ԿԳԲ-ի պադվալո՞ւմ, բլե՞ֆ, թե…

Այս մասին «Մենք ենք մեր երկրի վաղվա տերը» նախաձեռնությունը հայտարարություն էր տարածել դեռ երեկ: Ստորագրահավաքը, սակայն, չսկսվեց ոչ ժամը 10-ին, ոչ 11-ին. ողջ օրվա ընթացքում նախաձեռնության հեղինակներն այդպես էլ չհայտնվեցին ժամադրության վայրում: Հիշեցնենք, ստորագրահավաքը տեղի էր ունենալու ամենօրյա ռեժիմով, մինչեւ երեկոյան ժամը 21-ը: Հայտարարության տեքստն էր բավական կոշտ էր: «Նավասարդ Կճոյան հոգեւորականը ամբողջովին հեռացել է եկեղեցուց եւ ներքաշվել գողական կյանքի մեջ: Այս մարդուն իր Բենթլիով կարելի է տեսնել միմիայն մեծ բիզնեսի ներկայացուցիչների կողքին: Ո՞վ է երբեւէ Կճոյանից հոգեւոր հարցերի, իր հոտի խնդիրների մասին գեթ մեկ բառ լսել: Ո՞վ է նրան գեթ մեկ անգամ տեսել եկեղեցու կողքին: Այս մարդը դարեր շարունակ մեր ազգի ինքնությունը պահպանած եկեղեցու վերջին մեղքն է, նրա խայտառակությունը: Կճոյանն այնքան է ներքաշվել գողական կյանքի մեջ, որ, բացի օֆշորային սկանդալից, իր մաֆիոզի դիրքին հարիր չի համարում պարզաբանել իրեն ուղղված հարցերը: Իր պահվածքով Կճոյանը խայտառակում է մեր ազգը, եւ, եթե Կաթողիկոսը որեւէ կերպ չարձագանքի Կճոյանին կարգալույծ անելու մեր պահանջին, ուրեմն ինքը եւս նույն մաֆիայի մաս է կազմում` դրանից բխող բոլոր հետեւանքներով»,- մասնավորապես ասված էր միության տարածած հայտարարության մեջ: Նախօրեին, երբ մեր թղթակիցն այցելել էր Արարատյան հայրապետական թեմ, անգամ նրանից էին հետաքրքրվել, թե ովքեր են սույն միության ներկայացուցիչները: Ուշագրավ է, սակայն, որ երեկ, ողջ օրվա ընթացքում այդպես էլ չհաջողվեց գտնել միությունից որեւէ մեկին: Կճոյանին կարգալույծ անելու նախաձեռնությունը սույն միության առաջին հրապարակային միջոցառումն էր: Հայտարարության մեջ, որպես նախաձեռնող նշված էր ոմն Հովհաննես Ղահրամանյանի անուն, ով ներկայացված էր որպես Երեւանի պետական համալսարանի շրջանավարտ եւ ում գլխավորությամբ էլ տեղի էր ունենալու ստորագրահավաքը: Սոցիալական ցանցերում, սակայն, որտեղ տարածվել էր հայտարարությունը, ԵՊՀ շրջանավարտ Հովհաննես Ղահրամանյան անունով օգտատեր, սակայն, մենք այդպես էլ չհայտնաբերեցինք: Եւ ուրեմն, ինչ կարող էր տեղի ունեցած լինել, ինչու տապալվեց ստորագրահավաքը, ուր կորան նախաձեռնության անդամները ու դրա գլխավոր նախաձեռնողը: Սոցիալական ցանցերում երեկ զանազան վարկածներ էին հնչում: Նախ, կարծիք հնչեց, որ հայտարարությունը պարզապես կատակ էր: Հայաստանում, սակայն, վաղուց նման կատակներ չեն անում: Բոլորն էլ մեր երկրում գիտեն, որ Ազգային անվտանգության ծառայությունը կարող է շատ արագ հայտնաբերել, թե որտեղից է դուրս եկել հայտարարությունը, ովքեր են դրա հետեւում կանգնած: Ըստ շրջանառվող վարկածներից մեկի էլ, նման նախաձեռնություն իրականում գոյություն չունի եւ հայտարարության հետեւում կանգնած է Ամենայն հայոց կաթողիկոսը, ով նպատակ ունի փոխել Նավասարդ արքեպիսկոպոսին, քանի որ նա Արարատյան հայրապետական թեմի առաջնորդի պաշտոնում տեսնում է իր եղբորը` Հայ առաքելական եկեղեցու Նոր Նախիջեւանի եւ Ռուսաստանի հայոց թեմի առաջնորդ, Ռուսաստանում հայրապետական պատվիրակ Եզրաս եպիսկոպոս Ներսիսյանին: Այս վարկածը, սակայն, այնքան էլ տրամաբանական չէ, քանի որ Ռուսաստանի թեմը բավական հարուստ թեմ է եւ հաշվի առնելով, որ Ներսիսյան եղբայրները այնքան էլ անտարբեր չեն նյութական բարիքների հանդեպ, դժվար թե նրանք նման մտադրություն ունենան: Իրականում Ամենայն հայոց կաթողիկոսն ու Նավասարդ Կճոյանը սերտ հարաբերություններ ունեն եւ կաթողիկոսը երբեք Կճոյանին չի հարվածի. նրանք գործում են միասին: Ամենահավանական վարկածը, թերեւս, մեկն է. հասկանալի է, որ օֆշորային աղմկոտ պատմության հետ առնչություն ունեցող, իր հակումներով հանրության շրջանում սկանդալային համբավ վայելող Կճոյանին կարգալույծ անելու նպատակով ստորագրահավաքը մեծ ակցիայի էր վերածվելու: Հիշեցնենք, որ նախաձեռնության հեղինակները դեռ նախօրեին էին հայտարարել, որ արդեն ավելի քան 2500 ստորագրություն հավաքել են: Իսկ երեկ ժամադրության վայրում հավաքված մարդիկ փորձում էին ճշտել, թե որտեղ է ընթանում ստորագրահավաքը: Չի բացառվում, որ նախաձեռնության հեղինակը հայտնվել է Ազգային անվտանգության նկուղում, իսկ նրա «Facebook»-յան էջը փակել են տվել, կամ էլ, նրան, ինչպես նաեւ միության մյուս անդամներին այնպես են ահաբեկել, որ «կորել» են: Համենայնդեպս, մեր ուժային մարմինների համար չէր կարող առանձնակի բարդություն ներկայացնել նման «վտանգավոր սադրիչներին» արագ գտնելն ու լիկվիդացնելը:   

Հ.Գ. Երեկ կրկին զանգահարեցինք Նավասարդ արքեպիսկոպոս Կճոյանին` ճշտելու` տեղյա՞կ է նա, թե ովքեր էին նախաձեռնության հեղինակները եւ որտեղ են հիմա նրանք գտնվում: Հիշեցնենք, նախօրեի մեր փորձերը` հանդիպել արքեպիսկոպոսին, ապարդյուն էին անցել, անպատասխան էին մնացել նաեւ մեր հեռախոսազանգերը: Երեկ զանգահարեցինք «փակ համարից»: Պարզվեց՝ «փակ համարներին» արքեպիսկոպոսը պատասխանում է: Նա, սակայն, լսելով թերթի անունը, հայտարարեց. ««Հայկական ժամանակին» ասելիք չունեմ, աղջիկ ջան, կներես ինձ»: