Որևէ աշխատակից քաղաքական դրդապատճառով չի ազատվել աշխատանքից․ ՀՊՏՀ նախկին դասախոսը ահազանգում է, ռեկտորը՝ պարզաբանում

«Հայկական ժամանակի» խմբագրություն է դիմել ՀՊՏՀ մակրոէկոնոմիկայի ամբիոնի նախկին դասախոս, դոցենտ Արփենիկ Մուրադյանը՝ ահազանգելով, որ իրեն քաղաքական հայացքների պատճառով ազատել են համալսարանում աշխատանքից:

Ըստ Մուրադյանի՝ Տնտեսագիտական համալսարանում դասավանդել է 44 տարի։ 2019թ-ին մասնակցել է նախկին ռեկտոր Ռ. Հայրապետյանի կազմակերպած մրցույթին և հաջողությամբ անցել՝ հավաքելով համապատասխան միավորները, որն էլ իրեն հնարավորություն է տվել շարունակել աշխատանքը ՀՊՏՀ-ում: 2021թ-ին ևս մասնակցել է մրցույթի, սակայն, ըստ նրա, այս անգամ կազմակերպված ձևով, այսպես կոչված, «փակ, գաղտնի քվեարկությամբ» մերժել են իր դիմումը: Վերջինիս պնդմամբ՝ պատճառն այն է եղել, որ ինքը չի ստորագրել բուհի ներկայիս ռեկտոր Դիանա Գալոյանին աջակցելու նպատակով՝ ԿԳՄՍ նախարարին ուղղված նամակի ներքո:

«2022թ. հունիս-հուլիս ամիսներին բազմիցս դիմել եմ մակրոէկոնոմիկայի ամբիոնի վարիչ պարոն Կ. Գրիգորյանին՝ խնդրելով ներկայացնել, թե 2022-2023 ուս.տարվա ինչ ծանրաբեռնվածություն է նախատեսել և մշտապես ստացել եմ անորոշ պատասխան՝ «աշխատում ենք ծանրաբեռնվածության վրա և շուտով կտեղեկացնենք»։ Իսկ արդեն հուլիս ամսվա վերջին օրերին նշել է, որ այդ մասին կտեղեկացնեն արձակուրդից հետո (մեր արձակուրդն ավարտվում էր օգոստոսի 24-ին): Մինչդեռ այդ տեղեկատվությունն ինձ անհրաժեշտ էր հնարավորինս շուտ՝ հետագա անելիքներս և ծրագրերս պլանավորելու համար»,- մեզ հետ զրույցում ասում է նախկին դասախոսը։

Մուրադյանի փոխանցմամբ՝ օգոստոսի 22-ին աշխատանքային պայմանագիրը լուծարելու մասին ՀՊՏՀ-ից ստացել է ծանուցագիր: Վերջինիս կարծիքով՝ իր նկատմամբ կայացված որոշումը խիստ սուբյեկտիվ է և բխում է ՀՊՏՀ ղեկավարության անձնական շահադիտական նպատակներից, ինչը կոռուպցիայի դրսևորումներից է:

«Ես այլ պատճառ չեմ տեսնում ինձ աշխատանքից ազատելու համար։ Դա է վկայում նաև մակրոէկոնոմիկայի ամբիոնի վարիչ Կ. Գրիգորյանի քայլը, երբ ամբիոնի ծանրաբեռնվածությունը բաշխել է սեփական հայեցողությամբ՝ ըստ էության՝ հաշվի չառնելով որևէ գիտականորեն հիմնավորված չափորոշիչ։ Մինչև վերջին պահը ես տեղեկացված չեմ եղել, որ դասաժամեր չեն նախատեսել ինձ համար, մինչդեռ ինձ՝ որպես հիմնական աշխատողի, նրանք պարտավոր էին այդ մասին տեղեկացնել երկու ամիս շուտ»,- ասում է նա:

Ըստ Մուրադյանի՝ բուհում կան դասախոսներ, որոնք պատրաստ են հրաժարվել իրենց հասանելիք ժամերից՝ 0,25 դրույքի չափով, սակայն ամբիոնի վարիչը դարձյալ մերժում է իրեն ժամեր տրամադրել՝ պատճառաբանելով, որ, ռեկտորի հրամանով, ինքն աշխատանքից ազատվել է:

Հարցի առնչությամբ կապ հաստատեցինք նաև ՀՊՏՀ ռեկտոր Դիանա Գալոյանի հետ՝ հետաքրքրվելով՝ ի՞նչ հիմքով է լուծարվել Արփենիկ Մուրադյանի հետ ունեցած աշխատանքային պայմանագիրը։ Ռեկտորի խոսքով՝ Արփենիկ Մուրադյանի աշխատանքային պայմանագիրը լուծարվել է ժամկետը լրանալու հիմքով: 

«ՀՊՏՀ-ում 2021թ. Կենտրոնական բանկի հետ համատեղ ամբողջությամբ վերանայվել և արդիականացվել են մի շարք կրթական ծրագրեր, այդ թվում՝ մակրոտնտեսական վերլուծություն կրթական ծրագիրը, որի արդյունքում անհրաժեշտություն է առաջացել նշված ամբիոնի ակադեմիական կազմում ներգրավել պետական քաղաքականության ոլորտում աշխատող մասնագետներ: Արդյունքում մասնագետներ են ներգրավվել ֆինանսների նախարարության մակրոնտնտեսական քաղաքականության վարչությունից»,- պարզաբանում է Գալոյանը:

Վերջինս վստահեցնում է՝ ՀՊՏՀ-ում որևէ աշխատակից քաղաքական, անձնական կամ այլ՝ ոչ աշխատանքային գործոններով պայմանավորված՝ աշխատանքից չի ազատվել և չի ազատվում: Ինչ վերաբերում է Մուրադյանի հիշատակած նամակին, ըստ որի՝ դա իրեն աշխատանքից ազատելու պատճառներից մեկն է, ռեկտորը ասում է՝․ «ՀՊՏՀ աշխատակիցները ԿԳՄՍ նախարարին նամակ են ուղղվել 2020թ-ին, որից հետո Ա. Մուրադյանը անխոչընդոտ աշխատել է ՀՊՏՀ-ում 2 ուսումնական տարի շարունակ և աշխատանքից ազատվել է բացառապես վերևում բերված հիմքերով: Իսկ ինչ վերաբերում է նշված մրցույթներին, ապա թե՛ 2019թ-ին և թե՛ 2021թ-ին գիտական խորհուրդը դեմ է քվեարկել Ա. Մուրադյանի՝ դոցենտի պաշտոնում ընտրվելուն»: