Շիրակցի փաստաբանների խոսքով՝ դատավորներին անընդհատ տեղափոխելով՝ քաղաքացին կորցնում է դատարանի հանդեպ վստահությունը

Բարձրագույն դատական խորհուրդն անվերջ դատավորների տեղափոխություններով է զբաղված։ Սակայն վերջին մեկ-երկու ամսում որդեգրած քաղաքականությունն աննախադեպ է։ Այս պահին Շիրակի մարզի ընդհանուր իրավասության դատարանում կոլապսային իրավիճակ է։

Գնահատականը «Երկխոսության մեդիա կենտրոն»-ում այսօր հնչեցրել են շիրակցի փաստաբանները։

Միայն վերջին երկու ամսում ԲԴԽ որոշմամբ Շիրակի մարզից 10 դատավոր է տեղափոխվել Երևան։ Այս քայլով, նրանց գնահատմամբ, պարալիզացվել է Շիրակի մարզի ընդհանուր իրավասության առաջին ատյանի դատարանի աշխատանքը: Մոտեցումը, փաստաբանների խոսքով, անհասկանալի է։ Միանգամից 4 քրեական և 6 քաղաքացիական դատավոր է տեղափոխվել մայրաքաղաք։

Ըստ փաստաբան Հայկ Հակոբյանի՝ քրեական գործերով զբաղվող դատավորներից ամենաերկարը 1 տարի էր աշխատել Շիրակում, և եթե նրա վարույթում կար 100 գործ, այդ ընթացքում կարող էր ավարտել ընդամենը 5-ը։

«Վերջին մեկ տարվա ընթացքում 10-11 դատավոր Շիրակի մարզի դատարանից տեղափոխվել է այլ դատարաններ, այսինքն՝ 18-19 հաստիքով, դատարանի կեսից ավելին տեղափոխված են»,- հայտարարել է փաստաբան Արամայիս Հայրապետյանը։

Ըստ նրա՝ ստացվում է, որ հաճախակի տեղափոխությունների պատճառով դատավորների վարույթներում գտնվող քրեական ու քաղաքացիական գործերը արհեստականորեն ձգձգվում են, վերջնական վճիռներ չեն կայացվում։ Դատավորների տեղափոխությունների պատճառով ոչ միայն ստիպված են լինում արդեն մի քանի անգամ դատաքննություններով անցած նույն գործի դատական պրոցեսը սկսել զրոյից, այլև մի քանի տարի հնարավորություն չեն ունենում հայցվոր կողմին տրամադրել վերջնական վճիռը։

Վերջինիս խոսքով՝ կան դատական գործեր, որոնց դեպքում այս ընթացքում 3-4 դատավոր է փոխել:

«Գործեր ունենք, որ հինգ տարի մուտք են գործել դատարան, և քննությունը չի սկսվել: Կան գործեր, որ հասել են վերջին, և նորից զրոյից սկսում են: Քաղաքացին կորցնում է դատարանի նկատմամբ վստահությունը, իսկ քրեականի մասով նույնիսկ անդառնալի հետևանքներ կարող են լինել»,- նկատել է Հարությունյանը։

Գայանե Գևորգյանի խոսքով էլ՝ յուրաքանչյուր դատավորի փոփոխություն նշանակում է, որ գործընթացը նորից պետք է սկսել, այս դեպքում քաղաքացուն պատասխան պետք է տա փաստաբանը:

«Դատավորները Շիրակի մարզից տեղափոխվում են Երևանի ընդհանուր իրավասության դատարանի թափուր պաշտոնները զբաղեցնելու համար։ Ստացվում է, որ Շիրակի մարզը տրամպլի՞ն է՝ գալ, փորձառություն ձեռք բերել ու գնալ Երևան: Ուրեմն մեզ մոտ ոչ արհեստավարժ դատավորնե՞ր պետք է միշտ աշխատեն»,- նշել է նա:

Արամայիս Հայրապետյանն էլ շեշտել է՝ Շիրակի մարզում գործ ունեն մերժված արդարադատության հետ. «Գործը ողջամիտ ժամկետում չի քննվում, չի ավարտվում, որոշում չի կայացվում։ Այդ արդարադատությունն արդեն մերժված է ու իր նպատակին չի ծառայում, առավել ևս՝ քրեական մասով: Իմ վարույթում կա քրեական գործ, որը քննվում է 8-9 տարի»:

Փաստաբաններն իրենց դիմում-բողոքն են ուղարկել նաև ԲԴԽ, հանդիպում են ունեցել Փաստաբանների պալատի նախագահի հետ, ներկայացրել Շիրակի մարզի ընդհանուր իրավասության դատարանում ստեղծված իրավիճակը։

Ըստ բանախոսների՝ Փաստաբանների պալատը ևս գյումրեցի փաստաբանների բողոքը պատրաստվում է գրավոր ներկայացնել ԲԴԽ։

Մինչ այդ, Շիրակի մարզի փաստաբանները խնդրի լուծման տարբերակ են առաջարկում՝ դատավորի համար նվազագույնը հինգ տարի պարտադիր աշխատանք նշանակված վայրում կամ դատավորների կազմի ավելացում: