Ճանկռել է երեխային, անվանել՝ ոչնչություն. դպրոցներից մեկում բռնության ենթարկված երեխայի մայրը՝ դեպքի մասին (տեսանյութ)

Համացանցում տեսանյութ է տարածվել, թե ինչպես է Երևանի դպրոցներից մեկի ուսուցիչը հարվածում և վիրավորում նույն դպրոցի աշակերտներից մեկին:

Ավելի ուշ պարզ դարձավ, որ դեպքը տեղի է ունեցել Երևանի Սուրեն Սպանդարյանի անվան  թիվ 24 հիմնական դպրոցի 8-րդ դասարանում: Մեր այցելության ժամանակ դպրոց էր եկել նաև երեխայի ծնողը: Վերջինս լրատվամիջոցների հետ զրույցում պատմեց, որ դեպքը տեղի է ունեցել երկուշաբթի օրը՝ մայիսի 2-ին, սակայն տեսանյութը այսօր է տարածվել համացանցում: Մոր խոսքով՝ երեխան ինքն է պատմել կատարվածի մասին, իսկ հարվածողը եղել է անգլերենի ուսուցչուհին, որը, ըստ մոր, հաճախ է թիրախավորել տղային:

«Այդ օրը ներս է մտել ուսուցիչը և տեսել, որ դասասենյակի սեղանները ձևափոխված են: Առանց պատճառի միանգամից իմ երեխային է հարվածել ու ասել՝ «վեր կաց, ռադդ քաշիր, հետևի շարքում նստիր»: Առաջին անգամը չէ, որ նա նման վերաբերմունք է ցուցաբերում իմ երեխայի նկատմամբ: Միշտ հարվածել և վիրավորել է: Բոլոր դեպքերի մասին ես տեղյակ եմ եղել, ասել եմ՝ թող հարթվի: Փորձել եմ դասղեկի հետ զրուցել, բայց այդպես էլ չի ստացվել, այսօր էլ տեսա, որ տեսանյութն է հրապարակվել»,- լրագրողների հետ զրույցում պատմեց երեխայի մայրը՝ Քրիստինե Մելումյանը:

Նրա խոսքով՝ ուսուցչուհին հարվածել է աշակերտի գլխին, պայուսակը գցել գետնին, երեխային անվանել ոչնչություն, քերծել ձեռքը: Տեսանյութում, ըստ ծնողի, միայն դեպքի մի մասն է, ողջ դասաժամի ընթացքում ուսուցիչը երեխայի հանդեպ նման վերաբերմունք է ցուցաբերել: Քրիստինե Մելումյանը նշեց, որ գիտի՝ իր երեխան երբ է ստում և երբ ճշմարտությունը պատմում: Իսկ թե ինչո՞ւ է միայն իր երեխայի հանդեպ ուսուցիչը նման վերաբերմունք ցույց տվել, մայրը դժվարացավ պատասխանել, սակայն նշեց, որ երեխայի նկատմամբ այսօր վատ վերաբերմունք է ցուցաբերել նաև մեկ այլ առարկայի ուսուցիչ:

«Չի եղել նման դեպք, երբ իմ երեխան որևէ ուսուցչի հրի կամ հարվածի, վատ բառեր օգտագործի: Ինքը նման դաստիրակություն չի ստացել, մեր ընտանիքում դա ընդունված չէ: Միշտ մոտեցել եմ, ասել՝ խնդիրը ո՞րն է, որ իմ երեխային նման կերպ է վերաբերվում, բայց այդպես էլ չեմ կարողացել հասկանալ: Այսօր էլ ռուսերենի դասատուն է մտել դասարան, հեռախոսները հավաքել և երեխայիս «ուռոդ» է անվանել»,- ասաց մայրը:

Անգլերենի ուսուցչուհու հետ հանդիպել մայրը չի ցանկանում, քանի որ մի քանի անգամ փորձել է խոսել, սակայն վերջինս կապի դուրս չի եկել, ծնողի զանգերը նույնպես անպատասխան են մնացել: Այսօր խոսել է դպրոցի տնօրենի հետ, խնդրել, որ ուսուցչի նման արարքը դատապարտվի:

«Ո՛չ ճանաչում ենք ուսուցչուհուն, ո՛չ էլ շփում ենք ունեցել իր հետ: Չգիտեմ՝ ինչո՞ւ է ատելությամբ լցված իմ երեխայի հանդեպ: Ուսուցչուհու հետ հանդիպելու ոչինչ չունեմ: Չեմ ուզում հանդիպել այն մանկավարժի հետ, ում մի քանի անգամ փորձել եմ զանգահարել, սակայն չի պատասխանել զանգերիս, փոխարենը լսել եմ, որ ասել է՝ ծնողին ասեք՝ ինձ էլ չզանգահարի: Պետք է դատապարտվի այս արարքը, որ հասկանան՝ երեխան ծաղրի առարկա չէ: Պետք է հասկանան՝ անգլերենի ուսուցչուհու անմեղ դիմակի տակ հրեշ է թաքնված»,- նշեց ծնողը:

Թե ինչպե՞ս է տեսանյութը հայտնվել համացանցում, Քրիստինե Մելումյանն ասաց, որ տեղյակ չէ. «Շատ լավ է, որ տեսանյութը տարածվել է: Ես ապացուցեի, որ երեխան ծաղրի առարկա չէ, և պետք է դատապարտվի այս արարքը: Իմ երկրորդ բալիկին էլ պետք է բերեմ այս դպրոց, առաջին դասարան: Դպրոցի անձնակազմի հանդեպ հարգալից վերաբերմունք ունեմ, բայց նման արարքը իմ երեխայի հանդեպ անընդունելի է: Այս պարագայում ուսուցիչը պետք է պատասխան տա»,- պնդեց ծնողը:

Սուրեն Սպանդարյանի անվան թիվ 24 հիմնական դպրոցի տնօրենն էլ դեպքի վերաբերյալ հավելյալ մեկնաբանություն տալ չցանկացավ՝ միայն շեշտեց, որ ուսուցչի վերաբերմունքը երեխայի նկատմամբ դատապարտելի է: Դպրոցի մանկավարժների բնութագրմամբ՝ երեխան չսովորող աշակերտ է, սակայն, ըստ իրենց, նրա նկատմամբ ցուցաբերած վերաբերմունքն անթույլատրելի է:

Երևանի քաղաքապետարանից էլ «Հայկական ժամանակ»-ին փոխանցեցին, որ հանրակրթության վարչությունն այցելել է դպրոց՝ դեպքի մանրամասներն ուսումնասիրելու: Հավելյալ տեղեկատվություն ունենալու դեպքում քաղաքապետարանը հանդես կգա հայտարարությամբ:

ՀՀ ԿԳՄՍ նախարարությունը նույնպես անդրադարձել է դեպքին: Գերատեսչությունը խստորեն դատապարտել է հակամանկավարժական դրսևորումները: Տարածած հայտարարության մեջ շեշտված է՝ հետամուտ են լինելու ուսումնական հաստատություններում բռնությունից զերծ կրթական միջավայրի ձևավորմանը»: