Ամեն հաջորդ վայրկյանը կորուստ է, եթե հաշվի չառնես արագ փոփոխվող տենդենցները․ Գյումրիում միջազգային գիտաժողով է մեկնարկել

Յուրաքանչյուր հաջորդ վայրկյանը կարող է բաց թողնված հնարավորություն լինել ոչ միայն Հայաստանի, Շիրակի մարզի և Գյումրու համար, այլ՝ աշխարհի տնտեսական իրողության։ Եվ դա է պատճառը, որ շատ արագ պետք է հասկանալ, թե նոր տնտեսական աշխարհակարգում ո՜ւր է գնում աշխարհը։

Այս հստակ ուղերձով Հայաստանի պետական տնտեսագիտական համալսարանի Գյումրու մասնաճյուղում մեկնարկեց մասնաճյուղի և Պլեխանովի անվան Ռուսաստանի տնտեսագիտական համալսարանի հետ համատեղ կազմակերպված՝ «Նոր տնտեսական աշխարհակարգը․ անցյալի դասերն ու ժամանակի մարտահրավերները» խորագրով միջազգային գիտաժողովը։

Շիրակի առաջին մարզպետ, մասնաճյուղի հիմնադիր, տնտեսագիտության դոկտոր-պրոֆեսոր Արարատ Գոմցյանը ելույթի իր խոսքում ասաց՝ այս գիտաժողովն աշխարհաքաղաքական ու տնտեսական բարդ ժամանակահատվածում օրախնդիր է, պետք է տնտեսության մեջ ճիշտ առաջ շարժվելու համար իրատեսական ճանապարհներ որոնել ու գտնել։

«Պետք է հաշվի առնել նաև այն հանգամանքը, որ հետայսու տարբեր պետությունների հակամարտություններն ու տարատեսակ բախումները դառնալու են մեր տնտեսական կյանքի առօրյան, և դրանց ուժգնության հաշվարկների մեղմման, որոշ դեպքերում կանխարգելման համար անհրաժեշտ է օգտագործել յուրաքանչյուր երկրի տնտեսական մտքի արդյունավետ ներուժը։

Դրանք հնարավորություն կտան, որ տարբեր երկրների տնտեսությունների փոխշահավետ համագործակցության սկզբունքով բացահայտենք արդյունավետ զարգացման հիմնական ուղղությունները՝ հաշվի առնելով նաև նմանօրինակ տնտեսագիտական միավորների գործունեության միջազգային փորձն ու հաջողությունները»,- շեշտեց Արարատ Գոմցյանը։

ՀՊՏՀ Գյումրու մասնաճյուղի հիմնադրման 25-ամյակին նվիրված միջազգային գիտաժողովի մասնակից, Պլեխանովի անվան Ռուսաստանի տնտեսագիտական համալսարանի պրոֆեսոր Ալեքսանդրա Լեշչինսկայան ևս կարևոր համարեց գիտական այն երեք օրերը, որոնց ընթացքում լսելու են մասնագիտական վերլուծություններ, փորձելու են եզրահանգումներ անել և գալ ընդհանուր հայտարարի։

Լեշչինսկայան հանդես եկավ «ԵԱՏՄ երկրների տնտեսական զարգացման գնահատումը ժամանակակից իրողությունների համատեքստում» թեմայով զեկույցով։

Այնուհետև զեկույցով ներկայացավ Մոսկվայի տնտեսագիտության բարձրագույն դպրոցի պրոֆեսոր, Լյուքսեմբուրգի համալսարանի գիտաշխատող, Հայաստանի ամերիկյան համալսարանի պրոֆեսոր Զարուհի Հակոբյանը: Զեկուցման թեման էր «Սոցիալական մեդիա հարթակների կարգավորում. ցանցերում բևեռացման լուծման մեխանիզմը»:

Գիտաժողովը մեկնարկել և անցկացվելու է 3 հիմնական բաժիններով՝ «Համաշխարհային տնտեսության և ֆինանսական շուկաների զարգացման հեռանկարները կայուն զարգացման համատեքստում», «Տեղեկատվական տեխնոլոգիաների, կրթության և զբոսաշրջության դերը նոր տնտեսական աշխարհակարգի ապահովման գործում», «Նոր տնտեսական աշխարհակարգի իրավական, սոցիալ-քաղաքական և մշակութային առանցքները»:

Գիտաժողովի համար ընտրված «Նոր տնտեսական աշխարհակարգը․ անցյալի դասերն ու ժամանակի մարտահրավերները» խորագիրը երկար քննարկումների արդյունքում է ծնվել։

Մասնաճյուղի ղեկավար Կարեն Պետրոսյանը «Հայկական ժամանակ»-ի հետ զրույցում ասաց՝ երբ քննարկել են խորագիրը, հասկացել են, որ, հաշվի առնելով աշխարհի տենդենցները, պետք էր գլոբալ թեմա, որովհետև լոկալ օրակարգերն այլևս մեծ դերակատարություններ չունեն, քանի որ աշխարհը մտնում է գլոբալ օրակարգ։ Հատկապես ինֆորմացիոն այս դարաշրջանում, երբ յուրաքանչյուր հաջորդ տեղեկատվություն մեկ ժամ հետո արդեն հին է, ոչ ակտուալ, ոչ պիտանի։

«Շատ կարևոր առողջապահական հետքովիդյան տենդենցներ, շատ կարևոր գլոբալ օրակարգ թվային աշխարհում՝ թվային փող, թվային միջավայր, վիրտուալ միջավայր, վիրտուալ հարաբերություններ, վիրտուալ հարաբերություններում վիրտուալ փողերի առկայություն։ Սրանք օրակարգեր են, որոնք մենք՝ տնտեսագետներս, գիտենք և առկա իրավիճակներում տնտեսագիտական օրինաչափությունների հիման վրա փորձում ենք ապագայի կանխատեսումներ անել։

Բայց հիմա մեր իրականությունը շատ արագ է փոխվում: Այն օրինաչափությունները, որոնք երեկ հայտնաբերել ենք տնտեսագիտական ոլորտում, հենց այսօր իսկ կարող են շատ հին լինել, և նոր տնտեսական հարաբերություններն ու նոր տնտեսական աշխարհակարգն ստեղծեն իրենց ձևաչափին համապատասխան օրենքներ ու օրինաչափություններ, որին մենք պարտավոր ենք հետևել, որովհետև ամեն հաջորդ վայրկյանը կորուստ է, եթե դու սա հաշվի չես առնում»,- նկատեց Պետրոսյանը։

Միջազգային այս գիտաժողովին ներկայացված հոդվածները ենթարկվելու են գրախոսման և տպագրվելու են գիտաժողովի նյութերի երկու ժողովածուում:

«Այն գիտական աշխատությունը, որը զուտ արվել է, որպեսզի գիտական հոդված հրապարակվի, ինձ համար երբեք գիտական արժեք չունի։ Այն պետք է ներկայացնի խնդիր ու լուծում, որը տնտեսության համար լոկալ կամ գլոբալ մակարդակում կլինի կիրառական»,-վստահ է Կարեն Պետրոսյանը։

Ընդհանուր առմամբ, Գյումրիում մեկնարկած միջազգային գիտաժողովին մասնակցության հայտ է ներկայացրել ՀՀ-ի և ՌԴ-ի տարբեր համալսարանների, կառույցների ավելի քան 100 ներկայացուցիչ:

Սամսոն Մատինյան