Արցախի նախագահը խաղի մե՞ջ է, թե՞ դուրս, գուցե կան նաև ոչ ֆորմալ ուժե՞ր. Նորիկյանը՝ Բալասանյանի պաշտոնից ազատման մասին

«Հարց է՝ արդյոք Արցախի քաղաքական էլիտան միատա՞րր է, թե՞ ոչ, ունե՞ն նույն պատկերացումները ԼՂ ճակատագրի վերաբերյալ, արդյոք Արցախի նախագահն Արայիկ Հարությունյա՞նն է: Նրա, Վիտալի Բալասանյանի ու Ռուբեն Վարդանյանի պատկերացումները նո՞ւյնն են ստեղծված իրավիճակի հաղթահարման գործընթացում, թե՞ կան տարբեր մոտեցումներ, որոնք բացառում են համատեղ աշխատանքը»:

Այս մասին «Հայկական ժամանակ»-ի հետ զրույցում ասում է «Արդար Հայաստան» կուսակցության նախագահ Նորայր Նորիկյանը՝ անդրադառնալով ԼՂ նախագահ Արայիկ Հարությունյանի հունվարի 7-ի ստորագրած հրամանագրին, որի համաձայն՝ Վիտալի Բալասանյանն ազատվել է ԱՀ Անվտանգության խորհրդի քարտուղարի պաշտոնից և նրան այդ պաշտոնում փոխարինել է Արարատ Մելքումյանը։

«Սույն ազատումն անսպասելի էր: Սա խոսում է Արցախի քաղաքական էլիտայում տեղի ունեցող խորքայի փոփոխությունների մասին, որոնց իրական պատճառը, կարծում եմ, պարզ կդառնա ավելի ուշ: Ըստ էության՝ ԼՂ քաղաքական վերնախավում բացակայում է միատարրությունն ու չկա հստակեցված պատկերացում տարածաշրջանի հետագա ճակատագրի վերաբերյալ»,- նշում է նա:

Ըստ նրա՝ տպավորություն է, որ ԼՂ-ում իշխանությունը բաժանված է մի քանի մասի:

«Ո՞վ է որոշում կայացնողն Արցախում այսօր: Փաստացի, կա մանդատով ընտրված նախագահ, սակայն հարց է՝ նա ամբողջությամբ իրականացնո՞ւմ է իր պարտավորությունները և տիրապետո՞ւմ է ստեղծված իրավիճակին, թե՞ ոչ: Հետաքրքիր է նաև, թե ինչ իրավասություններով է օժտված Արցախի Անվտանգության խորհուրդը, որքանո՞վ է դրա նոր քարտուղարը ենթակա լինելու պետնախարարին: Այլ կերպ ասած՝ Արայիկ Հարությանը խաղի մե՞ջ է, թե՞ հայտնվել է խաղից դուրս վիճակում: Խորը մտահոգություն ունեմ, որ Արցախում կան նաև ոչ ֆորմալ ուժեր, որոնք ոչ պակաս ազդեցություն ունեն և տրամադրություններ գեներացնելով են զբաղվում»,- ընդգծում է նա:

Նորիկյանը, արձագանքելով նաև Արցախի պետնախարար Ռուբեն Վարդանյանի երեկվա այն հայտարարությանը, ըստ որի՝ Արցախից մի հայտնի ընտանիք ռուս խաղաղապահների հետ պայմանավորվածության միջոցով լքել է Արցախի տարածքը՝ հանգստի մեկնելու նպատակով, ասում է. «Նման շատ հայտնի ընտանիքներ քանդեցին Հայաստանի և Արցախի բնականոն զարգացումը: Այդ արտոնյալները մսխեցին մեր հաղթանակներն ու դրա անվան տակ թալանեցին մեր երկիրը՝ դառնալով միլիոնատեր: Ինձ համար սա մարդկայնորեն դատապարտելի է և, որպես իրավաբան, փաստում եմ՝ յուրաքանչյուր երկրի կարևոր բաղադրիչներից են՝ օրենքի առջև բոլորի հավասար լինելն ու պետության առջև ծառացած խնդիրները հավասար կիսելը»:

Վերջինիս կարծիքով, այնուամենայնիվ, պետք է բարձրաձայնվի, թե ովքեր են թաքնված սրա հետևում, և, որ ամենակարևորն է, ենթարկվեն համապատասխան պատասխանատվության: Նորիկյանի խոսքով՝ ակնհայտ է՝ տեղի ունեցածն ապօրինություն է. ներկայումս ոչ ոք չի կարող լքել Արցախը:

«Նման արտահոսք ապահովելով՝ տպավորություն կարելի է ստեղծել, որ ադրբեջանցիների կողմից շրջափակումը կորցնում է իր ազդեցությունը. կան ճանապարհներ, որոնք նրանց վերահսկողությունից դուրս են: Հետևաբար, եթե շրջափակումն անարդյունավետ է, այն կորցնում է նաև իմաստը: Հնարավոր է՝ սա նաև որոշակի ռիսկեր է պարունակի»,- ասում է նա:

Զրուցակցի խոսքով՝ ինքն Արցախից սպասում է քաղաքական մտքի համախմբման և արցախահայության ճակատագրի մասով հստակության, քանի որ, ըստ Նորիկյանի, կենացների և սրտաճմլիկ խոսքերի ժամանակը վաղուց անցել է:

«Անհրաժեշտ է քաղաքական լուծման համակարգ առաջարկել՝ ինչպե՞ս են պատրաստվում դուրս գալ ստեղծված իրավիճակից: ԼՂ քաղաքական վերնախավն իր մեջ պետք է քաջություն գտնի և սկսի բանակցել Ադրբեջանի ղեկավարության հետ, որպեսզի ոչ միայն լուծվի իրավիճակը, այլև Արցախը տնօրինի իր իսկ ճակատագիրը: Ակնկալում եմ՝ Արցախից լսել քաղաքական միտք և հայեցակարգ ծառացած խնդրի մասով: Կոչերը, իհարկե, անհրաժեշտ են, սակայն դրանք բավարար չեն»,- ասում է նա:

Քաղաքական գործչի դիտարկմամբ՝ ԼՂ-ն իր հնարավորություններին ու ժամանակին համահունչ պետք է գործի. «Մենք պետք է առավելապաշտությունը համադրենք սեփական հնարավորությունների հետ ու չառաջնորդվենք երազանքներով: Սա հատկապես պետք է արմատանա ու հասունանա Արցախի քաղաքական և հանրային տիրույթում»:

Նատալի Մկրտչյան