Նոյեմբերյանում, Հրազդանում և Աղավնաձորում բացվել են երիտասարդական կենտրոններ

Փետրվարի 7-ին երիտասարդական կենտրոններ են բացվել Տավուշի մարզի Նոյեմբերյան քաղաքում, Կոտայքի մարզկենտրոն Հրազդանում և Ծաղկաձոր համայնքի Աղավնաձոր բնակավայրում, հայտնում են ԿԳՄՍ նախարարությունից։ 

Երիտասարդական կենտրոնները հիմնվել են ՀՀ ԿԳՄՍ նախարարության կողմից տեղական ինքնակառավարման մարմինների և քաղաքացիական հասարակության կառույցների հետ համագործակցությամբ։

Կենտրոնների բացմանը ներկա են եղել ԿԳՄՍ նախարար Ժաննա Անդրեասյանը, նախարարի տեղակալ Արթուր Մարտիրոսյանը, ՏԿԵ նախարարի տեղակալ Ավետիք Դարբինյանը, ՏԻՄ և քաղաքացիական հասարակության ներկայացուցիչներ։

Միջոցառումների շարքը սկսվել է Տավուշի մարզի Նոյեմբերյան համայնքից, որտեղ բացվել է «Լոֆթ Նոյեմբերյան» երիտասարդական կենտրոնը:

Նախարար Ժաննա Անդրեասյանը շնորհավորել է ներկաներին կենտրոնի բացման առիթով՝ մասնավորապես ընդգծելով. «Հերթական երիտասարդական կենտրոնի բացումը պետության հետևողական քաղաքականության արդյունքն է: Մենք մտադիր ենք բոլոր համայնքներում ձևավորել երիտասարդների զարգացման, ժամանցի, գաղափարների քննարկման, դասընթացների անցկացման միջավայրեր:

Կարծում եմ՝ կենտրոնները մեկը մյուսից ստացված են։ Այստեղ այցելողները, վստահ եմ, ցանկություն են ունենալու կրկին վերադառնալ այս միջավայր։

Երիտասարդական քաղաքականությունը իսկապես շատ լուրջ պոտենցիալ ունի մեր երկրում։ Համոզված ենք, որ երիտասարդների հաջողությունների սկիզբը կարող է դրվել նաև կենտրոններում, որտեղ նրանք ազատ են՝ արտահայտելու իրենց մտքերն ու գաղափարները, ինչպես նաև գտնելու դրանց իրագործման ճանապարհները»:

Նախարարը շնորհակալություն է հայտնել գործընկեր բոլոր կառույցներին՝ նշելով՝ կենտրոնները հաջողում են, որովհետև համագործակցության արդյունք են:

Ելույթով հանդես է եկել նաև ԿԳՄՍ նախարարի տեղակալ Արթուր Մարտիրոսյանը՝ շնորհակալություն հայտնելով գործընկերներին՝ կարևոր համագործակցության համար: Նա առանձնակի անդրադարձել է ԿԳՄՍ նախարարի հրամանով հաստատված երիտասարդական միջավայրի գործունեության ուղեցույցին, որտեղ մանրամասն նկարագրված է պետության ակնկալիքը երիտասարդական կենտրոնից: Նա ընդգծել է, որ կարևոր է ունենալ մասնակցային գործընթաց՝ կենտրոններում ձևավորելով ստեղծագործական ներուժի զարգացման, ակտիվ քաղաքացիության, ինքնադրսևորման և ինտելեկտուալ ժամանցի միջավայր:

Նոյեմբերյանի երիատասարդական կենտրոնի բացմանը ներկա են եղել նաև ՀՀ Տավուշի մարզպետի տեղակալ Նարեկ Ղուշյանը, Նոյեմբերյան համայնքի ղեկավար Արսեն Աղաբաբյանը, պաշտոնատար այլ անձինք:

Հաջորդիվ ԿԳՄՍ նախարար Ժաննա Անդրեասյանը և նախարարի տեղակալ Արթուր Մարտիրոսյանը, ՏԿԵ նախարարի տեղակալ Ավետիք Դարբինյանը մասնակցել են նաև «Հրազդան» և Աղավնաձորի «Ալտերնատիվ» երիտասարդական կենտրոնների բացման միջոցառումներին:

Պաշտոնյաները շրջել են երիտասարդական կենտրոններում, ծանոթացել ստեղծված պայմաններին, նրանց ներկայացվել են 2026 թվականին նախատեսված միջոցառումների ծրագրերը։

Հրազդանի և Ծաղկաձորի երիտասարդական կենտրոնների բացմանը ներկա են եղել Կոտայքի մարզպետի տեղակալ Վասակ Վարդանյանը, Հրազդան համայնքի ղեկավար Սևակ Միքայելյանը, Ծաղկաձոր համայնքի ղեկավար Նարեկ Հարությունյանը:

Երիտասարդական կենտրոնների բացման շրջանակում կնքվել են նաև եռակողմ հուշագրեր՝ ԿԳՄՍՆ-ՏԻՄ-քաղաքացիական հասարակության կազմակերպություն: Ըստ այդմ՝ Նոյեմբերյանում հուշագիրը կնքել են ԿԳՄՍ նախարար Ժաննա Անդրեասյանը, համայնքի ղեկավար Արսեն Աղաբաբյանը, «Լոֆթ» կրթության, մշակույթի և երիտասարդության զարգացման համահայկական ՀԿ-ի տնօրեն Արևիկ Համբարձումյանը: Հրազդանում հուշագիրը ստորագրել են Ժաննա Անդրեասյանը, համայնքի ղեկավար Սևակ Միքայելյանը, «Հայի բռունցք» երիտասարդության, մշակութային ՀԿ-ի նախագահ Գարիկ Աղասյանը, Աղավնաձորում՝ ԿԳՄՍ նախարարը, համայնքի ղեկավար Նարեկ Հարությունյանը և «Հայ առաջադեմ երիտասարդություն» ՀԿ-ի նախագահ Գրիգոր Երիցյանը:

Նշենք, որ երիտասարդական կենտրոններ են գործում նաև Սյունիքի մարզի Մեղրի, Կապան քաղաքներում, Վերիշեն բնակավայրում, Տավուշի մարզի Իջևան և Դիլիջան քաղաքներում, Արագածոտնի մարզի Ապարան քաղաքում, Գեղարքունիքի մարզի Ճամբարակ քաղաքում, Ծովագյուղ բնակավայրում, Արարատի մարզի Արարատ քաղաքում, Շիրակի մարզի Ախուրյան բնակավայրում:

Համայնքներում ստեղծված երիտասարդական միջավայրերի գործունեությունը ուղղված է 13-35 տարեկան երիտասարդների ստեղծագործ ներուժի բացահայտմանը, կարողունակությունների և ակտիվ քաղաքացիության զարգացմանը, ինտելեկտուալ ժամանցի կազմակերպմանը, առկա հնարավորությունների վերաբերյալ իրազեկվածության բարձրացմանը: