Վարդան Ղուկասյանը պասի մեջ է, նա դեռ զսպում է իրեն. Գյումրին Սիցիլիա դառնալու շեմին

Գյումրին կրկին Սիցիլիայի վերածվելու նախաշեմին է: «ՀԺ»-ն երեկ գրել էր, որ ԲՀԿ-ի շուրջ անցյալ փետրվարյան սկանդալային իրադարձություններից հետո սույն կուսակցության շարքերը լքած ԱԺ պատգամավոր Մարտուն Գրիգորյանը այս սեպտեմբերին սպասվող Գյումրիի քաղաքապետի ընտրություններում լինելու է իշխանության թեկնածուն:

Դա նախօրեին ՀՀԿ-ն ցույց տվեց արդեն բացահայտ, երբ ԱԺ նախագահ Գալուստ Սահակյանը Մարտուն Գրիգորյանին նրա 35-ամյակի կապակցությամբ պարգեւատրեց ԱԺ նախագահի հուշամեդալով: Գյումրիի նախկին քաղաքապետ Վարդան Ղուկասյանը, որը եւս հավակնում է այդ պաշտոնին, երեկ Մարտուն Գրիգորյանին, ըստ էության, մեղադրել է կեղծիքներով ու ընտրակաշառքով խորհրդարան մուտք գործելու մեջ: Հիշեցնենք, Ղուկասյան եւ Գրիգորյան ընտանիքները վաղեմի թշնամիներ են եւ ժամանակ առ ժամանակ հանրապետության երկրորդ քաղաքը վերածում են Սիցիլիայի՝ իրար վրա օրը ցերեկով կրակելով ու իրար սպանելով: Երեկ, երբ armtimes.com-ը փորձել է պարզել Վարդան Ղուկասյանի հոգեվիճակը Մարտուն Գրիգորյանի առաջադրման վերաբերյալ, Ղուկասյանը, որը, պարզվում է, պասի մեջ է, փորձել է հնարավորինս կոռեկտ արտահայտվել Գրիգորյանի հասցեին:

- Պարոն Ղուկասյան, այսօր մամուլում գրվել է, որ Մարտուն Գրիգորյանն է դառնում Գյումրիի քաղաքապետի իշխանության թեկնածուն, դուք հիմա ի՞նչ եք անելու:

- Թող դնի, ի՞նչ է եղել:

- Դուք հիմա չե՞ք առաջադրվի:

- Ես քաղաքականությամբ չեմ զբաղվում, իսկ հետագան ցույց կտա, կապրենք, կտեսնենք:

- Այսինքն, եթե հիմա ինքը իշխանության թեկնածուն լինի, դուք կսատարե՞ք իրեն:

- Աղջիկ ջան, ուրեմն, ուշադիր լսի, ես ասում եմ՝ ես քաղաքականությամբ չեմ զբաղվում: Բայց եթե հանկարծ եկավ մի պահ, որ իմ միտքը Աստված փոխեց, ուրեմն, ես անպայման ինչ որ իմ հոգու մեջ, իմ հոգին թելադրեց, էդ կանեմ: Բայց հիմա ես ընդհանրապես չեմ էլ ուզում այդ բաները լսել, ոչ էլ դնել, ոչ էլ վերցնել:

- Բայց, պարոն Ղուկասյան, գիտենք, որ դուք այդտեղ ազդեցիկ դեմք եք, ինչո՞ւ եք ասում՝ չեք զբաղվում քաղաքականությամբ:

- Մի կարեւոր բան եմ ուզում ասել, լսի՝ հիմա ժողովուրդը էնքան է քաղաքականացված, որ մինչեւ ժողովուրդը չհավատացին՝ ինքը ում է ընտրում, ով ուզում է, ինչ ուզում է անի, որոշակի ազդեցություն կունենա, բայց որ ասեմ, թե մարդը կարող է 10 տոկոսով ազդեցություն ունենալ, դա սուտ է:

- Մարտուն Գրիգորյանն ի՞նչ ազդեցություն ունի այդտեղ:

- Ես այդ հարցերին չեմ ուզում պատասխանել, ընդհանրապես, բոլորը գիտեն՝ ով ինչ ձեւով է ընտրվել: Ով ընտրվել է փողով, ով ընտրվել է ընտրակեղծիքով, բոլորին գիտեն, իսկ ով է ընտրվել իրոք ժողովրդի կողմից՝ ամբողջ այս քաղաքը գիտի, ժողովուրդը գիտի, դուք չգիտեք: Բոլորի մասին է խոսքը, ստեղ ինչ անուն տաք, բոլորը գիտեն՝ դրանք ինչքան ժողովուրդ ունեն իրենց հետեւից գնացող, իրենց ընտրությունները ոնց են եղել, ոնց են անցկացրել: Բոլորի մասին է խոսքը: Հիմա ես որ նորից ասեմ՝ սենց, նենց, նենց, ես որ քաղաքականությամբ չեմ զբաղվում, կգա ժամանակը, եթե զբաղվեցի, կասեմ:

- Այսինքն, Մարտուն Գրիգորյանը փողո՞վ է ընտրվել:

- Ես այդ անունի համար չեմ ուզում շատ խոսել՝ Մարտունիկը կամ Սամվելը կամ Երվանդը կամ Գալուստը, մյուսը: Ես բոլորի մասին եմ խոսում: Ժողովուրդը լավ գիտի՝ ով ինչ սկզբունքով է ընտրվում ու մինչեւ այսօր ընտրվել: Հասկացա՞ք: Կգա ժամանակը, առիթ եղավ, պետք եղավ, ես կասեմ: Հիմա ես ասելու բան չունեմ: Ես իմ մասին եմ ասում, որ ես էսքան ժամանակ ոչ փողով եմ ընտրվել, ոչ խաբեությամբ, ոչ էլ կեղծիքով:

- Բայց երբ Սամվել Բալասանյանը դարձավ Գյումրիի քաղաքապետ, ինքը ձեզ համար...

- Չեմ ուզում ընդհանրապես այդ անունները լսել, Աստված իրանց հետ, թող Աստված իրանց բարին ցանկանա: Հիմա պասի մեջ ենք, բոլորը թող լավ լինեն, առողջ լինեն, Հայր մերը ո՞նց է ասում՝ թշնամիներիդ ների, որ Աստված էլ քեզ ների: Չնայած թուրքն է իմ թշնամին: Թող բոլորին Աստված խելք ու շնորհք տա, իմաստություն տա, հայրենասիրություն տա, հավատքները շատանա:

- Բայց միեւնույն է, ինքը ձեզ համար անընդունելի թեկնածու է, չէ՞:

- Ընդհանրապես էն մարդն է իմ համար անընդունելի թեկնածու, որը ժողովրդի ձայներով չի ընտրվում: Դու ֆռցնում ես, որ անպայման անուն տամ, ես բոլորի համար կարող եմ խոսել՝ դեմ դիմաց, բայց ես հարմար չեմ գտնում, որ ձեր ասած խոսքերով զբաղվեմ: Բանսարկությամբ չեմ զբաղվում: Հիմա դու ֆռցնում ես, սիրուն չի:

- Պարոն Ղուկասյան, հիշում ենք, որ նրանց ընտանիքի հետ կապված այդտեղ պատմություններ եղան...

- Ես չեմ կարո՞ղ 2 րոպեում կախել հեռախոսը: Բայց ես էնքան լավ մարդ եմ, որ պատասխանում եմ: Դու էլ մտածի, որ ահեղ դատաստան կա, էդպես ֆինտ ու ֆլուշկեքով խոսելն էլ լավ բան չի: Ով էլ քեզ ստիպում է խոսել, իրան բացատրի՝ չեք տեսնո՞ւմ, հերիք չի՞ էդքան դավեք: 

- Չենք դավում, բայց հիշում ենք, որ Գյումրիում կրակոցներ եղան, դուք ընտանիքներով...

- Ցտեսություն, աղջիկ ջան, դու ուղն ու ծուծով չես ուզում հասկանաս:

Հիշեցնենք, նախկինում Վարդան Ղուկասյանը մեզ հետ զրույցում հայտարարել էր, թե եթե որոշի առաջադրվել, ոչ ոք չի կարող իրեն արգելել դա անել: «Սադամ Հուսեյնն էլ գերեզմանից հելնի, կառաջադրվեմ, եթե Աստված ինձ թելադրեց»,- ասել էր Ղուկասյանը: