Պաշտոնանկություններ Գյումրիում. Շիրակի մարզպետն ու ՔՊ թեկնածուն հերքում են իրենց ուղղված մեղադրանքները

Գյումրու թիվ 38 դպրոց, Գեղանիսի միջնակարգ դպրոց, Գյումրու թիվ 1 պոլիկլինիկա. երեքին մեկ ընդհանրություն է միավորում. երեքի տնօրեններն էլ գրեթե նույն ժամանակամիջոցում և նույն հիմքով ազատվել են աշխատանքից:

Գյումրու թիվ 38 դպրոցի տնօրեն Արփինե Նիկողոսյանը ՀԺ-ի հետ զրույցում նշեց, չի բացառում, որ իր ազատման պատճառը «Քաղաքացիական պայմանագիր» կուսակցության պատգամավորի թեկնածու Նազելի Բաղդասարյանի ֆեյսբուքյան գրառման տակ իր կողմից արված խիստ դիտարկումը լինի: Բայց որ քաղաքական հիմք ունի կատարվածը, վստահ է:

«Ես երեք տարի է իմ մաշկի վրա զգացել եմ էդ քաղաքական ճնշումները:  Այդ օրն էլ, ուշ ժամի էր, որ գրառումն արել եմ, և Նազելին որ գրեց, տիկին Նիկողոսյան, դուք ի պաշտոն մեկնաբանություն գրելու իրավունք չունեք, ես էլ գրեցի, որ չունեմ աշխատանքի ժամին, և աշխատանքի տեղում, արդեն հասկացա, որ մի բան լինելու է, հերթական գրոհի պետք է ենթարկվեի: Բայց նման անհեթեթ ազատում ու էդքան արագ, չէի սպասում: Սա բոլոր իրավական ակտերին դեմ է»,-ասաց Նիկողոսյանը:

Դպրոցի տնօրենն աշխատանքից ազատվել է ՀՀ ԱՕ 113-րդ հոդվածի 1-ին մասի 6-րդ կետի(Աշխատանքային պայմանագրի լուծումը գործատուի նախաձեռնությամբ՝ աշխատողի նկատմամբ վստահությունը կորցնելու դեպքում), և ՀՀ ՊՈԱԿ-ների մասին օրենքի 15-րդ հոդվածի 1-ին մասի դրույթներով:

Թե ինչու է մարզպետն անվստահություն հայտնել Նիկողոսյանին, աշխատանքից ազատված տնօրենը չի էլ պատկերացնում: Ասում է, Հայաստանում չկա այնպիսի ստուգող մարմին, որն իր ղեկավարած դպրոցում ստուգումներ իրականացրած չլինի անցած 3 տարիների ընթացքում:

«Հենց մարզպետն իր օգնականներով ու խորհրդականներով, բոլոր 3 մարզպետների ժամանակ էլ  խնդիրը եղել է: Իսկ Նազելիի հետ տարակարծությունները քաղաքական հողի վրա են: Էն ժամանակ էլ ինքը մարզպետի օգնական էր, գալիս էր ստուգումների, ասեմ, որ եկողներից ամենասթափ մտածողն էր, ու որոշ դեպքերում ճիշտ լուծումներ են եղել դպրոցի հետ կապված ու ինձ թվում էր, որ խնդիրներ չունենք իրար հետ, բայց փաստորեն, միայն թվում էր»,-վստահեցրեց ՀՅԴ անդամ Արփինե Նիկողոսյանն ու մեկ անգամ ևս շեշտեց. դպրոցում երբեք իր գաղափարները չի պարտադրել, ի ցույց չի դրել, քարոզչությամբ չի զբաղվել:«Քաղաքացիական պայմանագիր» կուսակցության պատգամավորի թեկնածու Նազելի Բաղդասարյանը մեզ հետ զրևույցում նշեց, որ իր անունը կապել այս պաշտոնանկության հետ անհեթեթություն է:

«Ոչ իմ ոլորտային մասնագետն է, ոչ շփում եմ ունեցել աշխատանքի բերումով, որովհետև ԱԺ-ում նգամ կրոթւյան հարցերով չեմմ զբաղվում, և ինչ-որ խնդիրներ ունենալ, դրանք բերել առարկայական  դարձնել այս հարթության վրա, անհեթեթ է: Չեմ կարող ասել, որ ֆեյսբուքյան գրառումը որևէ մեկի պաշտոնանկության համար հիմք կարող է դառնալ: Եթե տիկին Նիկողոսյանը կարծում է, որ իր իրավունքները ոտնահարվել են, կարող է դիմել դատարան»:

Պատգամավորի թեկնածուն նաև տեղեկացրեց, եթե իր անունը շարունակեն շրջանառել և շահարկել այս պաշտոնանկությունների հետ կապված, ստիպված կլինի զրպարտության համար դիմել դատարան:

«Գյումրիում չկա մեկը, ով համարձակվի իմ անունը կապել ինչ-որ պաշտոնանկությունների կամ այլ գործընթացների հետ»,-ասաց Բաղդասարյանը:

Նույն հիմքով աշխատանքից ազատվել է նաև Գեղանիսի դպրոցի տնօրեն Կարինե Ղազարյանը: Ուզել է իր հերթական արձակուրդը, ժամերի ընթացքում ստացել աշխատանքից ազատման հրաման: Նա ևս չի պատկերացնում, թե Շիրակի մարզպետն ինչ  հարցում է եղել այդքան անվստահ, որ առանց նախազգուշացման իրեն ազատել է աշխատանքից: «Ամուսինս հարում է «Հայաստան» դաշինքին, դաշնակցական է, բայց ես դպրոցում որևէ բանով քաղաքական այդ կտրվածքում աչքի չեմ ընկել, ոչինչ չեմ արել: Մարզպետի որոշումն անօրինական եմ համարում»,-ասաց Ղազարյանը:

Երկուսն էլ պատրաստվում են Շիրակի մարզպետի, ըստ իրենց անօրինական որոշումները դատական հարթակում վիճարկել:

Զբաղեցրած պաշտոնից անակնկալ ազատվել է նաև Գյումրու թիվ 1 պոլիկլինիկայի տնօրենը: Այվազ Սուքիասյանը, սակայն, չցանկացավ այդ մասին խոսել, ասեց, այլևս խոսելիք չունի այդ թեմայով:

Ինչո՞ւ է տնօրեններին Շիրակի մարզպետ Հովհաննես Հարությունյանն ազատել աշխատանքից: Այս պահին արձակուրդում գտնվող «Քաղաքացիական պայմանագիր» կուսակցության պատգամավորի թեկնածու մարզպետը մեր խնդրանքով մեկնաբանեց տեղի ունեցածը: Նաև հիշեցրեց, որ պաշտոնավարման սկզբից էր հայտարարել, որ հանուն երկրի բարօրության չաշխատողը պետք է ազատվի զբաղեցրած պաշտոնից: «Նման որակումները տեղին չեն, քանի որ ինձ համար աշխատակիցների քաղաքական հայացքները երկրորդ պլանում են, կարևորն աշխատանքի որակն ու նվիրվածությունն է: Իսկ այն, որ  մեկ օրում երկու տնօրեն է ազատվել աշխատանքից, զուտ զուգադիպություն է:  էդքան բան: Մարզում 140-ից ավել դպրոց կա, ինչի մասին է  խոսքը: Ես օգտվել եմ օրենքով սահմանված իմ իրավունքներից: Այլ  շահարկումներն անհիմն են»,-պնդեց Շիրակի մարզպետը:

Իսկ ինչո՞ւ են տնօրենները խոսում վարչական ռեսուրսի կիրառման ու քաղաքական հայացքների պատճառաով ազատումների մասին: Ըստ մարզպետի, այդպես իրենց ավելի հարմար է:

Առաջիկայում սպասվո՞ւմ են նոր պաշտոնանկություններ: Հովհաննես Հարությունյանը չբացառեց: Ասաց նորմալ գործընթաց է կադրերի փոփոխությունը:

Արդյո՞ք աշխատանքից արդեն ազատված տնօրենների արարքներն աններելի էին այնքան, որ հնարավոր չէր սպասել և քաղաքական գործընթացների ավարտից հետո դրանց ընթացք տալ: Մարզպետն ասաց՝ ոչ:  «Եթե մի բանն արվել է, ուրեմն հենց էդ պահին էր պետք»: