Գալստանյանին շպրտել են փողոց, ՌԴ-ն գանգին տարբեր պարտադրանքներ է դնում, մի օր հավաքելու է «լեշը». Սուքիասյան

«Քրիստոնեա-ժողովրդավարական» կուսակցության փոխնախագահ Հայկ Սուքիասյանը Վազգեն (Բագրատ) Գալստանյանի հորդորով ոստիկանության վրա սկսած գրոհը համարում է ռուսական ԿԳԲ-ի պարտադրանքը, ինչը, ըստ նրա, կարող էր ավարտվել «Հոկտեմբերի 27»-ի կրկնությամբ և պետության գլխատմամբ:

Վերջինս ընդգծում է, որ իրավապահ համակարգին հաջողվեց կասեցնել ՀՀ պետականությունը կործանել ցանկացող Ռուսաստանի Դաշնությանը, իսկ Հայաստանը պաշտպանել Ռոբերտ Քոչարյանից, կաթողիկոսից:

«Այդ մարդուն (- խմբ նկատի ունի՝ Վազգեն (Բագրատ) Գալստանյանին) կտրել են Աստծուց, բերել շպրտել այդտեղ, նա էլ բարոյապես մաշվել է, հոգին՝ քրքրվել ու որպես մարդ դադարել գոյություն ունենալ։ Իր գանգին Կիրիլի միջոցով Ռուսաստանը տարբեր պարտադրանքներ է դնում, օգտագործում, որ ամեն պահի սադրի իրավիճակը և կործանի Հայաստանը։ Պարզ է, որ չեն կարողանալու անել դա, և ռուսական կողմը մի օր հավաքելու է Գալստանյանի «լեշը»»,- «Հայկական ժամանակ»-ի հետ զրույցում ասում է նա։

Զրուցակիցը նկատում է՝ Ռուսաստանը չի կարողանում համակերպվել, որ Հայաստանը պահպանում է իր ազատությունն ու անկախություն, հետևաբար, տվյալ խմբակի միակ նպատակը ամեն գնով Հայաստանում հեղաշրջման հասնելն է, որից հետո ՀՀ պետականությունը կտրվի ՌԴ-ին։

Սուքիասյանը, սակայն, համոզված է, որ ինչպես բանակն է պահում ՀՀ պետական սահմանը, այնպես էլ իրավապահ համակարգը պաշտպանելու է պետությունը հակապետական տարրերից․ «Որոշել են ռուսների երկրորդ գալուստը ապահովեն, այսինքն՝ կանադացին ռուսական հոգեկան հիվանդությամբ Հայաստանում փրկում է Արցախը, որ հետո ՀՀ պետությունը տա Դաշնությանը։ Ակնհայտ է, որ հեղափոխություն չեն կարող իրականացնել, գնում են ահաբեկչական գործողությունների, գրոհներ են սկսում։ Կարող են շատ տարբեր գործողություններ սկսել, բայց այդ դեպքում պետությունն իր ամբողջ իրավական համակարգով նրան իր ճորտերի հետ կմխի ասֆալտին, որ որպես չուչել դարերով մնա գետնին։ Այդ վախից Գալստանյանը արդեն աղերսում է, որ իրեն հետ կանչեն խորդանոց, որովհետև հիմա ինքը սրբազան կարող է լինել միայն Ադրբեջանում»։

Այս համատեքստում նա զարմանալի չի համարում Գալստանյանի հրահրած բախումներից հետո կաթողիկոսի գլխավորությամբ Գերագույն խորհրդի արած հայտարարությունը, որտեղ կրկին քաղաքական կոչեր են հնչեցրել և մեղադրանքներ ուղղել միայն իշխանությանը։

Սուքիասյանի կարծիքով՝ այս հայտարարությունից հետո Գալստանյանի այն խոսքերը, թե իրենց իրավունք է տրվել ոստիկանների հետ վարվել այնպես, ինչպես ուզում են ու անել այն, ինչ ուզում են, ապացուցում է, որ շարժման մասնակիցներին արտոնություններ տրամադրողը եկեղեցին է․ «Ասում են՝ «դատապարտելի է հանրահավաքների կազմակերպման պատասխանատվությունը եկեղեցուն վերագրելը», բայց բոլորն էլ գիտեն, որ կաթողիկոսն արդեն քաղաքականությամբ է զբաղվում, և եկեղեցու բարձունքում հոգևորականների մամռակալած մի հատվածը նրա գլխավորությամբ հակապետական պրոցեսներ է գեներացնում երկրում։ Ուստի ամենի պատասխանատուն միայն եկեղեցին է՝ կաթողիկոսի գլխավորությամբ։ Հրաման են ստացել, Գալստանյանին դուրս են հանել, նա էլ առանց իր գլխավորի չի կարող գործել։ Ես մեղադրում եմ կաթողիկոսին ՀՀ պետության դեմ գործելու, Առաքելական Սուրբ եկեղեցին այլասերելու համար և պահանջում եմ նրա հրաժարականը»։

Սուքիասյանի կարծիքով՝ եկեղեցին օկուպացրել են հոգևորականության հետ կապ չունեցող անձինք, և ոչ միայն Գարեգին Բ-ն պետք է հեռանա, այլ նաև Մայր Աթոռն ազատագրվի․ «Կաթողիկոսն ու հոգևոր դասի մի մասը օտար պետության ճորտեր են, բայց եթե թեկուզ նա անցնի սահմանները, իրավապահները Գալստանյանի հետ միասին նրան էլ պետք է ասֆալտին մխեն. ժողովուրդը պարտավոր չէ նրան հարգել։ Այսպես լավ ճորտ եղել է նաև Լեռնային Ղարաբաղի կլանը, որի ղեկավարներին Ռուսաստանը հանձնել է Բաքվին, նույնն էլ սրանց է սպասվում»։

«Քրիստոնեա-ժողովրդավարական» կուսակցության փոխնախագահը ևս մեկ անգամ պնդում է՝ օրենքը պետությունը պաշտպանելու համար առանց բացառությունների պետք է գործի, և եթե շարժման առաջնորդի շուրթերով հնչում են քրեական տարեր պարունակող հայտարարություններ, ապա վերջինս պետք է առերեսվի իրավապահ համակարգին։

Մերի Խաչատրյան