Ոստիկանությունը Երևանում կանխել է վենդետա, պետք է սպանվեր «Կաբել» մականվամբ քրեական հեղինակությունը. shamshyan.com

Ոստիկանությունը կանխել է քրեական աշխարհում հայտնի «Կաբել»-ի սպանությունը: Այս մասին հայտնում է Shamshyan.com-ը:

Ըստ աղբյուրի՝ ապրիլի 16-ին ՀՀ ոստիկանության պետ, ոստիկանության գեներալ-մայոր Վահե Ղազարյանի կարգադրությամբ՝ ոստիկանները մայրաքաղաքում կանխել են մինչև ատամները զինված «գողական ռազբորկան», որն ավելի շատ վենդետա էր լինելու:

Իրացնելով օպերատիվ տվյալները՝ ոստիկանները պարզել են, որ Անդրանիկ Ներսիսյանը և իր շրջապատի անձինք, համոզված լինելով, որ Ա. Ներսիսյանի նկատմամբ այս տարվա մարտի 7-ին ատրճանակով կրակոցներն արձակել են քրեական աշխարհում հայտնի «Կաբել» մականվամբ 53-ամյա Արթուր Բարսեղյանի կողմնակիցները, նախապատրաստել են վերջինիս սպանությունը:

Ոստիկանության Երևան քաղաքի վարչության քրեական հետախուզության բաժնում օպերատիվ տեղեկություններ են ստացվել, որ Ա. Ներսիսյանը հանձնարարել է իր կողմից ստեղծված և ղեկավարած խմբավորման անդամներին ձեռք բերել տարբեր տեսակի զենքեր, նռնականետեր, ինքնաձիգեր, դիպուկահարներ, ատրճանակներ, նռնակներ, զրահաբաճկոններ, որից հետո վերջիններիս հետ համաձայնության է եկել զրահապատ ավտոմեքենան ՀՀ բերելուց հետո իրականացնել իրենց հանցավոր մտադրությունը՝ սպանելով Ա. Բարսեղյանին:

Փաստի առթիվ փետրվարի 12-ին Հայաստանի քննչական կոմիտեի Երևան քաղաքի քննչական վարչության ծանր հանցագործությունների քննության բաժնում հարուցվել է քրեական գործ:

Ապրիլի 15-ին, դատարանի որոշմամբ, խուզարկություն է կատարվել Երևանի բնակիչ 26-ամյա Ա. Ներսիսյանի՝ Մալաթիա-Սեբաստիա վարչական շրջանում գտնվող բնակարանում, որտեղ հայտնաբերվել են խլացուցիչի նմանվող մետաղական առարկաներ, «Sig sauer» գրառմամբ ատրճանակ՝ փամփշտատուփով և 7 հատ փամփուշտներով, «Բերետա» տիպի ատրճանակ՝ փամփշտատուփով և 7 հատ փամփուշտներով, տարբեր տրամաչափի փամփուշտներ, ծալովի դանակ, «Ակուլա» գրառմամբ հրացանի նմանվող առարկա, 2 մետաղական ձողի և նիզակի նմանվող առարկաներ, բանալիներ, փականներ բացելու համար հարմարեցված առարկաներ (ատմիչկաներ), 2 թափանցիկ անոթներ՝ սնդիկանման նյութի պարունակությամբ:

Նույն օրը՝ առավոտյան, ապօրինի կերպով զենք-զինամթերք, թմրամիջոցներ օգտագործելու և պահելու կասկածանքով բերման է ենթարկվել ոստիկանության Նոր Նորքի բաժին, որտեղ վերջինիս անձնական խուզարկությամբ հայտնաբերվել է սև գույնի պահեստատուփ՝ լիցքավորված 5.6 մմ տրամաչափի «ՏՕԶ» տիպի 9 հատ փամփուշտներով:

Ոստիկաններն ու քննիչները, դատարանի որոշմամբ, խուզարկություն են իրականացրել Երևան քաղաքի Մալաթիա-Սեբաստիա վարչական շրջանի բնակիչ 40-ամյա Արկադի Ղազարյանի բնակության վայրին պատկանող շենքի դիմաց գտնվող ավտոտնակում, որտեղ հայտնաբերել են 1 հատ «386-136-72Տ» գրառմամբ նռնակ՝ առանց պայթուցիչի, 1 հատ «9-66 է» տիպի նռնակի պայթուցիչ, 1 հատ նռնակի նմանվող սև գույնի իր՝ «91-4-15» գրառմամբ, 1 հատ նռնակի պայթուցիչ՝ «ՈՒ-515Մ 583, 3-14» գրառմամբ, 5 հատ կաթոցիչ՝ մոխրացած հետքերի պարունակությամբ և 1 հատ մահակ:

Դատարանի որոշմամբ՝ խուզարկություն է կատարվել նաև Երևան քաղաքի Մալաթիա-Սեբաստիա վարչական շրջանի բնակիչ 26-ամյա Գևորգ Դանիելյանի բնակության վայրում, որտեղ հայտնաբերվել են 9 մմ տրամաչափի 50 փամփուշտ և 5.45 մմ տրամաչափի 2 փամփուշտ, ինչպես նաև վերջինիս «Ինֆինիտի» 35871 ավտոմեքենայի խուզարկությամբ հայտնաբերվել է «MP654K, cal 4.5 mm, Made in Russia Baikal 4.5մմ» գրառումներով գործարանային համարի օդամղիչ ատրճանակ՝ մեկ փամփշտատուփով:

Երևանի բնակիչ 31-ամյա Ավետիք Ավետիսյանի բնակարանի խուզարկությամբ հայտնաբերվել են 13 հատ բանալիներ, փական բացելու համար հարմարեցված գործիքներ, 18 հատ՝ 6.35 մմ տրամաչափի, 10 հատ՝ 7.62 մմ տրամաչափի, 18 հատ՝ 5.45 մմ տրամչափի, 50 հատ՝ X super գրառմամբ, 9.7 մմ տրամաչափի՝ 2 հատ, 9 մմ տրամաչափի՝ 3 հատ, «94270» գրառմամբ՝ 1 հատ,«45GAPSPEER»՝ 1 հատ, «auto-R100z225» գրառմամբ՝ 1 հատ փամփուշտներ, մեկ հատ խլացուցիչի նմանվող ինքնաշեն 17 սմ երկարությամբ, 6.3 սմ տրամաչափով երկաթյա ձող:  

Հարուցված քրեական գործի շրջանակներում Ա. և Վ. Ներսիսյանները, Ա. Ղազարյանը, Ա. Ավետիսյանը, Գ. Դանիելյանն ու Տ. Ղարիբյանը ձերբակալվել են: Նշանակվել են մի շարք փորձաքննություններ: Հարուցված քրեական գործի նախաքննությունը շարունակվում է: