ՀՅԴ-ն` ընդդեմ կառավարության

Երբ Արմեն Ռուստամյանը ներկայացնում էր իրենց օրինագիծը, «Ժառանգությունը» ցուցադրաբար բացակայում էր դահլիճից: Այս երկու ընդդիմադիր գործընկերները, արդեն 2 օր է, բոյկոտում են իրար եւ փոխադարձ մեղադրանքներ ներկայացնում: Վարչապետ Տիգրան Սարգսյանին եւ նրա կաբինետին անվստահություն հայտնելու ՀՅԴ-ի նախագիծը քվեարկության կդրվի այսօր: Երեկ մեր հարցերին պատասխանեց Արմեն Ռուստամյանը: 

- Պարոն Ռուստամյան, դուք ԱԺ նախագահի ընտրությունների ժամանակ քվեարկեցիք ՀՀԿ-ական Սամվել Նիկոյանի օգտին, որն ասում է` լինելու է կառավարության հենարանը, իսկ այսօր անվստահություն եք հայտնում կառավարությանը: Ինչո՞վ կբացատրեք: Սա նորմա՞լ է:
- Նորմալ է, որովհետեւ մենք շահագրգռված ենք, որ ԱԺ-ն գործի: Ի վերջո, սա Ազգային ժողով է, հնարավորություն է, որ խնդիրներ բարձրացնենք, հասարակությունն էլ կարողանա, այդ իրական բանավեճը տեսնելով, կողմնորոշվել: Խորհրդարանը պայքարի դաշտ է: Այդ պայքարի դաշտը չթողնել, որ մնա, ճիշտ չի լինի:

- Բայց այստեղ հակասություն կա. դուք պահանջում եք կառավարության հրաժարականը, բայց ձեր ձայնը տալիս եք այդ կառավարության հենարանը հանդիսացող թեկնածուին:
- Մենք այդ ընտրությանը որեւէ նշանակություն չենք տվել, այդ ընտրությունից ոչինչ կախված չէր: Սա ակնհայտ փաստ է, պետք չէ այս ընտրությունը դարձնել համաշխարհային հարց: Որտեղ պայքար է պետք տանել, չենք տանում: Իսկ  որտեղ երկրորդական, ճ-երորդական հարց է, մազ ենք գտնում ձվի մեջ ու սկսում ենք արժեվորել: Ոչ մի տեղ չտանող բան է:

- Երեկ դաշնակցական պատգամավոր Արծվիկ Մինասյանն ասում էր, թե «Ժառանգությունն» էլ գիտեր, որ միեւնույնն է` Լարիսա Ալավերդյանը չի անցնելու, բայց նրա թեկնածությունն առաջադրեց: Այդ նույն տրամաբանությամբ` Դաշնակցության համար էլ պարզ չէ՞, որ կառավարությանը անվստահություն հայտնելու նախագիծը, միեւնույնն է, չի անցնելու, այդ դեպքում իմաստը ո՞րն էր այս նախագիծը ներկայացնելու:
- Իմաստն այն է, որ մենք այստեղ իսկապես կուտակում ենք շատ լուրջ իրավական հիմքեր` այնուհետեւ այս հարցերը տեղափոխելու ավելի լուրջ մակարդակ: Այս բոլորն օգտագործվելու է, կորած չէ այս ամենը: Եթե մենք փաստում ենք, որ Սահմանադրության կոպիտ խախտում է եղել, որ կառավարությունը չի առաջնորդվել ԱԺ-ի կողմից հավանություն ստացած ծրագրով, եւ հետո իրավական ճանապարհով մենք հնարավորություն ենք ունենում հարցը հետապնդել, սա ժամկետայնություն չունի: Հիմա, օրինակ, խոսում են Սերժ Սարգսյանի պաշտոնանկության իրավական ճանապարհի մասին, չէ՞: Իրավական փաստերը շատ ավելի կայուն են, շատ ավելի օգտակար են` հետո դրանք օգտագործելու համար: Ընդդիմությունը երբեք էլ չի կարող իր ձայներով որոշումների հասնել, բայց ընդդիմության դերը` զսպող եւ հակակշռող, հենց դա է: Սա պայքար է, այս պայքարը չանելն ամենահեշտ գործն է: Կարելի է մի կողմ քաշվել, բոյկոտել, մտածել, որ եթե դու քիչ ես, ուրեմն` անիմաստ է որեւէ գործողություն, ուրեմն` փակենք դռները, կուսակցությունները, գնանք տուն:

- Այդ տրամաբանությամբ, «Ժառանգությունն» էլ կարող է ասել, որ իրենք առաջադրել էին իրենց թեկնածուին, քանի որ ուզում են պայքարել:
- Բայց մենք բան չունենք ասելու, ասում ենք` լավ եք արել, առաջադրել եք, բայց մենք դրա մասին ենք ասո՞ւմ: Բայց որ «ժառանգությունն» ասում է` ՀՅԴ-ն ինչու մեզ ձայն չտվեց, ուրեմն` ՀՅԴ-ն ընդդիմություն չէ, բացարձակապես անտրամաբանական եզրակացություն է: Դա կարող է տեղի ունենալ այն դեպքում, երբ իսկապես լուրջ բան է որոշվում: Անիմաստ է, ասում ենք` անիմաստ է: Սա բոլորը գիտեն, բայց չգիտես ինչու որոշել են, որ այս ընտրությունը Դաշնակցության տեղի ու դերակատարության կարեւոր ցուցանիշ է հանդիսանում: Դե լավ, ամոթ է, չէ՞: Այսպես պրիմիտիվ, մանկական պատկերացումներով կարելի՞ է խոսել քաղաքական գործընկերների հետ: Մենք էլ այնքա՜ն օրինակ բերենք: Դե որ այդպես է, բերում ենք բանաձեւ, որ քվեարկվի, մտնի օրակարգ` ցեղասպանության հայեցակարգն է, ուրացման պատժելիության խնդիրն է: Դեմ են քվեարկում: Հիմա ի՞նչ, վեր կենանք, ասենք, որ իրենք պրոթուրքական ու՞ժ են: Ամոթ է, չէ՞:    

- Արծվիկ Մինասյանը երեկ ասում էր նաեւ, որ ԱԺ խոսնակի նշանակումը վերապահված է իշխանությանը: Այսինքն, մեծամասնությունը պետք է առաջադրի Աժ նախագահին: Այդ տրամաբանությամբ` կառավարության ձեւավորումն էլ է իշխանությանը վերապահված: Այսինքն, դուք ասում եք, որ իրավունքը իշխող մեծամասնությանն է, բայց անվստահություն եք հայտնում այդ մեծամասնության ձեւավորած կառավարությանը:
- Դրանք տարբեր բաներ են, որովհետեւ կառավարության ձեւավորումը եւ ԱԺ նախագահի ընտրությունը տեղի են ունենում ձայների քանակով: Եւ մեծամասնությունը` պարզ է, որ պիտի պաշտպանի իր թեկնածուին: Ուրիշ բան` այդ մեծամասնությունը ճի՞շտ է ձեւավորվել, թե` ոչ: Ուրիշ բան, որ մենք թույլ չտանք, որ մեր ձայները կեղծելով մեծամասնություն ձեւավորվի: 

- Ես էլ դա եմ ասում:
- Մենք անվստահություն ենք հայտնում իրենց սխալների համար: Կարող է մեծամասնություն լինի, բայց սխալներ գործի: Դա չի նշանակում` եթե մեծամասնություն է, հավերժական է ու ինչ ասում է` ճիշտ է. ո՞վ է ասում:

- Այսինքն, դուք ասում եք` այս մեծամասնությունը այս կառավարությանը փոխի, եւ նույն մեծամասնությունը նոր կառավարությու՞ն ձեւավորի:
- Ոչ, որովհետեւ իրենք հայտնվում են սահմանադրական լիազորությունները գերազանցելու մեղադրանքի առաջ: Իրենք դա պիտի քննարկեն` մնա՞ն այդ մեղադրանքի տակ, թե` ոչ: 

- Պարոն Ռուստամյան, «Ժառանգությունից» այսօր ոչ ոք ներկա չէր, երբ դուք ներկայացնում էիք կառավարությանն անվստահություն հայտնելու օրինագիծը: Դա կարելի է դիտել որպես բոյկո՞տ ՀՅԴ-ին: Եւ եթե իրենք չեն միանում ձեր նախաձեռնությանը, նշանակում է` իրենք կո՞ղմ են այս կառավարությանը:
- Մանկական է: Ես եթե իրենց տրամաբանությամբ մտածեմ, նույնը կարող եմ իրենց ասել: Կառավարության անվստահության հարց էր դրված: Կարող էր քվեարկվել դա, եւ հիմա հետաձգել ենք: Ինչպե՞ս պիտի քվեարկեին: Եթե իրենց տրամաբանությամբ նայենք, կվերցնեի քվեարկության արդյունքները ու կասեի` միայն ՀՅԴ-ն է կողմ եղել, ո՞ւր է «Ժառանգությունը», ուրեմն` եկեք պարզենք դաշտերը: Եթե իրենց տրամաբանությամբ մտածեմ, այդպիսի բազմաթիվ օրինակներ կարող եմ բերել, ավելի լուրջ մեղադրանքներ ներկայացնել, քան այս պրիմիտիվ հարցն են իրենք ներկայացնում: Ձախողվել է իրենց արածը` հերիք չէ, փորձում են արդարացում գտնել, ու պարզվում է` այս ամբողջի նպատակը ընդդիմություն եւ իշխանություն սահմանագիծը ճիշտ տանելն էր, իրենք դրան հասել են, ժողովրդի աչքերը բացել են: Լավ, ամեն ինչ սահման ունի, չէ՞, մառազմն էլ չափ ունի, չէ՞: