեփանյանը զբաղեցնում է 42 - րդ, Մհեր Մկրտչյանը՝ 488-րդ տեղերը: Հայաստանն էլ առաջին անգամ պատմության ընթացքում վարկանիշ է ձեռք բերել եւ հայտնվել Եվրոպական երկրների վարկանիշային աղյուսակի 26-րդ հորիզոնականում:

Նշենք, որ ետխորհրդային երկրներից Հայաստանի հետ միասին վարկանիշային աղյուսակում տեղ են գտել հեծանվային մարզաձեւերում ավանդաբար ուժեղ մերձբալթյան 3 երկիր՝ Լատվիան, Լիտվան, Էստոնիան, ինչպես նաեւ Ռուսաստանը, Ուկրաինան եւ Բելառուսը:

Բնականաբար, սա արդեն մեծ առաջընթաց է մեր երկրի համար: Հայաստանի հեծանվային մարզաձեւերի հավաքականի գլխավոր մարզիչ Արմեն Գյոզալյանը նշում է, որ առաջնային նպատակը Տոկիոյում 2020 թվականին կայանալիք ամառային Օլիմպիական խաղերում մասնակից ունենալն է:

«Հեծանվային սպորտում Օլիմպիական խաղերի վարկանիշ ձեռք բերելը չափազանց բարդ գործընթաց է: Վարկանիշային մրցաշարերը մեկնարկում են 2017 թվականի աշնանը, բայց դրանց մասնակցելու համար նախ պետք է մասնակցել Եվրոպայի, աշխարհի առաջնություններին, աշխարհի գավաթի փուլերին: Այս մրցաշարերում բավարար արդյունքներ ցույց տալու դեպքում էլ նոր իրավունք ես ստանում մասնակցել վարկանիշային մրցաշարերի: Հիմա Հայաստանը, Մհեր Մկրտչյանը, Էդգար Ստեփանյանն արդեն հաշվարկային միավորներ ունեն: Հույս ունեմ, որ Մհերին կհաջողվի Եվրոպայի առաջնությունում ավելացնել իր միավորների քանակը, բարելավել դիրքը համաշխարհային վարկանիշային աղյուսակում»,- երեկ մեր զրույցում ասաց Արմեն Գյոզալյանը:

Ավելացնեմ, որ այսօր մեկնարկող Եվրոպայի առաջնությունում Մհեր Մկրտչյանը մասնակցելու է «Սկրետչ» եւ «Խմբակային մրցավազք» մրցաձեւերին: Եվրոպայի առաջնությունն ուղիղ հեռարձակմամբ ցուցադրվելու է «Եվրոսպորտ» հեռուստաալիքով: