Հայաստանը պետք է աղմուկ բարձրացնի, ԵՄ-ի այս ուղերձը վկայում է, որ ռազմական հարձակման հավանականությունը մեծ է. քաղաքագետ

«Եթե ԵՄ-ն Հայաստանի դեմ Ադրբեջանի հարձակման մասին խոսում է «եթե»-ով, ապա ռազմական հարձակման հավանականությունը մեծ է, չնայած նրան, որ ԵՄ դիտորդական առաքելությունը այստեղ է՝ զսպելու ադրբեջանական ագրեսիան»։ 

Այս մասին «Հայկական ժամանակ»-ի հետ զրույցում ասում է քաղաքագետ Հայկ Սուքիասյանը՝ անդրադառնալով ԵՄ դիտորդական առաքելության ղեկավար Մարկուս Ռիտերի հայտարարություններին՝ կապված հայ-ադրբեջանական հարաբերությունների և ԵՄ առաքելության աշխատանքի հետ: Վերջինս, հիշեցնենք, ասել է՝ շատ հայեր կարծում են, որ Ադրբեջանը կհարձակվի գարնանը։ Եթե դա տեղի չունենա, ԵՄ դիտորդական առաքելությունը հաջողված կարելի է համարել:

«Այս հայտարարությունը ցույց է տալիս, որ սա ուղերձ է Հայաստանին ԵՄ-ի կողմից։ Այս ուղերձով ասվում է՝ վավերացրեք Հռոմի ստատուտը, որպեսզի կարողանաք ադրբեջանական պատերազմական հանցագործությունների մասով դիմել դատարան։ Այս զեկույցները ունեն միջազգային լեգիտիմություն, մենք էլ պետք է հասկանանք, որ ԵՄ-ի օգնությունը մեզ ռազմական չի լինելու, կլինի քաղաքական և իրավական։ Այն կարող է լինել նաև միջազգային տեղեկատվական ու բարոյական աջակցությամբ»,- կարծում է Սուքիասյանը:

Ըստ նրա՝ էական չէ, թե ադրբեջանական կողմն առաջինը ինչպես կհարձակվի՝ Արցախի՞ կողմից, թե՞ ՀՀ-ի: Նա նկատում է՝ չնայած նրան, որ Արցախի նկատմամբ ԵՄ դիտորդական առաքելությունը չի տարածվում, սակայն միջազգային քաղաքակիրթ կարծիքները համընկնում են ՀՀ-ի հետ:

«Միջազգային հանրությունն աջակից է մեր տեսակետին, բայց դա էլ չի զսպի Ադրբեջանին, քանի որ տարածաշրջանը դեռևս Ռուսաստանի և Ադրբեջանի վերահսկողության տակ է։ Ադրբեջանն այս դեպքում որոշակի ազատություն ունի։ Հայաստանը պետք է աղմուկ բարձրացնի՝ նույնիսկ ԵՄ-ի կողմից կա անհանգստություն, որ մեր երկրի դեմ հարձակում է լինելու, Ադրբեջանը գնում է ռազմական էսկալացիայի։ ՀՀ-ի տարածքում ադրբեջանական ուժերն այսպես, թե այնպես կան՝ Սև լճի, Վարդենիսի։ Դա էլ ապացույցն է այն բանի, որ Ադրբեջանը լկտի պետություն է և թքած ունի միջազգային իրավունքի վրա»,- նշում է նա։ 

Սուքիասյանի խոսքով՝ քանի դեռ ԵՄ առաքելությունը բավականին ժամանակ ունի մնալու ՀՀ-ում, պետք է կարողանալ այս առաքելությունից վերցնել այն, ինչ պետք է մեր երկրին։ Եթե Հայաստանը որոշ հարցերում տատանվի, կենսական շահի ապահովման համար քայլեր չձեռնարկի, աշխարհն այսքանից ավելին չի աջակցի և օգնի։ Առաջնային հարցը, ըստ նրա, ՀՀ-ի ոտքի կանգնելու հարցն է ռազմական առումով։

«Դա անհրաժեշտ քայլ է, ՀՀ-ն հարձակման դեպքում այնպիսի հակահարված պետք է տա Ադրբեջանին, որ մի քանի տարի ադրբեջանական կողմը չկարողանա մտածել նորից ռազմական հարձակման մասին։ ԵՄ-ն մեզ ժամանակ է տալիս՝ դիտորդներ, զեկույցներ։ ՀՀ-ն պետք է արտաքին աշխարհի հետ աշխատի, բայց դա այնքան էլ հեշտ չէ, քանի ռուս-թուրքական դրոշակը դեռ տարածաշրջանում է»,- ասում է նա:

Զրուցակիցը կարծում է, որ այս պարագայում ՀՀ իշխանությունները պետք է քիչ խոսեն մեր թուլության մասին, աշխատեն մոբիլիզացիայի ուղղությամբ, քանի որ միայն արտաքին ճնշումներով ու դիվանագիտական աշխատանքով Ադրբեջանը չի կանգնելու. «Դրանք մեզ միայն սփոփանք ու ժամանակ են տալիս, բայց Ադրբեջանը դեռ ձգտում է մեր հայրենիքին։ Այնպիսի ժամանակահատված է, որ ով ինչպես և որտեղից կարողանում է, ինչ-որ բան է պոկում և վերցնում»:

Անդրադառնալով նաև ադրբեջանական կողմի արձագանքին՝ ԵՄ դիտորդական առաքելության ղեկավարի հնչեցրած հայտարարությունների վերաբերյալ, որտեղ Ադրբեջանը մեղադրել է ՀՀ-ին և նշել, որ Հայաստանում ԵՄ առաքելությունը պատշաճ կերպով պետք է տեղակայվի՝ հաշվի առնելով Ադրբեջանի օրինական շահերը՝ Սուքիասյանն ասում է՝ Ադրբեջանի պատկերացրած օրինական շահերը հետևյալն են․ «Արցախը հանձնում ենք Ադրբեջանին, որ տարածքները Հայաստանից օկուպացրել է, ճանաչում ենք իր տարածքների մաս, «Զանգեզուրի միջանցք»-ի հարցն ենք բարձրաձայնում։ Այս ամենը, ինչը իրենց պատկերացումով օրինական է, մեզ համար անօրինական է, և ՀՀ-ն պետք է ուշադրություն չդարձնի նույնիսկ»։ 

Քաղաքագետի խոսքով՝ Հայաստանը պետք է ցանկացած պարագայում անվախ լինի և ձեռնարկի բոլոր քայլերը՝ իր շահերը պաշտպանելու համար։