Բայդենն ու Ջոնսոնը քննարկում են, Պուտինը՝ խորհրդակցում, Շոլցը՝ մեկնում Մոսկվա. ուկրաինական ճգնաժամը խորանում է

Միացյալ Նահանգների և Մեծ Բրիտանիայի առաջնորդները հայտարարել են, որ դեռ հույս ունեն Ուկրաինայի շուրջ ստեղծված ճգնաժամի դիվանագիտական կարգավորման հարցում։ Ջո Բայդենի և Բորիս Ջոնսոնի միջև բանակցությունները տեղի են ունեցել նախորդ գիշեր։

«Վարչապետը և նախագահ Բայդենը միմյանց տեղեկացրին աշխարհի այլ առաջնորդների հետ իրենց վերջին բանակցությունների մասին: Նրանք համաձայնեցին, որ դիվանագիտության և Ռուսաստանի համար Ուկրաինայի դեմ սպառնալիքներից նահանջելու համար դեռ կարևոր պատուհան կա»,- ըստ BBC-ի՝ ասվում է Մեծ Բրիտանիայի վարչապետի գրասենյակի հայտարարության մեջ:

Ղեկավարների կարծիքով՝ Ուկրաինա ներխուժումը կհանգեցնի ձգձգվող ճգնաժամի Ռուսաստանի և ամբողջ աշխարհի համար։

Երեկ երեկոյան ՌԴ նախագահի խոսնակ Դմիտրի Պեսկովը CNN-ին ասել է, որ Վլադիմիր Պուտինը պատրաստ է Ուկրաինայի շուրջ ստեղծված իրավիճակի և Ռուսաստանի անվտանգության երաշխիքների շուրջ բանակցությունների։

«Նախագահ Պուտինը միշտ պնդել է բանակցությունների և դիվանագիտական լուծումների անհրաժեշտության մասին: Եվ փաստորեն, նա նախաձեռնել է Ռուսաստանի անվտանգության երաշխիքների հարցը: Ուկրաինան Ռուսաստանի անվտանգության երաշխիքների խնդրի միայն մի մասն է, այնտեղ առավել խորքային քննարկման ենթակա հարցեր կան: Եվ, իհարկե, նախագահ Պուտինը պատրաստ է բանակցել»,- Պեսկովի խոսքերն է մեջբերում CNN-ը:

Ի դեպ, երեկ Կրեմլում անվտանգային հարցերի շուրջ հանդիպում են ունեցել ՌԴ արտաքին գործերի նախարար Սերգեյ Լավրովը, պաշտպանության նախարար Սերգեյ Շոյգուն և նախագահ Վլադիմիր Պուտինը:

ՌԴ ԱԳ նախարար Սերգեյ Լավրովը Պուտինի հետ հանդիպման ժամանակ ասել է, որ, իր կարծիքով, Ռուսաստանի և Արևմուտքի միջև անվտանգության երաշխիքների տրամադրման հարցի շուրջ բանակցությունների հնարավորությունները սպառված չեն և կողմերի միջև հնարավոր է հասնել համաձայնության:

Միաժամանակ, Ուկրաինայի նախագահ Վլադիմիր Զելենսկին նախօրեին փետրվարի 16-ը հայտարարել է ուկրաինացիների միասնության օր։ Արևմտյան լրատվամիջոցները, հղում անելով ԱՄՆ հետախուզության տվյալներին, փետրվարի 16-ը նշել են որպես այն հնարավոր ամսաթվերից մեկը, երբ Ռուսաստանն իբր ռազմական գործողություններ կսկսի Ուկրաինայի դեմ։ Ռուսաստանի իշխանությունները մշտապես հերքում են նման լուրերը, ինչպես և հերքել են այս մեկը:

Այսօր էլ Գերմանիայի կանցլեր Օլաֆ Շոլցը բանակցություններ կվարի ՌԴ նախագահ Վլադիմիր Պուտինի հետ։

Նախօրեին Շոլցը Կիևում հանդիպել է Ուկրաինայի նախագահ Վլադիմիր Զելենսկու հետ և հանդիպումից հետո ասել, որ ԵՄ-ն և ԱՄՆ-ն ակտիվորեն աշխատում են պատժամիջոցների փաթեթի պատրաստման վրա, որը կներդրվի Ուկրաինայի շուրջ սրման դեպքում։

Financial Times-ն իր երեկվա խմբագրականում գրել է Գերմանիայի կանցլեր Օլաֆ Շոլցի՝ այսօր Մոսկվա կատարելիք այցի մասին։ Շոլցը կանցլերի պաշտոնում սպասում է առաջին լուրջ փորձությանը՝ Վլադիմիր Պուտինի հետ հանդիպմանը Կրեմլում, գրում է թերթը։

Ուկրաինական ճգնաժամի ողջ ընթացքում Ռուսաստանը փորձում էր պառակտում սերմանել արևմտյան դաշինքում և Գերմանիան դիտարկում էր որպես հնարավոր թույլ օղակ, ուստի Շոլցը, ըստ FT-ի լրագրողների, պետք է Պուտինի հետ հանդիպմանը մոտենա հստակ նպատակներով և ուղերձներով։ Նա պետք է ընդգծի ՆԱՏՕ-ի միասնությունը և հիշեցնի, որ Ուկրաինայի վրա հարձակման դեպքում Ռուսաստանը կենթարկվի կոշտ տնտեսական պատժամիջոցների։

Կան այլ հարցեր, որոնք պետք է որոշի Գերմանիայի կանցլերը, օրինակ՝ «Հյուսիսային հոսք-2» գազատարի ճակատագիրը։ Հայտնի է, որ Շոլցը ոչ միանշանակ է վերաբերվում նախագծին և հրաժարվում պնդել, որ Ուկրաինայի վրա ռուսական հարձակումը կհանգեցնի դրա դադարեցմանը:

Ավելի լավ կլիներ, ըստ FT-ի, եթե Գերմանիայի կանցլերը բացահայտ հայտարարեր, որ «Հյուսիսային հոսքը» կփակվի պատերազմի սկսվելու օրը։ Թերևս Շոլցը չի ցանկանում հրապարակայնորեն խոսել այդ մասին՝ մտավախություն ունենալով, որ գերմանական կառավարությունը թանկարժեք դատական գործի առաջ կկանգնի։ Եթե այդպես է, ապա Պուտինին ուղղված ուղերձը պետք է փոխանցվի այլ կերպ, քանի որ «Հյուսիսային հոսք 2»-ը շատ խորհրդանշական և բավական թանկ նախագիծ է, և ցանկացած երկիմաստություն կարող է սխալ մեկնաբանվել Մոսկվայի կողմից:

Քանի որ մտավախությունները մեծանում են Ուկրաինայի դեմ Ռուսաստանի հնարավոր ագրեսիայի վերաբերյալ, ԱՄՆ-ում աշխատանքային խումբը, տարբեր սցենարների համաձայն, պատասխաններ է մշակում, գրում է Washington Post-ը։

Այսպես կոչված՝ «Վագրերի թիմը», որը ղեկավարվում է Սպիտակ տան կողմից, մասնավորապես պատրաստել է ձեռնարկ, որը նկարագրում է մի շարք արագ պոտենցիալ պատասխաններ, որոնք կարող են ձեռնարկվել ռուսական հնարավոր ներխուժման առաջին երկու շաբաթվա ընթացքում:

Փորձագետների թիմը ստեղծվել է այն բանից հետո, երբ անցյալ տարվա հոկտեմբերին ԱՄՆ Ազգային անվտանգության խորհրդի անդամները հայտնաբերել էին ռուսական զորքերի զանգվածային կուտակման նշաններ Ուկրաինայի հետ սահմանին:

Ամերիկյան հատուկ ծառայությունների պաշտոնյաները խոստովանում են, որ չեն կարող ճշգրիտ կանխատեսել Վլադիմիր Պուտինի և ռուս զինվորականների գործողությունները, սակայն զգույշ պլանավորումը միանշանակ պետք է: