Պայթյուն` հայկական ձեւով

Ոմանք ասում էին, որ տեղի ունեցածը տեռորիստական ակտ էր, ոմանք էլ` թե պայթյուն ընդհանրապես տեղի չի ունեցել, իսկ դրա մասին խոսողները ուղղակի փորձում են խուճապ առաջացնել: Նշենք, որ պայթյուն, այնուամենայնիվ, եղել է: Ըստ ոստիկանության, մարտի 25-ին ոստիկանության Երեւան քաղաքի վարչության հերթապահ մաս էր զանգահարել մի քաղաքացի ու հայտնել, որ «ԳԱԶԵԼ» մակնիշի երթուղային տաքսու կողքին պայթյուն է տեղի ունեցել: Դրանից հետո ոստիկանության Էրեբունու բաժնի ծառայողները պարզել էին, որ նույն օրը, ժամը 21.55-ին, Տիտոգրադյան փողոցի թիվ 14 շենքի դիմաց, դեռեւս չպարզված առարկայի պայթյունից, բեկորային վնասվածքներ էին պատճառվել ճանապարհին կայանված «ԳԱԶԵԼ-33312» մակնիշի երկու եւ «ՎԱԶ-2106» մակնիշի ավտոմեքենաներին: Դեպքի վայրի զննությամբ պայթյունի հետեւանքով պայթուցիկ սարքի բեկորներ, մասնիկներ եւ առարկաներ, սակայն, չէին հայտնաբերվել: Ավելի ուշ տարածվեց հաղորդագրություն, ըստ որի, պայթյունը հնչել է այն բանից հետո, երբ անձը չպարզված քաղաքացին թիվ 45 (պետհամարանիշը` 0342 Տ) եւ թիվ 14 (պետհամարանիշը` 3708) երթուղային տաքսիների ուղղությամբ նետել է անհայտ (դեռեւս չպարզված) պայթուցիկ մի սարք: «Երթուղային տաքսիներում ուղեւորներ չեն եղել, տուժածներ չկան: Մասամբ վնասվել են ավտոմեքենաները, կոտրվել են ապակիներ»,- նշված էր ոստիկանության պաշտոնական հաղորդագրության մեջ: Ծուխ չկար Դեպքի ականատեսները երեկ մեզ պատմեցին, որ պայթյունը տեղի էր ունեցել «Էրեբունի» բժշկական կենտրոնի դիմացի փողոցի հակառակ մայթի մոտ: Պատմեցին նաեւ, որ տեղի ունեցած պայթյունը այնքան ուժեղ էր, որ դրա հետեւանքով միացել էին մոտակա տարածքներում կայանված ավտոմեքենաների ազդանշանները: Պայթյունից հետո, սակայն, ոչ մի ծուխ կամ ավերվածություն չէր երեւացել, եւ ականատեսների մեջ տպավորություն էր ստեղծվել, որ պայթել էր ոչ թե պայթուցիկ, այլ որեւէ երթուղային տաքսու գազի բալոնը: «Մենք պատուհանից նայեցինք պայթյունի կողմը, բայց այնպիսի տպավորություն էր, որ ոչինչ էլ չի եղել, ուղղակի մեքենաների սիգնալիզացիաներն էին միացել»,- երեկ մեզ պատմեց դեպքի վայրին մոտ բնակվող մի էրեբունցի եւ ավելացրեց, որ չնայած պայթյունից հետո ոչ ծուխ էր երեւում, ոչ կրակ, այն այնքան ուժեղ էր, որ թվաց, թե մոտակա շենքերը ճոճվեցին: Ոստիկանության հասարակայնության հետ կապի եւ լրատվության վարչությունից երեկ մեզ հայտնեցին, որ դեպքի առնչությամբ քրեական գործ է հարուցվել ՀՀ քրեական օրենսգրքի 235 հոդվածի 1-ին մասի (ապօրինի կերպով զենք, զինամթերք, պայթուցիկ նյութեր ձեռք բերելը, իրացնելը, պահելը, որը որպես պատիժ` նախատեսում է մինչեւ երեք տարի ազատազրկում) եւ 258 հոդվածի 4-րդ մասի (խուլիգանություն` զենքի, զինամթերքի գործադրմամբ, որը որպես պատիժ նախատեսում է մինչեւ 7 տարվա ազատազրկում) հատկանիշներով: Այժմ նախաքննություն է ընթանում, միջոցառումներ են ձեռնարկվում պայթուցիկը պատրաստողին եւ պայթյունը իրականացնողին հայտնաբերելու ուղղությամբ: Նշված գործի շրջանակներում երեկ որեւէ մեկը դեռեւս բերման չէր ենթարկվել ու չէր ձերբակալվել: Երեխանե՞ր են պայթեցրել Թե կոնկրետ ով է եղել պայթյունի հեղինակը, դեռեւս հայտնի չէ, սակայն, ըստ ոստիկանության կանխատեսումների, նա կհայտնաբերվի շատ շուտ: Երեկ մեզ հայտնի դարձավ, որ ոստիկանությունը որոնողական աշխատանքները իրականացնում է դեպքի վայրին մոտ գտնվող շենքերի անչափահաս բնակիչների շարքում: Ենթադրվում է, որ պայթյունի հեղինակը տեղի բնակիչ է: Էրեբունու բնակիչների խոսքով, լուրեր են պտտվում, որ պայթյունի հեղինակը մի երեխա է եղել, որը քիմիայի դասաժամի ընթացքում անցած դասն է փորձել յուրացնել` փորձ կատարելու միջոցով: Ըստ նրանց, պայթուցիկը պատրաստված է եղել «մարգանցովկայից» եւ տեղադրված է եղել պոլիէթիլենային տոպրակի մեջ, որն էլ նետվել է երթուղային տաքսու անիվների տակ: Հենց անիվների տակ ընկնելուց հետո էլ տեղի էր ունեցել պայթյունը: Փորձագետների խոսքով, ամենայն հավանականությամբ, հենց դա է պատճառը, որ պայթյունից հետո պայթուցիկի բեկորներ, մասնիկներ եւ առարկաներ չեն հայտնաբերվել: