Սա կանխելու է երեխաների անկանոն հոսպիտալացումը. նախարարությունը փոփոխություններ է մշակում մանկաբուժության ոլորտում

ՀՀ առողջապահության նախարարությունը մանկաբուժության ոլորտում պատրաստվում է որոշակի փոփոխություններ իրականացնել: Համապատասխան մասնագետներն արդեն քննարկում են այդ փոփոխությունները:

Նախարարության մոր և մանկան առողջապահության պահպանման վարչության երեխաների առողջության պահպանման բաժնի պետ Լիլիթ Ավետիսյանը «Հայկական ժամանակ»-ի հետ զրույցում պարզաբանեց՝ ներկա փոփոխությունները հիմնականում ուղղված են երեխաների անկանոն հոսպիտալացումները կանխելուն և ճիշտ ուղղորդումներ իրականացնելուն:

«Փոփոխությունները նրա համար են, որպեսզի կարողանանք կանոնակարգել և թեթևացնել առաջնային օղակից դեպի հիվանդանոց ընթացքը: Մշտապես տեսնում ենք, որ հիվանդանոց գալիս են այնպիսի երեխաներ, որոնք պետք է տանը լինեն, այսինքն՝ նրանց մոտ առկա վիճակի կամ հիվանդության բուժման համար հոսպիտալացման կարիք չկա, ընդամենը կարող են լինել պոլիկլինիկայի մանկաբույժի վերահսկողության ներքո ու մնալ տանը: Մենք ուղղորդելու ենք մասնագետներին, թե որ խնդրի դեպքում է երեխան ենթակա հոսպիտալացման, կազմելու ենք ցանկեր, որոնք կանոնակարգելու են, թե որ ախտանշանների դեպքում երեխան կարող է ստանալ ինտեսիվ բուժում ու որ բաժանմունքում»,- ասաց մասնագետը:

Առողջապահության ոլորտի ներկայացուցչի խոսքով՝ սխալ ուղղորդումների և չկանոնակարգված աշխատանքի դեպքում երեխան, չունենալով հոսպիտալացման ցուցում, պառկում է հիվանդանոցում, երբեմն ստանում չհիմնավորված բուժում, ինչպես նաև  զբաղեցնում մահճակալ: Այսպիսով՝ այն երեխան, որն իրոք ունի լուրջ խնդիր և բուժումը պետք է ստանա պարտադիր հոսպիտալացման պայմաններում, մահճակալային ծանրաբեռնվածության դեպքում դուրս է մնում:

Ավետիսյանն ասում է՝ բժիշկների բացթողումն է սխալ հոսպիտալացումների պատճառը, և բացերը տարբեր պատճառներով են. «Իհարկե, բացերը կարող են լինել թե՛ հիվանդանոցային և թե՛ առաջնային օղակի մասնագետի կողմից: Այս ամենից խուսափելու համար առաջնային են բժշկի կրթումն ու աջակցումը, որի շրջանակներում կներկայացվի, թե որ դեպքում է իրականացվում պացիենտի ուղղորդում հիվանդանոց, ապա հոսպիտալացում: Օրինակ՝ նազոֆարինգիտ հիվանդությունը հոսպիտալացման կարիք չունի, սակայն այդ ախտորոշմամբ երեխաները պոլիկլինիկայի կողմից ուղեգրվում են հիվանդանոց և երբեմն հոսպիտալացվում: Այսինքն՝ չկա ցանկ, թե որ ախտորոշման դեպքում է հարկավոր հոսպիտալացնել երեխային, որի դեպքում՝ ոչ: Սա նոր փոփոխությամբ նույնպես ծրագրում ենք»:

Անհիմն հոսպիտալացումները ոչ միայն մահճակալային ծանրաբեռնվածության պատճառ են դառնում, նաև շատ հաճախ՝ վիրուսային ինֆեկցիաների ձեռքբերման: Մասնագետի խոսքով՝ հերթում կանգնելը, հավելյալ օրեր հիվանդանոցում անցկացնելը, հատկապես, եթե դրա կարիքը չկա, կարող են բարձրացնել այլ վիրուսային ինֆեկցիաներով վարակվելու հավանականությունը, որն էլ իր հերթին կարող է ծանրացնել երեխայի վիճակը. հիվանդանոցային բուժում չպահանջվող ախտորոշմամբ հոսպիտալացված երեխան բաժանմունքում կարող է ձեռք բերել այլ վիրուսներ ու կրկնակի ինֆեկցիաներ:

Այս ամենին զուգահեռ մամուլում սկսվեց շրջանառվել, թե մի շարք մանկաբույժներ դեմ են այս փոփոխություններին և պատրաստվում են նամակով դիմել ՀՀ առողջապահության նախարարություն: Բանն այն է, որ նրանք կարծում են՝ այս փոփոխություններով կրճատվում է հիվանդ երեխաների բուժման ընթացքը հիվանդանոցային պայմաններում: Սակայն առողջապահության նախարարության մոր և մանկան առողջապահության պահպանման վարչության երեխաների առողջության պահպանման բաժնի պետ Լիլիթ Ավետիսյանը շեշտում է՝ այս փոփոխությունների հիմնական նպատակը երեխաների բուժումը հստակ կանոնակարգելն է: Սա չի ենթադրում որևէ ֆինանսական բեռ և երեխաների հիվանդանոցային բուժման կրճատում:

«Մանկաբուժական ծառայության փոփոխությունները ֆինանսական կրճատում չեն պահանջում: Դրանք ուղղված են ճիշտ ուղղորդումներին, որի արդյունքում այդ գումարները ուղղվելու են այն մանկական ծառայություններին, որոնք ավելի ծախսատար են և պահանջում են երկարատև բուժում: Որևէ կրճատում այս փոփոխությունները չեն ենթադրում: Եթե անհրաժեշտ է, որ երեխան հիվանդանոցային բուժում ստանա 7 օր, նա կստանա: Որևէ միտք չկա այս փոփոխություններով երեխաների բուժման և սպասարկման որակը ցածրացնելու, հակառակը, փոփոխություններն ուղղված են ծառայությունների կանոնակարգմանը և բարելավմանը, որոնք լինելու են շարունակական»,- շեշտեց Ավետիսյանը:

Նոր փոփոխությունների իրականացման համար ստեղծվել են մասնագիտական աշխատանքային խմբեր, որտեղ ներգրավված են գրեթե բոլոր բժշկական հաստատությունների ներկայացուցիչները: Դեռևս պետք է քննարկումներ ընթանան, մասնագետները լսեն միմյանց, ասում է Լիլիթ Ավետիսյանը: Իսկ թե ո՞ր օրվանից նոր փոփոխությունները կմտնեն ուժի մեջ, մասնագետը դեռևս ժամկետ նշել չի կարող:

Մերի Խաչատրյան